ރާއްޖޭގައި މި ވަގުތު ހަރަކާތްތެރިވާ އެހެން ގައުމުތަކުގެ ޖާސޫސުންގެ މައުލޫމާތު އެނގޭ ކަމަށް ޑިފެންސް މިނިސްޓަރު، ޣައްސާން މައުމޫން މިއަދު ވިދާޅުވެއްޖެ އެވެ.

އިންޑިއާ އަދި އެނޫން ބޭރު ގައުމެއްގެ ނަން ވެސް ނުގެންނަވާ ޣައްސާން ވިދާޅުވީ އެ މީހުންގެ ނަންތައް ހާމަކުރުމަކީ ކުރާ ކަމެއް ނޫން ކަމަށެވެ.

މި ސަރުކާރުގެ އިސް ސަފުގައި މިހާރު ތިއްބެވި ވެރިން، މިދިޔަ އެމްޑީޕީ ސަރުކާރުގައި މަގުތަކަށް އެއްވެ އެންމެ ގަދައަށް އަޑުއުފުލި ކަންކަމުގެ ތެރޭގައި އިންޑިއާގެ ޖާސޫސީ ސިފައިން ރާއްޖޭގައި ތިބުމުގެ މައްސަލަ ހިމެނެ އެވެ. "އިންޑިއާ އައުޓް"ގެ ނަމުގައި އެއްވުންތައް އޭރު ބޭއްވިއިރު، އިދިކޮޅުގައި ތިއްބަވައިގެން ވިދާޅުވަމުން ގެންދެވީ އަވައްޓެރި އިންޑިއާގެ ރޯ އޭޖެންޓުން ރާއްޖޭގެ އެކި ތަންތަނުގައި ވަޒީފާ އަދާ ކުރަމުންދާ ކަމަށެވެ.

ޣައްސާން މިއަދު ވަނީ އިންޑިއާ އާއި ރާއްޖެއާ ދެމެދު ގާއިމުކޮށްފައިވާ އެއްބަސްވުންތައް ހާމަ ކުރަން ނުޖެހޭ ކަމަށާއި ސަބަބަކީ އެއީ ކޮންފިޑެންޝިއަލިޓީ ކްލޯސްތަކެއް ހުރި އެއްބަސްވުންތަކެއް ކަމަށް ވެސް ވިދާޅުވެ ފައިއެވެ.

ނަމަވެސް ރައީސް މުއިއްޒު ވެރިކަމަށް ވަޑައިގަތީ ކުރީ ސަރުކާރުން އިންޑިއާއާ އެކު ވެފައިވާ ގޮތް ނޭނގޭ އެއްބަސްވުންތައް ހާމަކުރުމުގެ ވައުދުފުޅާ އެކުއެވެ. އަދި، އިންޑިއާއާއެކު އެމްޑީޕީގެ ވެރިކަމުގައި ނުރައްކާތެރި އެއްބަސްވުންތަކެއް ހަދާފައިވާ ކަމަށް ބޮޑެތި ތުހުމަތުތަކެއް ކުރެއްވެވި އެވެ.

ނަމަވެސް، ވެރިކަމަށް ވަޑައިގެން އަހަރެއްވީއިރު ވެސް އެއްބަސްވުންތައް ހާމަނުކުރާތީ އެ މަނިކުފާނަށް ވަނީ ވަރަށް ބޮޑަށް ފާޑުކިޔުންތައް އަމާޒުވެފަ އެވެ.