ރައީސް އަބްދުﷲ ޔާމީންގެ ޒައާމަތުގައި ތަރައްގީކޮށްދެއްވަން ފެއްޓެވި ކާގޯ ޓާމިނަލް ހުޅުވަން ތައްޔާރުވެއްޖެއެވެ.

މިކަމާ ގުޅިގެން ވެލާނާ އެއާޕޯޓު ބަލަހައްޓާ، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ހާމަކޮށްްފައިވާ ގޮތުގައި އެ ޓާމިނަލްގެ މަސައްކަތް މިހާރު އެއްކޮށް ނިމިފައިވާ ކަމަށާ އެތަން ހުޅުވުމަށް މިއަދު ހަވީރު ހާއްސަ ރަސްމިއްޔާތެއް ބޭއްވުމަށް ނިންމާފައިވާ ކަމަށެވެ.

އާ ކާގޯ ޓަމިނަލް ހުޅުވާދެއްވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށްވެސް އެމްއޭސީއެލްއިން ވަނީ ހާމަކޮށްފައެވެ.

ރައީސް ޔާމީން ރާއްޖޭގެ މަިއ އެއާޕޯޓު ވެލާނާ އިންޓަރނޭޝަނަލް އެއާޕޯޓަށް ގެންނެވި ތަރައްގީގެ ބޮޑު ބިޔަ މަޝްރޫއުގެ ތެރޭގައި ހިމެނޭ އައު ކާގޯ ޓާމިނަލްގެ މަޝްރޫއަކީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕު (ބީޔޫސީޖީ) އާ ހަވާލުކޮށްގެން ކުރިއަށްގެންދިޔަ އެ މަޝްރޫއެކެވެ. އެ މަޝްރޫޢު ބިންގާ އެޅީ 2018 ވަނަ އަހަރުގެ ޖެނުއަރީ މަހުއެވެ.

އައު ޓާމިނަލްއަކީ މިހާރު ބޭނުންކުރާ ކާގޯ ޓާމިނަލަށްވުރެ ގާތްގަނޑަކަށް ތިން ގުނަ ބޮޑު ތަނަވަސް ޓާމިނަލްއެކެވެ. އެތަނުގައި އެއް ފަހަރާ 12،0000 މެޓްރިކް ޓަނުގެ ކާގޯ ރައްކާ ކުރެވޭނެ ޖާގަ އޮންނާނެއެވެ.

ރައީސް ޔާމީން ވީއައިއޭ ތަރައްގީކުރުމަށް ފެއްޓެވި ބިޔަ މަޝްރޫއުގެ ތެރޭގައި އައު ކާގޯ ޓާމިނަލުގެ އިތުރުން އައު ރަންވޭގެ މަސައްކަތާއި، ފިއުލްފާމްގެ މަސައްކަތް ވެސް ހިމެނެއެވެ. އޢެގެ ތެރެއިން އައު ރަންވޭ މިހާރު ވެސް ބޭނުންކުރަމުން ދާއިރު އައު ފިއުލް ފާމްގެ މަސައްކަތް ވެސް މިހާރު ވަނީ ނިމުމަކާ ގާތްވެފައިކަން ފާހަގަކޮށްލެވެއެވެ.