އިނގިރޭސި ބަހުން ވާހަކަ ދައްކަން ނޭނގުމަކީ މައްސަލައެއް ނޫނެވެ. އިނގިރޭސި ބަސް ނޭނގުމަކީ އެމީހާގެ އިލްމާއި ހިލްމު އަދި ގާބިލުކަން ވަޒަން ކުރެވޭނެ ކަމެކޭވެސް ދަންނަވާކަށް ނެތީމެވެ. އިނގިރޭސިއަކީ މީޑިއަމް އެކެވެ. އަރަތްބާއި ހިންދީނުވަތަ އެނޫންވެސް ބަސްތައް ނޭނގުމަކީ މައްސަލައަކަށް ނުވާ ފަދައިން އިނގިރޭސި ބަސް ނޭނގުމަކީވެސް މައްސަލައެއް ނޫންތާ އެވެ.

ސަރުކާރުގެ އިސް ވެރިޔަކު އިންޑިއާއަށް ވަޑައިގެން އިނގިރޭސިން ވާހަކަ ނުދައްކަނީ އެބަހުން ވާހަކަ ދައްކަން ނޭނގޭތީ އެވެ. ސައުދީ އަރަބިއްޔާފަދަ އަރަބި ގައުމުތަކަށް ގޮސް އަރަބި ބަހުން ވާހަކަ ނުދައްކަނީވެސް އެބަސް ނޭނގޭތީ އެވެ. އެއީ މައްސަލައެއްވެސް ނޫނެވެ. އެކަމާއި މީހަކު ޝަކުވާއެއްވެސް ނުކުރާނެ އެވެ.

އަލިއަޅުވައިލަން މިއުޅެނީ އދ ގެ ސަސްޓެއިނިބިލިޓީ ވީކްގައި ބައިވެރިވެވަޑައިގެން ޓޫރިޒަމް މިނިސްޓަރު އިބްރާހިމް ފައިސަލް ދެއްވި ސްޕީޗަށެވެ.

"ދަ އިމްޕެކްޓްސް އޮފް.. މައި ޑެލިގޭޝަން އެމްޕަސަސިސިސް ދަ ކްރިޓިކަލް ރޯލް އޮފް މަލްޓިރޭޓަރަލް އެކްޝަންސް އެންޑް ކޯޑިނޭޝަން އިން އެޑްރެސިންގް ދަ ގްލޯބަލް ޑެޓް ކްރައިސިސް" މި ޖުމްލައިގައި އިނގިރޭސި ބަހުން ފައިސަލް އެ ވިދާޅުވެދެއްވަން މަސައްކަތް ކުރައްވަނީ ރާއްޖެއިން އދ ގައި އަޑު އުފުލާ ކަމެއްގެ ވާހަކަ އެވެ.

މިނިސްޓަރު ފައިސަލްގެ މުޅި ސްޕީޗު އަޑުއަހައިލިއިރު ފަހުމް ނުވި އެތައް ވާހަކަތަކެއް ދައްކާފައި އެބަހުއްޓެވެ. ދެވަނަ ފަހަރަށް ނުވަތަ ތިންވަނަ ފަހަރަށް ވަރަށް ވިސްނައިގެން އަޑުއެހުމުން ވިދާޅުވި ބަހާއި ވައްތަރު ބަހެއް ޖުމްލައަށް ލައިގެން އޭގެ މާނަ ދޭހަވެ އެވެ.

ކުރިންވެސް ފާހަގަކުރި ގޮތަށް މައްސަލައަކީ ފައިސަލްއަށް އިނގިރޭސިން ވާހަކަދައްކަން ނޭނގުމެއް ނޫނެވެ. އދ ފަދަ ބައިނަލްއަގުވާމީ މަޖިލީހެއްގައި އިނގިރޭސި ބަސް ނޭނގި ހުރެ އެބަހުން ވާހަކަ ދެއްކުމެވެ. މިފަދަ މަޖިލިސްތަކުގައި ދިވެހި ބަހުންވެސް ސްޕީޗު ދެވޭނެ އެވެ. ބައްދަލުވުމުގައި ބައިވެރިވެވަޑައިގަންނަވާ އެހެން ފަރާތްތަކުގެ ކަންފަތުގައި އަޅާފައިވާ ހެޑްސެޓުތަކަށް އެ ސްޕީޗު އޭރުން ދާނީ އިނގިރޭސި ތަރުޖަމާއެއްގެ ގޮތުގަ އެވެ.

