ޗީފް އޮފް ޑިފެންސް ފޯސްގެ މަޤާމަށް މިހާރު ވައިސް ޗީފް އޮފް ޑިފެންސް ފޯސްގެ މަގާމުގައި ހުންނެވި މޭޖާ ޖެނެރަލް އިބްރާހީމް ޙިލްމީ މިއަދު ޢައްޔަންކުރައްވައިފިއެވެ. މި މަޤާމަށް އިބްރާހީމް ޙިލްމީ ޢައްޔަނުކުރައްވާފައިވަނީ، އެ މަގާމު އަދާކުރައްވަމުން ގެންދިޔަ ލެފްޓިނެންޓް ޖެނެރަލް ޢަބްދުއްރަޙީމް ޢަބްދުއްލަޠީފް އިއްޔެ މަގާމުން ރިޓަޔަރ ކުރެއްވުމާއި ގުޅިގެންނެވެ.

ޢަބްދުއްލަޠީފް ރިޓަޔަރ ކުރަން ނިންމަވާފައިވަނީ މި ހިނގާ އޭޕްރީލް މަހުގައި އޭނާގެ އުމުރުން 60 އަހަރު ފުރުމާއި އެކުގައެވެ. ސިފައިންގެ މުވައްޒަފެއްގެ ގޮތުގައި ވަޒީފާގައި ދެމިހުރެވޭނީ އުމުރުން 60 އަހަރު ވަންދެން ކަމަށް މޯލްޑިވްސް ނޭޝަނަލް ޑިފެންސް ފޯސްގެ ގާނޫނުގައި ބަޔާންކޮށްފައިވެއެވެ.

 މިއަދު ރައީސް އޮފީހުގައި ބޭއްވި ރަސްމިއްޔާތުގައި ޗީފް އޮފް ޑިފެންސްގެ މަގާމަށް އިބްރާހީމް ޙިލްމީ އައްޔަނުކުރައްވާ، މަގާމުގެ ފަތްކޮޅު ޙަވާލުކުރައްވާފައިވެއެވެ.

މިއާއި އެކުގައި ވައިސް ޗީފް އޮފް ޑިފެންސް ފޯސްގެ މަޤާމަށް ބްރިގޭޑިއާ ޖެނެރަލް އަޙްމަދު ޤިޔާސް ވެސް މިއަދީ އައްޔަނު ކުރައްވާފައެވެ.