މަނީ ލޯންޑްރިންގ އާއި ރިޝްވަތު ޤަބޫލުކުރުމުގެ ކުށް ސާބިތުވެ ކްރިމިނަލް ކޯޓުން އިއްވާފައިވާ 11 އަހަރުގެ ޖަލު ޙުކުމް، ހައި ކޯޓުން އިއްޔެ ބާޠިލް ކުރުމުން އެކަމުން ހާމަވެގެންދަނީ ރައީސުލްޖުމްހޫރިއްޔާ ޝަރުޢީ ނިޒާމަށް ނުފޯރުވާކަން ކަމަށް ޕީއެންސީގެ ޗެއަރޕާސަން، އަދި ރައީސްގެ މުޢިއްޒުގެ ސްޕެޝަލް އެޑްވައިޒަރ ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ޢަބްދުއްރަހީމް މިހެން ވިދާޅުވެފައިވިނަމަވެސް ރައީސް ޔާމީންގެ ޝަރީޢަތް އެންމެ ފަހުން ބާއްވާފައިވަނީ 2023 ނޮވެމްބަރު 21 ވަނަ ދުވަހުގައެވެ. މި އަޑު އެހުމަށްފަހު 04 މަސްވެގެންދިޔައިރު ޙުކުމް އިއްވުން ލަސްވެގެން ދިޔުމަކީ ޝަރުޢީ ނިޒާމަށް ނުފޫޒު ފޯރުވާ ކަމުގެ ޙެއްކެކެވެ. އަދި ރައިސް ޔާމީން މިނިވަންކުރުމަކީ ރައީސް މުޢިއްޒުގެ ވަޢުދަކަށް ވާއިރު ސަރުކާރަށް 05 މަސް ވެގެން ދިޔައިރު އެމަނިކުފާނަށް ޙުކުމް ނުކޮށް ލަސްވުމަކީ ސަރުކާރުން ރައީސް ޔާމީން ގެ ޝަރީޢަތް ގަސްތުގައި ލަސްކުރުން ކަމަށް އިދިކޮޅު ފަރާތްތަކުން ދެކެއެވެ.

ރައީސް ޔާމީން މިނިވަންކުރުމަށް އައި ސަރުކާރުން ކަންތައް ކޮށްފައިވަނީ ރައީސް ސޯލިޙްއަށްވުރެ ޢަނިޔާވެރިކޮށް ކަމަށްވެސް ގިނަ ފަރާތްތަކުން ދެކެއެވެ.

ކްރިމިނަލް ކޯޓުން އިއްވާފައިވާ ހައި ކޯޓުން ޙުކުމް ބާޠިލުކުރުމާއި ގުޅިގެން އެމަނިކުފާނުވަނީ މިނިވަންވެފައެވެ. ޢަބްދުއްރަޙީމް އޭނާގެ އެކްސްގައި ކުރައްވާފައިވާ ޕޯސްޓްގައި ﷲ އަށް ޙަމްދުކޮށް ރައީސް މުޢިއްޒުއަށް އޭނާ ވަނީ ޝުކުރު އަދާކޮށްފައެވެ. މީގެ އިތުރުން ދިވެހިރާއްޖޭގެ ކޮންމެ ފަރުދަކަށްވެސް ހަމަހަމަކަމާއިއެކު އިންސާފު ލިބޭނެކަމަށް މުޢިއްޒު ކަށަވަރުކުރައްވާފައިވާ ކަމަށާއި ޝަރުޢީ ދާއިރާއަކީ  މިނިވަންކަމާއިއެކު ޝަރީޢަތް ކުރުމުގެ ފުރުސަތު ލިބިފައިވާ ދާއިރާއެއްކަމަށް އޭނާގެ ޕޯސްޓްގައި ފާހަގަކޮށްފައިވެއެވެ.

ދިވެހި ޤައުމަށް ބޭނުންވަނީ މުޢިއްޒު ފަދަ އަމަލާއި ބަހާ ދިމާވާ ވެރިން ކަމަށް ބުނެފައިވެއެވެ. މި ޕޯސްޓަށް ރައްދު ދެއްވައި އިއްޔެ އެމަނިކުފާނުގެ މައުސޫމުކަން ސާބިތުވެ ރައީސް ޔާމީން ވިދާޅުވެފައިވަނީ މުޢިއްޒުއަށް އަބްދުއްރަޙީމް ޝުކުރު ދެންނެވުން އެއީ މައްސަލައެއް ނޫން ކަމަށާއި ނަމަވެސް އެމަނިކުފާނަށް ލުއި ލިބިފައިވަނީ ސަރުކާރުގެ އިޙްސާންތެރިކަމުގެ ސަބަބުން ނޫން ކަމަށެވެ.

މިއާއިއެކުގައި ކުރީގެ ރައީސް މުޙައްމަދު ނަޝީދުވެސް ވަނީ ރައީސް ޔާމީން އަށް މަރުޙަބާ ވިދާޅުވެ ޕޯސްޓްކޮށްފައެވެ.