ގައުމުގެ ހާލަތު އޮތްގޮތުން މިއަދު ރައްޔިތުންނަށް ހަމަޖެހިލައިގެން ނިދުމުގެ ފުރުސަތު އެބައޮތްތޯ އައްސަވާ ކުރީގެ ކޮމިޝަނަރ އޮފް ޕޮލިސް ހުސައިން ވަހީދު، ދިވެހި ސިފައިންގެ ހިދުމަތައް ވަރުގަދަ ސުވާލެއް އަމާޒުކުރައްވައިފި އެވެ.

ހުސައިން މިފަދައިން ވިދާޅުވެފައި ވަނީ ހޯމަ ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަ ދައްކަވަމުންނެވެ.

އުތުރު ތިލަފަޅުގެ އެއްބަސްވުން ހާމަކުރާނެކަމުގެ ވައުދާއެކު ވެރިކަމަށް އައުމަށްފަހު އެ އެއްބަސްވުން ހާމަނުކޮށް، އެތަނުގައި އިންޑިޔާގެ ސިފައިން ގާއިމްކޮށްފައިވާތީ ހުސައިން ވަނީ ވަރަށް ބޮޑަށް ކަންބޮޑުވުން ފާޅުކުރައްވާފައެވެ.

އެގޮތުން ހުސައިން ވިދާޅުވީ ދިވެހިރާއްޖެއަށް ހޮވޭ ރައީސުލްޖުމްހޫރިއްޔާއަކީ ދިވެހިރާއްޖޭގެ މިނިވަންކަމާ، ސިޔާދަތާ އިސްތިގުލާލަށް،އުނިކަން ،ލިބޭނެގޮތައް ކަންކަން ކުރަން ލައިސަންސް ލިބިފައިވާ މީހެއް ނޫންކަމަށެވެ.

ރައީސް ކުރައްވާ ކަންކަމުގައި ދިފާއީ ބާރުން ނޫނެކޭ ބުނަންޖެހޭ ވަގުތުތަކުގައި ނޫނެކޭ ބުނަން ޖެހޭނެކަމަށް ވެސް ހުސައިން ވިދާޅުވި އެވެ. އެގޮތައް އެކަން ނުކުރެވޭ ކަމުގައިވަންޏާ ދިވެހިރާއްޖޭގެ ޓެކްސް ޕޭޔަރުންގެ ފައިސާ ބޭނުން ނުކުރުމަށް ހުސައިން ވަނީ ސިފައިންނަށް ގޮވާލާފައެވެ.

އޭގެއިތުރުން ހުސައިން ވިދާޅުވީ މިހާރު އޮތް އެންމެ ބޮޑު ބިރަކީ، ރައީސް މުއިއްޒު އެއްބަސްވުމެއްގައި ސޮއިކޮށް ގައުމުގެ ސިފައިންގެ މައި މަރުކަޒު އެހެން ބަޔަކަށް ދީފާނެކަމުގެ ބިރުކަމަށެވެ. މިކަން ނުވާނެކަމުގެ އެއްވެސް ގެރެންޓީއެއް ކަން މިވާގޮތުން ނެތްކަމަށް ވިދާޅުވެ ހުސައިން ވަނީ ވަރަށް ބޮޑަށް ފާޑުވިދާޅުވެފައެވެ.

އޭގެއިތުރުން ހުސައިން ވަނީ ސިފައިންނަށް މަޑުން ނުތިބެ ކަންކަން ހާމަ ކުރުމަށް ގޮވާލަފައެވެ. ރައީސް ގޯސްކަމެއް ކުރަންޏާ އެކަން ހުއްޓުވުމަށް ވެސް ހުސައިން ގޮވާލެއްވެވިއެވެ.