ދަންނަވަން މިއުޅޭ ވާހަކަ އެހެން މިސާލަކުން ތިލަކޮށްލާނަމެވެ. ޗައިނާގެ ރައީސް ރާއްޖެ ވަޑައިގަންނަވާ ކޮންމެ ފަހަރަކު ސްޕީޗު ދެނީ ޗައިނާ ބަހުންނެވެ. އެކަމަކު އެ ވިދާޅުވާ އެއްޗެއް އަހަރުމެންނަށް އިނގޭނެހެން އިނގިރޭސި ބަހުން ވިދާޅުވެދޭން ތަރުޖަމާނަކު ހުރެ އެވެ. ޗައިނާ ރައީސްގެ ތައުލީމީ ގާބިލުކަމާއިމެދު އެއްވެސް މީހަކު ސުވާލެއް ނުއުފައްދަ އެވެ. އަދި އެކަމަށް ޖޯކެއްވެސް ނުޖަހަ އެވެ. އެކަމަކު ޗައިނާގެ ރައީސް އިނގިރޭސި ބަސް ނޭނގި ހުރެ އެބަހުން ސްޕީޗެއް ދެއްވާނަމަ އެކަން ޖޯކަކަށް ވާނެ އެވެ.

ދެންވެސް އޮތީ ބަހުސް ކުރެވިދާނެ މައުޟޫއެކެވެ. ރާއްޖޭގެ ސްކޫލުތަކުގައި އިނގިރޭސި މާއްދާއަކީ މަޖުބޫރު މާއްދާ އެކެވެ. އިނގިރޭސި ނޭނގުމަކީ މައްސަލައަކަށް ނުވާނަމަ އެމާއްދާއިން ފެއިލްވާ ދަރިވަރަށްވެސް ޓޮޕް ޓެންއަށް ދެވެން ޖެހޭނެ އެވެ. އެކަމަކު އެހެނެއް ނުވެ އެވެ. ސަރުކާރުގެ ގިނަ ވަޒީފާތަކައް މީހުން ނަގާއިރު އިނގިރޭސި ބަހުން ފާސްވެފައިވުން ލާޒިމް ކުރެ އެވެ. މީގެންވެސް އިނގިރޭސި ބަސް އެނގުމުގެ މުހިންމުކަން ހާމަވެ އެވެ. އިނގިރޭސިއަކީ ދިވެހިރާއްޖޭގައި ދެވަނަ މީޑިއަމް އެވެ. ބައިނަލްއަގުވާމީ ގޮތުން މިހާ ބޮޑަށް ގުޅިފައިވާ ދުވަސްވަރެއްގައި އިނގިރޭސި އެނގުން މުހިންމުވެ އެވެ. ހާއްސަކޮށް ފަތުރުވެރިކަމާއިބެހޭ ވަޒީރަށް އިނގިރޭސި އެނގުމަކީ ޝަރުތަކަށްވެސް ވާން އެބަ ޖެހެ އެވެ.

ރައީސް ޑރ. މުހައްމަދު މުއިއްޒު ވިދާޅުވީ އެމަނިކުފާނުގެ ކެބިނެޓުގައި ހިމެނިވަޑައިގަންނަވާނީ ތައުލީމީ ގާބިލު ބޭފުޅުން ކަމަށެވެ. އެހެންނަމަވެސް މިއަދު މި ފެންނަ މަންޒަރުތަކާއި އިވޭ އަޑުތަކުން ދިވެހިން ތިބީ އިންތިހާއަށް ލަދުގެންފަ އެވެ. ތައުލީމީ ގޮތުން މިހާ ކުރިއަރާފައިވާ ދުވަސްވަރެއްގައި ގްރޭޑު 5 ނިންމާ ދަރިވަރަށްވެސް މިނިސްޓަރަށްވުރެއް ރަނގަޅަށް އިނގިރޭސިން ވާހަކަ ދައްކަން އެނގޭނެ އެވެ.