ވަށަފަރު ސިޓީ ހަޮޓަލާއި ގުޅޭގޮތުން ޓޫރިޒަމް މިނިސްޓްރީން އަމަލުކުރަމުންދާ ގޮތް ކުށްވެރިކޮށް މުޒާހަރާކޮށްފިއެވެ.

"ތޭރައޮންލައިން" އަށް މައުލޫމާތު ލިބުނުގޮތުގައި މުޒާހަރާކޮށްފައި ވަނީ އެ ރަށުގެ އާންމު ރައްޔިތުންނެވެ.

ވަށަފަރުގައި ސިޓީ ހޮޓަލެއް ތަރައްގީ ކުރުމަށް ރަށުގެ އެންމެ ރީތި ސަރަހައްދު ކަމަށްވާ ހުޅަނގުކޮޅުން 300000 (ތިންލައްކަ) އަކަފޫޓުގެ ބިމެއް (ރަށުގެ ތިންބައިކުޅަ އެއްބައި ވަރުގެ ބޮޑު ބިމެއް) ދޫކޮށްފައި ވަނީ މީގެ ދިހަވަރަކަށް އަހަރު ކުރިންނެވެ.

ސިޓީ ހޮޓާ ތަރައްގީ ކުރުމަށް ވަށަފަރު ކައުންސިލާއި ހއ.ހޯރަފުށި / ސޯސަންމާގެ ޠަލްހަތު ރަޝީދު އާއި ދެމެދު 60 މަސްދުވަހުން (5 އަހަރުން) މަސައްކަތް ނިންމާގޮތަށް އެއްބަސް ވުމުގައި ސޮއި ކޮށްފައި ވަނީ 2014 ވަނަ އަހަރުގެ އޮކްޓޯބަރ މަހުގެ 23 ވަނަ ދުވަހުއެވެ.

ސިޓީ ހޮޓާ ނިންމައި އޮޕަރޭޝަން ފައްޓަން ކަނޑައެޅި މުއްދަތުގެ އިތުރުން ފަސް އަހަރު އަންނަ އޮކްޓޯބަރ މަހުގެ 23 ވަނަ ދުވަހު ހަމަވާއިރު އެތަނުގެ އަމަލީ މަސައްކަތް ނިމިފަވަނީ ކިހާ މިންވަރަކަށްތޯ ސުވާލު ކުރުމުން ވަށަފަރު ކައުންސިލް އިން ބުނީ އެތަނުގައި އަށް ބޮލްކެއްގެ ކޮންކްރީޓް މަސައްކަތް ނިންމައި ފުރާޅު އެޅުން ފިޔަވައި މާގިނަ މަސައްކަތްތަކެއް ކޮށްފައި ނުވާ ކަމަށެވެ.

އެތަނުގެ މަސައްކަތް މިހާރު އެއްގޮތަކަށް ވެސް ނުކުރާތާ ތިންވަރަކަށް އަހަރު ވެދާނެކަން ފާހަގަ ކުރަމުން ކައުންސިލުން ބުނީ މިވަގުތު އެތަނުގައި ތިބީ އެންމެ ދެ މުވައްޒަފުން ކަމަށާއި، ގަބޫލުކުރެވޭ ގޮތުގައި އެއީ އެތަން ބަލަހައްޓަން ތިބޭ ދެ މީހުން ކަމަށެވެ.

ސިޓީ ހޮޓާ ތަރައްގީ ކުރުމަށް ބޭނުންވާ ސާމާނު ގުދަން ކުރުމަށާއި އަދިވެސް އެ ޕްރޮޖެކްޓް ހިންގުމަށް ބޭނުންވާ ސާމާނު ބެހެއްޓުމަށް ސިޓީ ހޮޓާ އަޅާ ސަރަހައްދުން 35000 (ތިރީސްފަސްހާސް) އަކަފޫޓުގެ ބިމެއް ކައުންސިލުން ކޮންޓްރެކްޓާއަށް ހިލޭ ދޫކުރިއެވެ.

ވަށަވަރުގައި ސިޓީ ހޮޓާ ހަދަން ހަވާލުކޮށްފައިވާ ބިމަކުން ކައުންސިލަށް ލިބެންޖެހޭ ފައިސާއަށް ''މިނިސްޓްރީން އަތްގަދަ'' ކުރަންޖެހޭ ސަބަބެއް އެއް ގޮތަކަށް ވެސް ނުވިސްނޭ ކަމަށް އެ ރަށު ރައްޔިތުންވެސް މުޒާހަރާގައި ވަނީ ބުނެފައެވެ.

މި ކަންބޮޑުވުންތަކާއި ގުޅިގެން ވަށަފަރު ކައުންސިލުން އިއްޔެ ވަނީ ނޫސް ބަޔާނެއް ވެސް ނެރެފައެވެ. އެ ބަޔާނުގައި ބުނެފައި ވަނީ ސިޓީ ހޮޓަލާއި ގުޅޭގޮތުން ކައުންސިލާއި ރައްޔިތުންނާއި ބައްދަލުކޮށް މައުލޫމާތު ދެއްވުމަށް އެދި މިނިސްޓްރީ އޮފް ޓޫރިޒަމްގައި އެކިފަހަރު މަތިން އެދެވިފައި ކަމަށެވެ.

އެގޮތުން މި އަހަރުގެ މާޗް މަހުގެ 10 ވަނަ ދުވަހު ޓޫރިޒަމް މިނިސްޓްރީގައި ބޭއްވުނު ބައްދަލުވުމުގައްޔާއި ޖުލައި މަހުގެ 31 ވަނަ ދުވަހު އޮންލައިންކޮށް ބޭއްވުނު ބައްދަލުވުމުގައި އެކަމަށް އެދިފައި ވާނެ ކަމަށާއި އަދި އޮގަސްޓް 8 ވަނަ ދުވަހު ސިޓީއަކުން ވެސް އެދިފައިވާނެ ކަމަށް އެ ބަޔާނުގައި ބުނެފައިވެއެވެ.

މީގެ އިތުރުން މި މަހު 16 ވަނަ ދުވަހު ކައުންސިލުން ރައްޔިތުނާއި ބޭއްވި ބައްދަލުވުމުގައި މި މައްސަލައާއި ގުޅޭގޮތުން މައުލޫމާތު ދިނުމަށް މިނިސްޓްރީއަށް ވެސް ދައުވަތު އެރުވިފައި ވާނެ ކަމަށާއި ނަމަވެސް ސިޓީ ހޮޓާ މައްސަލައާއި ގުޅިގެން ކައުންސިލުން ފޮނުވި އެއްވެސް ސިޓީއަކަށް ޓޫރިޒަމް މިނިސްޓްރީން ޖަވާބު ދެއްވާފައި ނުވާކަމުގައި އެ ބަޔާނުގައި ބުނެފައިވެއެވެ.

އެއްވެސް ސިޓީއަކަށް ޖަވާބުނުދީ ރައްޔިތުންނާއި ކައުންސިލްގެ ބާރު ކަނޑުވާލައި މި ޕްރޮޖެކްޓާއި ގުޅިގެން މިނިސްޓްރީއާއި ކައުންސިލާއި ދެމެދު ހަދާފައިވާ އެމްއޯޔޫއަށް ބަދަލު ގެނައުމަށް މިނިސްޓްރީން މަސައްކަތް ކުރަމުންދާތީ އެކަން ހަރުކަށި އިބާރާތުން އެ ބަޔާނުގައި ވަނީ ކުށްވެރި ކޮށްފައެވެ.