ރައީސް އަބްދުﷲ ޔާމީން އަބްދުލްގައްޔޫމްގެ ފަރާތްޕުޅުން ދިވެހިރާއްޖޭގެ ހައިކޯޓަށް ހުށަހަޅާފައިވާ އިސްތިއުނާފް މައްސަލައިގެ ހުކުމް އިއްވުން މާދަމާ އަށް ތާވަލްކޮށްފިއެވެ.

ދިވެހިރާއްޖޭގެ ހައި ކޯޓްގެ މީޑިޔާ އޮފިޝަލް ވިދާޅުވީ ހުކުމް އިއްވާނީ މާދަމާ ގެ މެންދުރުކަމަށެވެ.

ރައީސް ޔާމީންގެ އިސް ގާނޫނީ ވަކީލް ޑރ މުހައްމަދު ޖަމީލް އަހްމަދު ވެސް ވަނީ ޗެނަލް 13 އަށް ކަށަވަރުކޮށްދީފައެވެ.

އެމަނިކުފާނުގެ ގާނޫނީ ޓީމްގައި ހިމެނިވަޑައިގަންނަވާ އުސްތާޒް އާދަމް ޝަމީމްވެސް ވަނީ މާދަމާގެ މެންދުރު ވަގުތެއްގައި ރައީސް ޔާމިންގެ އިސްތިއުނާފް މައްސަލައިގެ ހުކުމް އިއްވާނެ ކަމަށް އެކްސްގައި ޕޯސްޓްކުރައްވާފައެވެ.

ރައީސް ޔާމީންގެ އިސްތިއުނާފް މައްސަލައިގެ އެންމެ ފަހުގެ އަޑުއެހުމެއް ބާއްވާފައި ވަނީ މިދިޔަ އަހަރުގެ ނޮވެމްބަރު މަހުގެ 21 ވަނަ ދުވަހުއެވެ.

އެދުވަހު ދެން އޮންނާނީ ހުކުމް އިއްވުމުގެ އަޑުއެހުން ކަމަށް ފަނޑިޔާރުންގެ ބެންޗުން އިއުލާން ކުރި ނަމަވެސް ހުކުމް ނީއްވާ އެތައް ދުވަހެއް ވަނީ ފާއިތުވެފައެވެ.

ރައީސް ޔާމިން މިނިވަންކޮށްދެއްވާނެ ކަމަށް ވިދާޅުވެ ވެރިކަމަށް އައި ވެރިޔާ އެމަނިކުފާނުގެ ޝަރީއަތްތަކަށް ނުފޫޒު ފޯރުވަމުންގެންދާކަމަށް ގިނަ ފަރާތްތަކުން އަންނަނީ ބުނަމުންނެވެ.