ރައީސުލްޖުމްހޫރިއްޔާ ޑރ.މުހައްމަދު މުއިއްޒު މާލޭ ސިޓީގެ މޭޔަރުކަމަށް އޭރު އިންތިޚާބުވެވަޑައިގަތުމުން އަމާޒު ބެހެއްޓެވީ އެހެންދިމާލަކަށް ކަމަށާއި މިއަދު އެކަން ރައްޔިތުންނަށް ސާފުވެއްޖެ ކަމަށް ރައީސް ޔާމީންގެ ތާއިދާއެކު މާލޭ ސިޓީގެ މޭޔަރުކަމަށް ކުރިމަތިލައްވާ ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވެއްޖެއެވެ.
ހުސައިން މިފަދައިން ވިދާޅުވެފައިވަނީ ސަންގު ޓީވީ މޭޔަރ ބަހުސްގައި، ބަހުސްކުރައްވަމުންނެވެ.
އެގޮތުން ހުސައިން ވިދާޅުވީ މާލޭގެ މަގުތަކުގައި ވަޅުލެވިފައި ހުންނަ ހޮޅިތަކުގެ ސަބަބުންވާ އުނދަގޫތަކާއި މާލޭގެ މަގުތައް ހެދުމަށްޓަކައި ރައީސް މުއިއްޒު އޭރު މޭޔަރު ކަމަށް ކުރިމަތި ލައްވަމުން ހެއްދެވި މެނިފެސްޓޯގައި ހިމެނުއްވިކަމަށެވެ.
ނަމަވެސް ފަހުން އެ މެނިފެސްޓޯގައި ހިމެނުއްވި ކަންކަން ކުރައްވަން ހަނދުމަފުޅު ނެތި މޭޔަރ ކަން ލިބުމުން އެހެން ދިމާލަކަށް މަންޒިލް ބެހެއްޓެވިކަމަށް ވެސް ހުސައިން ވިދާޅުވިއެވެ.
"2021 ވަނަ އަހަރު މެނިފެސްޓޯއެއް އެކުލަވާލި.. އެހެންނަމަވެސް މޭޔަރު ކަމަށް އިންތިޚާބުވެވަޑައިގަތުމަށްފަހު އަމާޒު ބެހެއްޓެވީ އެހެން ކަމަކަށް" ހުސައިން ވަހީދު ވިދާޅުވިއެވެ.
އޭގެއިތުރުން ހުސައިން ވިދާޅުވީ މާލޭގެ މަޖީދީ މަގުގެ އިތުރުން ވަރަށް ބައިވަރު މަގުތަކެއް ރައީސް އަބްދުﷲ ޔާމީން އަބްދުލްގައްޔޫމްގެ ޒައާމަތުގައި ހަދާފައިވާކަމަށެވެ.
އަދި ހުސައިން މޭޔަރު ކަމަށް ހޮވިއްޖެނަމަ މާލޭ ސިޓީގެ މަގުތަކުގެ ހާލަތު ރަނގަޅު ކުރުމަށްޓަކައި ގިނަގުނަ ކަންކަން ކޮށްދެއްވާނެކަމަށްވެސް ބަހުސްކުރައްވަމުން ފާހަގަކުރެއްވިއެވެ.
