ދިވެހިރާއްޖޭގެ ހައި ކޯޓަށް އެމަނިކުފާނުގެ ފަރާތްޕުޅުން ހުށަހަޅާފައިވާ އިސްތިއުނާފް މައްސަލަ ލަސްވުމުން ހައްގުތަކެއް ގެއްލިގެންދިޔަކަމަށާ އަދުގެ ސަރުކާރުންވެސް އެމަނިކުފާނުގެ ޝަރީއަތްތައް ލަސްކުރިކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ އެމަނިކުފާނުގެ މައްޗައް ކްރިމިނަލް ކޯޓުން އިއްވާފައިވާ 11 އަހަރުގެ ޖަލު ހުކުމް ދިވެހިރާއްޖޭގެ ހައި ކޯޓްގައި ބާތިލް ކުރުމުން، ކޯޓުން ނިކުމެވަޑައިގެން ނޫސްވެރިންނަށް ދެއްވި އިންޓަވިޔުގައެވެ.

އެގޮތުން އެމަނިކުފާނު ވިދާޅުވީ އެމަނިކުފާނާ ދެކޮޅަށް ހުށަހަޅާފައި ހުރި ހެކިތަކުގެ މައްޗަށް ބިނާކޮށް މައްސަލަ ސާބިތުނުވާނެކަން ކުރިން ވެސް އެމަނިކުފާނަށް ޔަގީންވެވަޑައިގަނެފައިވާ ކަމަށެވެ.

އިތުރަށް އެމަނިކުފާނު ވިދާޅުވީ އެމަނިކުފާނު އެންމެ ބޮޑަށް ކަންބޮޑުވެވަޑައިގަންނަވަނީ އިސްތިއުނާފުގެ ޝަރީއަތް ލަސްވުމުން ކަމަށެވެ.

ރައީސް ޔާމީން ވިދާޅުވީ ދައުލަތުގެ ވަކީލުން ޝަރީއަތަށް ހާޒިރުނުވެގެން ދެތިން ފަހަރު އަޑުއެހުން ކެންސަލްވެފައިވާ ކަމަށާއި ފަނޑީޔާރުން ގިނަ ދުވަސްތަކެއް ޗުއްޓީގައި ހޭދަކުރެއްވިކަމަށެވެ.

އަދި ރައީސް ޔާމީން ވިދާޅުވީ ޝަރީއަތް ލަސްވުމަކީ މި ސަރުކާރުން ވެސް ބޭނުންވި ގޮތް ކަމަށެވެ. އެހެންނޫންނަމަ މައްސަލަ ލަސްވާ ސަބަބު ހޯދާ މައްސަލަ އަވަސްކުރުމަށް އެބޭފުޅުން އުޅުއްވާނެ ކަމަށް ވިދާޅުވެ އެމަނިކުފާނު ވަނީ ސަރުކާރުގެ އިސްފަޑިއަށް ފާޑުކިޔުން އަމާޒުކުރައްވާފައެވެ.