ވޭސްޓް މެނޭޖްމަންޓް ކޯޕްރޭޝަން ލިމިޓެޑް (ވެމްކޯ)ގެ ