ކުރިޔަށް އޮތް 20 ވަނަ ރައްޔިތުންގެ މަޖިލިސް އިންތިޚާބްގައި ކެލާދާއިރާ އަށް އެމްޑީޕީގެ ޓިކެޓްގައި ވާދަކުރައްވާ އަހުމަދު ޣާލިބް އަށް ރައީސް ޔާމީން ތާއީދު ކުރައްވައިފިއެވެ.

ރައީސް ޔާމީން ޣާލިބް އަށް ތާއިދު ކުރަން ނިންމެވި ވާހަކަ އިއުލާންކޮށްފައިވަނީ ފުވައްމުލަކު ސިޓީ އަށް ވަޑައިގެން އެ ސިޓީގެ އުތުރު ދާއިރާއަށް ޕީއެންއެފްގެ ޓިކެޓްގައި ވާދަކުރައްވާ ޝަރަފްގެ ކެމްޕެއިން ޖަގަހަ ހުޅުވައިދެއްވުމަށްފަހުއެވެ.

އެގޮތުން ރައީސް ޔާމީން ވިދާޅުވީ އެހެން މީހުންނަށް ބޭއިންސާފަކަށް ވިޔަސް އެމަނިކުފާނާ ވަރަށް ގާތުން ހިޔާލު ބަދަލުކޮށް އެމަނިކުފާނުގެ ފައުޖުގައި ޣާލިބް އުޅުއްވާފައިވާތީ ޣާލިބް އަށް ތާއިދު ކުރަން ނިންމައިފިކަމަށެވެ.

ޗެނަލް 13 އަށް މައުލޫމާތު ދެމުން ޣާލިބް ވަނީ ރައީސް ޔާމީން އޭނާއަށް ތާއިދު ކުރާކަން ހާމަކުރީތީ ވަރަށް ބޮޑަށް އުފާކުރާކަމަށް ވިދާޅުވެފައެވެ. އަދި އެމަނިކުފާނަށް ޝުކުރުވެސް އަދާކުރައްވާފައެވެ.

ރައީސް ޔާމީން ވަނީ ޣާލިބަށް ތައުރީފް ކުރައްވާ ޣާލިބް އަބަދުވެސް އެމަނިކުފާނުގެ އެޖެންޑާތަކަށާއި މެނިފެސްޓޯއަށް ތާއިދުކުރެއްވިކަން ފާހަގަކުރައްވާފައެވެ.

ޣާލިބަށް ތާއިދު ކުރަން ނިންމެވީ އެއީ ގާބިލް ޒުވާނަކަށް ވާތީކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ ޣާލިބަކީ އެމަނިކުފާނުގެ އާއިލީ ޒުވާނެއް ނޫން ނަމަވެސް އަދުގެ ރައީސް މުއިއްޒުގެ އާއިލީ ޒުވާނެއްކަމަށެވެ.