އޭޕްރިލް 21 ގައި ބޭއްވިގެންދިޔަ ރައްޔިތުންގެ މަޖިލިސް އިންތިޚާބް ކާމިޔާބު ކުރެއްވީ ސަރުކާރު ހިންގާ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިންނެވެ. މުޅި ތާރިޚު ބަދަލުކޮށްލި ފަހަރެކެވެ.

އިންތިޚާބުގެ ވަގުތީ ނަތީޖާތައް ދައްކާގޮތުން ސަރުކާރު ހިންގާ ޕީއެންސީން ވަނީ މަޖިލީހުގެ 70 ގޮނޑިޔާއެކު ސުޕަމެޖޯރިޓީ ހޯދާފައެވެ. ޕާޓީގެ ތާއީދާއެކު ގޮނޑި ކާމިޔާބު ކުރި ކެންޑިޑޭޓުން ހިމަނައިގެން ސަރުކާރަށް އެއްބާރުލުން ދޭނެ 75 ކެންޑިޑޭޓުން މަޖިލީހުގައި ތިބޭނެއެވެ.

ދެން މިއޮތީ މި ގޮނޑިތައް ސަރުކާރުން ކާމިޔާބު ކުރި ގޮތަކީ ކޮބާއިތޯ ބެލުމެވެ. ހަމަ ގައިމުވެސް ރިޔާސީ އިންތިޚާބު ސަރުކާރުން ކާމިޔާބު ކުރި ގޮތާއި ޚިލާފަށް މިކަން ކުރިކަމަށް ސަރުކާރުގެ ވެރިން އިއްތިފާގުވެޔެވެ.

ރިޔާސީ އިންތިޚާބަށް ސަރުކާރުން ވޯޓު ހޯދީ ރައީސް އަބްދުﷲ ޔާމީން އަބްދުލްގައްޔޫމްގެ ހުސްގޮނޑިޔާ އެމަނިކުފާނުގެ ފޮޓޯ ބޭނުންކޮށްގެންނެވެ. އެމަނިކުފާނު މިނިވަންކޮށްދެއްވާނެ ކަމަށް ވިދާޅުވެ ރައްޔިތުންގެ ވޯޓު ހޯދިއެވެ. ވެރިކަމަށް އައުމަށްފަހު ރައީސް ޔާމީން މިނިވަން ނުކޮށް އެތަެއް ދުވަހެއް ހޭދަކުރުމުން ރައްޔިތުން ރުޅި ގަދަވެ ކިޔަން ފެށީ ވެރިކަން ހޯދީ ހުސްގޮނޑިޔާ ފޮޓޯ ބޭނުންކޮށްގެންނެވެ. ދޮގެއް ވެސް ނޫންތާއެވެ.

އެ ހުސްގޮނޑިޔާ ފޮޓޯ ބޭނުން ކުރަން އޭރުގައި މަޖުބޫރުވީ އަތުގައި ބޭނުން ކުރާނެ އިތުރު އެެއްޗެއް ނެތުމުން ކަން ޔަގީނެވެ. ވެރިކަން ލިބުމާއެކު ލިބުނީ އާރާ ބާރެވެ. ދެން އެހެންވީމާ އެ ހުސްގޮނޑިޔާ ފޮޓޯ ބޭނުން ނުކޮށް ހާސިލް ކުރަން ބޭނުން ކިތަންމެ އެއްޗެއް ހާސިލް ކުރާކަށް ސަރުކާރަށް އުނދަގުލެއް ނުވާނެކަން ޔަގީނެވެ.

މަޖިލިސް އިންތިޚާބަށް ވެގެން ސަރުކާރުން ކެމްޕެއިން ފެށީ ދައުލަތުގެ އެތައް މުދަލެއް ބޭނުންކޮށްގެންނެވެ. އެގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފެއްޓެވީ ރަސްމީ ދަތުރުފުޅުތަކުގެ ނަމުގައި ކެމްޕެއިން ދަތުރުތަކެވެ. ރައްޔިތުންގެ އަރިހަށް ގޮސް އޮއްސާލީ ވައުދު ގޯންޏެކެވެ. ރިޔާސީ އިންތިޚާބުގައި ވެވަޑައިގެންނެވި ވައުދުތައް ނުފުއްދި އެހުރީ މަޖިލީހުން އެއްްބާރުލުން ނުލިބޭތީއޭ ކިޔައި ރައްޔިތުން ގުނބޯ ހެއްދުމުގައި ރައީސް މީހާ ވެސް އުޅުއްވީ އަވަދިނެތިއެވެ.

ދެން އިންތިޚާބް ކައިރިވި ވަރަކަށް ބަހަން ފެށީ ސަރުކާރުން ވަޒީފާތަކެވެ. ވުޖޫދުގައި ނެތް އެތައް ސިޔާސީ މަގާމެއް އުފައްދައިގެން ބަހާލީ ފިކުރެއް ހިޔާލެއްވެސް ނެތިއެވެ. ކީއްކުރަންތޯއެވެ؟ ހަމަ ވޯޓަށެވެ. އެ ސިޔާސީ މުވައްޒަފުންގެ ވޯޓު ހޯދުމަށްޓަކައިއެވެ. އެހާ ހިސާބުން އެމީހުންގެ އާއިލާ ތަކުން ވެސް ވޯޓު ދޭނެއެވެ. ދަރިންގެ ވަޒީފާއަށްޓަކައިއެވެ. ވަޒީފާގެ ބިރަށެވެ.

ކެމްޕެއިނަށް ދައުލަތުގެ ފައިސާ ބޭނުން ކުރިވަރު ހަމަ ދެނެވޮޑިގެންވާނީ ހެއްދެވި ފަރާތެވެ. މިލިއަނުން ބިލިއަނުންނެވެ. ވޯޓުލީ ދުވަހުވެސް ލިސްޓް ހަދައިގެން ވޯޓުލާން ނުދާ ފަރާތްތަކަށް ގުޅާފައި ލާރި ދޭނަމޭ ކިޔާފައި ވޯޓު ލާން ނެރުނެވެ. ވޯޓުލިކަން ޔަގީން ވުމާއެކު އެ ކޮށްލީ ޓްރާންސްފާރއެވެ.

ކޮންމެ މީހަކަށް ހާހުން ލައްކައިން ފައިސާ ބަހާލީ ވޯޓަށެވެ. ރައްޔިތުންގެ ފައިސާއެވެ. ވޯޓު ހަމަ ވިއްކީއެވެ. ވޯޓު ގަތީ ދިވެހީންގެތެރޭ އުޅޭ ދެތިން މޮަޔައިންނެވެ. ދައުލަތުގެ ޚަޒާނާ އޮތްހާ ހިނދަކު އެއްޗެއް ހާސިލް ކުރަން ނުވަތަ ވޯޓު ހޯދާކަށް އެއްކަލަ ހުސްގޮނޑިޔަކާ ފޮޓޯއެއް ބޭނުމެއް ނުވާނެ ނޫންހެއްޔެވެ.

ސަރުކާެރުގެ ވެރިން އެއް ރާގެއްގައި ކިޔާ އަޑުއިވުނެވެ. މިފަހަރު ދެއްކީ ހުސްގޮނޑިޔާ ފޮޓޯއެއް ނޫނޯ، ދައުލަތުގެ ފައިސާޔޯ!