ސަރުކާރަށް ރައްޔިތުން މަޖިލީހުގެ ސުޕާރ މެޖޯރިޓީ ދީގެން ވާނީ ގެއްލުން ކަމަށް ޕީއެންއެފްގެ ޓިކެޓް ގައި ކުރިޔަށް އޮތް މަޖިލިސް އިންތިޚާބްގައި މަޑަވެލި ދާއިރާއަށް ވާދަކުރައްވާ އަހުމަދު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ވައްޑެ މިފަދައިން ވިދާޅުވެފައިވަނީ ޗެނަލް 13 އިން ގެނެސްދޭ "ރައްޔިތުންގެ ބާރު" ޕްރޮގްރާމްގައި ވާހަކަދައްކަވަމުންނެވެ.
އެގޮތުން ސަރުކާރަށް މަޖިލީހުގެ ސުޕާރ މެޖޯރިޓީ ދީގެން ކަންކަން ހައްލުވާނެތޯ އެހުމުން ވައްޑެ ވިދާޅުވީ މީގެ ކުރިންވެސް ސަރުކާރު ހިންގާ މައި ޕާޓީ އަށް މަޖިލީހުގެ މެޖޯރިޓީ ދީގެން ރައްޔިތުންނަށް ލިބުނީ ގެއްލުންކަމަށެވެ.
އެމްޑީޕީ ސަރުކާރެއް އޮވެ، މަޖިލީހުގެ ސުޕާރ މެޖޯރިޓީ އޮއްވާ މަޖިލީހުން މަސައްކަތް ކޮށްފައިވަނީ ރައްޔިތުންގެ ހުރި މައްސަލަތަކަށް ހައްލު ގެނެސްދޭން ނޫންކަމަށް ވައްޑެ ވިދާޅުވިއެވެ.
އޭރުގެ ރައީސް އިބްރާހިމް މުހައްމަދު ޞާލިހް މަޖިލިސް ބޭނުންކުރެއްވީ ބާރެއްގެ ގޮތައް ކަމަށް ވިދާޅުވެ ވައްޑެ ވަނީ ފާޑުވިދާޅުވެފައެވެ.
"އެމްޑީޕީގެ ސުޕާރ މެޖޯރިޓީ ސަރުކާރަށް އޮތް ތަން ފެނުނު، ސުޕާރ މެޖޯރިޓީ ބޭނުން ކުރެއްވީކީ ރައްޔިތުންނަށް މައްސަލަތަކަށް ހައްލު ހޯދައިދޭކަށް ނޫން. އަޅުގަނޑުމެންނަށް ފެނިގެންދިޔައީ ބާރެއްގެ ގޮތައް ރައިސް އިބްރާހިމް މުހައްމަދު ޞާލިހް މަޖިލިސް ބޭނުން ކުރެއްވިތަން" ވައްޑެ ވިދާޅުވިއެވެ.
ރައްޔިތުން ގެ މަންދޫބަކު މަޖިލީހަށް ފޮނުވަނީ އޭރުގައި އޮންނަ ސަރުކާރެއްގެ ތެރެއިން، ދާއިރާގެ ހުންނަ މައްސަލަތަކާއި ކަންބޮޑުވުންތައް، ދާއިރާގައި ހުރި އިޖްތިމާއީ އަދި އިގްތިޞާދީ މައްސަލަތައް ސަރުކާރަށް މަޖިލިސް ތެރެއިން ވަކާލާތުކޮށް ބަހުސްކޮށް ހައްލުކޮށްދޭން ކަމަށްވެސް ވައްޑެ ވާހަކައިގައި ފާހަގަކުރެެއްވިއެވެ.
