ރައްޔިތުންނާއި އެކު ވެވޭ އެއްބަސްވުން ނުވަތަ "ސޯޝަލް ކޮންޓްރެކްޓް" އަކީ އިންތިޚާބާއި ދިމާކޮށް ވޯޓު ހޯއްދެވުމަށް ހަމައެކަނި ދައްކާ ވާހަކައަކަށް ނެހެއްދެވުމަށާއި ރައްޔިތުންނާއި އެކު މި ވެވޭ އަހުދަށް ރައްކާތެރިވުމަށް ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވެއްޖެއެވެ.

ޕީއެންއެފް ފްރޮންޓް އޮފީހުގައި ސިލްސިލާކޮށް ބާއްވަމުން އަންނަ ޖަލްސާތަކުގެ ތެރެއިން ބުރާސްފަތި ދުވަހުގެ ޖަލްސާގަައި ވާހަކަދައްކަވަމުން ހުސައިން ވިދާޅުވީ ދިވެހިރާއްޖޭގެ ރައްޔިތުންނަށް ދެރަ ގޮތެއް ވާން ދޫކޮށްލެވެން ނެތް ކަމަށާއި އެ ފުރުސަތު އެއްވެސް ބަޔަކަށް ނުދެއްވާނެ ކަމަށެވެ.

މީގެ އިތުރުން، ރާއްޖޭގެ ސިޔާސީ ތާރީޚުގައި ރައްޔިތުން އަމަލުކުރަމުން އައީ އައިޑިއޮލޮޖީ ނުވަތަ ހަރުދަނާ ސިޔާސަތެއް ގެންގުޅޭ މީހެއް ފަހަތުން އުޅެ، އެ މީހެއްހެ ސިޔާސަތު ފަތުރަމުން އެ ސިޔާސަތެއް ވިއްކަމުން އުޅުން ކަމަށާއި އެފަދަ ސިޔާސީ ލީޑަރެއްގެ ގޮތުގައި މި ގައުމު ގަބޫލުކުރައްވާ ބޭފުޅަކީ ރައިސް ޔާމީން ކަމަށް ހުސައިން ފާހަގަކުރެއްވިއެވެ.

އަދި ޕީއެންއެފް އުފެދިގެން އައީ އޭރުގެ ޕީޕީއެމް/ޕީއެންސީ އުފެއްދި ބޭނުމަށް ހީނަރުކަމެއް އައިސްފައިވާ ކަމަށް ގަބޫލުފުޅު ކުރެވުނު ހިސާބުން ކަމަށާއި އޭރު ލީޑަރޝިޕްގައި އުޅުއްވަމުން ގެންދިޔައީ ޕީއެންސީ އުފެއްދި ފިކުރާއި ޚިޔާލާއި ތަފާތުތަކެއް ގެންގުޅުއްވާ ބަޔެއް ކަމަށްވެސް ހާމަކުރެއްވިއެވެ.

ގާނޫނު އަސާސީގައި ސަރީހަކޮށް ބަޔާންކޮށްފައިވާ ގޮތުން ބާރުތައް ފެށި ނިމިގެން ދަނީ ރައްޔިތުންނާއި ހަމައިން ކަމަށާއި ރައްޔިތުންގެ ކެތްތެރިކަން ކޮޅުންލުމުން ކަންތައްވާ ގޮތް އަވަށްޓެރި ގައުމުތަކަށް ނަޒަރު ހިންގާލަމުން ފެނިގެން ދާކަމަށް ހުސައިން ފާހަގަކުރެއްވިއެވެ.

މިއާއިއެކު ސޯޝަލް ކޮންޓްރެކްޓްގެ ތެރޭގައި ހިމެނޭ ކަންތަކުގެ ތެރޭގައި މިނިވަންކަމާއި އެކު ދިރިއުޅުމާއި، އަސާސީ ގޮތުން ލިބެންޖެހޭ ޚިދުމަތްތައް ލިބުމާއި، ޖަވާބުދާރީ ވުމާއި ޖަވާބުދާރީ ކުރުވުމާއި އަދި ސަލާމަތާއި ރައްކާތެރިކަން ލިބުން ފަދަ ކަންކަން ހިމެނޭ ކަމަށް ވިދާޅުވިއެވެ.

އެހެންކަމުން ސަރުކާރުން ހަމަ މަގަށް ތިރިވެ ރައްޔިތުންނާއި އެކު ވެފައިވާ އެއްބަސްވުންތައް ފުރިހަމަކުރުމަށް މަސައްކަތް ކުރުމަށް ހުސައިން ވަނީ ސަރުކާރަށް ގޮވާލާފައެވެ.