ނިމިދިޔަ އިބްރާހިމް މުހައްމަދު ސޯލިހުގެ ސަރުކާރަށް ތަރައްގީއެއް ނުގެނަސްދެވުނު ކަމަށް ކުރީ ގެ ކޮމިޝަނާ އޮފް ޕޮލިސް ހުސެއިން ވަހީދު ވިދާޅުވެއްޖެއެވެ.

ހުސެއިން މިފަދައިން ވިދާޅުވެފައި ވަނީ ކުރިއަށް މިއޮތް ރައްޔިތުން މަޖިލިސް އިންތިހާބުގައި ރައީސް ޔާމީން އަލަށް އުފައްދަވާ ޕާޓީ ޕީއެންއެފްގެ ފަރާތުން ވާދަ ކުރައްވާ ކެންޑިޑޭޓުން ތައާރަފް ކުރުމަށް ބާއްވަމުންދާ ސިލްސިލާ ޖަލްސާތަކުގެ ތެރެއިން ބުރާސްފަތި ދުވަހު ބޭއްވި ޖަލްސާގައި ކެންޑިޑޭޓަކާ ސުވާލު ކުރަމުންނެވެ.

ހުސެއިން ވިދާޅުވީ 5 އަހަރުގެ ދައުރެއް ނިމިގެން ގޮއްސި ކަމަށާއި އެހެންނަމަވެސް ކޮޅަށް ޖެހުނު އިމާރާތެއް ނެތް ކަމަށާއި ފެށި ޕްރޮޖެކްޓް ތަށް ވެސް ލޯމައްޗަށް ފެންނަން ނެތް ކަމަށެވެ.

އެހެންނަމަވެސް ރާއްޖޭގެ ހުރިހާ މީޑިއާ ތަކެއް މެދު ވެރިކޮށް ކުރީ ސަރުކާރުން ދިޔައީ ވަރަށް ބައިވަރު ތަރައްގީގެ މަޝްރޫތަކެއް ހިންގާ ކަމުގެ މައުލޫމާތާ ދިވެހި ރާއްޖެ ކުރިއަރަމުން އަންނަ ކަމުގެ ވާހަތައް މީޑިއާ މެދުވެރި ކޮށް ރައްޔިތުން ގާތު ބުނަމުން ކަމަށް ހުސެއިން ވަނީ ވިދާޅުވެފައެވެ.

މީގެ އިތުރުން ހުސެއިން ވިދާޅުވީ މިހާރު މި ސަރުކާރުން ވެސް މި ފެންނަނީ ހަމަ ކުރީ ސަރުކާރުގެ މޮޑެލް ގެންގުޅޭ ތަން ކަމަށެވެ. އެގޮތުން ހަމަ ކުރިއެކޭ އެއްފަދައިން މި ސަރުކާރުން ވެސް ދަނީ މީޑިއާތަކުގައި ވަރަށް ބައިވަރު މަސައްކަތް ކުރަމުން ދާކަމަށް ބުނަމުން ކަމަށާއި ހަގީގަތުގައި އެއްވެސް ކަމެއް ކުރީ ސަރުކާރެކޭ އެއްފަދައިން މި ސަރުކާރަށް ވެސް ނުވާ ކަމަށް ހުސެއިން ވަނީ ވިދާޅުވެފައެވެ.