MDP aa Ekee Masaikaiy Kuran Thayyaarah Huri Vaahakaeh Nubunan, Baeh Noosthakugai Hury Dhogu: Raees Yameen

އެމްޑީޕީ އާއެކީ މަސައްކަތް ކުރަން ތައްޔާރަށް ހުރި ވާހަކަ އެއް ވިދާޅުވެފައިނުވާނެ ކަމަށާ އެމަނިކުފާނު ވިދާޅުވީ އެމަނިކުފާނު ގަބޫލުކުރާ ނިޒާމެއް ރައްޔިތުންގެ ތެރޭގައި ހަމަޖައްސައިދެވޭތޯ ބަލާ ބަޔަކާ އެކީ މަސައްކަތް ކުރަން ތައްޔާރަށް ހުންނެވި ވާހަކަ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ ފުވައްމުލަކު ސިޓީ އަށް ވަޑައިގެން އެ ސިޓީގެ އެމަނިކުފާނުގެ ސަޕޯޓަރުންނާ ބައްދަލުކުރައްވާ ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ 11 އަހަރުގެ ޖަލު ހުކުމް ދިވެހިރާއްޖޭގެ ހައި ކޯޓުން ބާތިލް ކުރުމާއެކު މީޑިޔާތަކަށް ދިން އިންޓަވިޔުގައި އެމަނިކުފާނު ވިދާޅުވީ ޕާޓީތައް އެއްފަރާތް ކުރުމަށްފަހު މަސައްކަތް ކުރަން މުހިންމީ ރައްޔިތުންނަށްޓަކައިކަމަށެވެ.

އެހެންނަމަވެސް ބައެއް ނޫސްތަކުގައި ޝާއިއުކޮށްފައި ހުރީ އެމަނިކުފާނު އެމްޑީޕީ އާއެކީ މަސައްކަތްކުރަން ތައްޔާރަށް ހުންނެވި ވާހަކަ ކަމަށް ވިދާޅުވެ އެވާހަކަ އަކީ ސީދާ ދޮގެއް ކަމަށް އެމަނިކުފާނު ވަނީ ފުވައްމުލަކުގައި ވާހަކަ ދައްކަވަމުން ވިދާޅުވެފައެވެ.

އަޅުގަނޑުމެންގެ އުޞޫލްތަކެއް ގަބޫލުކުރާ ބައެއް އަޅުގަނޑުމެންގެ ބައި އަތު ހިފައިގެން ސިޔާސީ މަސައްކަތް، ރައްޔިތުންގެ ހައްގުގައި، ދައުލަތުގެ ހައްގުގައި، ކުރަންޏާ އެޔަށް މަރުޚަބާ ދަންނަވަން. އަޅުގަނޑުމެން ނިކުމެފައި މިތިބީ ވަރަށް މިނިވަންކަމާއެކީ، އަޅުގަނޑުމެން ގަބޫލުކުރާ ހަމަތަކެއް އަޅުގަނޑުމެން ގަބޫލުކުރާ ވަހުދުތަކެއް، އަޅުގަނޑުމެން ގަބޫލުކުރާ ނިޒާމެއް، ރައްޔިތުންގެ ތެރޭގައި ހަމަޖައްސައިދެވޭތޯ ބަލަން، އެހެންވީމާ އެކަން ކުރުމުގައި، އެމްޑީޕީއެއް، ޕީޕީއެމްއެއް، އެމްއާރްއެމް އެއް އެހެން ޕާޓީއެއް އަޅުގަނޑުމެން އެޔަކަށް ފަރަގެއް ނުކުރާނަން. އެކަމަކު ދެން އޭގެ މާނައަކީ ލިޔަންވީކީ ނޫން ނޫސްތަކުގައި ރައީސް ޔާމީން ބުންޏޭ މިހުރީ އެމްޑީޕީއާއެކީ މަސައްކަތް ކުރަން ތައްޔާރަށޭ. އެހެނެއް ނޫން އަޅުގަނޑު މި ބުނަނީކީ!!!

- ރައީސް އަބްދުﷲ ޔާމީން އަބްދުލްގައްޔޫމް ވިދާޅުވިއެވެ.

ރައީސް ޔާމީން ވިދާޅުވީ އެމަނިކުފާނު ގަބޫލުކުރާ ހަމަތަކަކާ، ގަބޫލު ކުރާ ވަހުދުތަކަކާ ގަބޫލުކުރާ ނިޒާމެއް ރައްޔިތުންގެ ތެރޭގައި ހަމަޖައްސައިދެވޭތޯ ބަލާ ބަޔަކާ އެކީގައި މަސައްކަތް ކުރަން ތައްޔާރަށް ތިބި ކަމަށެވެ.

އޭގައި އެއްވެސް ޕާޓީއެއް ފަރަގެއް ނުކުރާނެ ކަމަށް އެމަނިކުފާނު ތަކުރާރުކޮށް ވިދާޅުވިއެވެ.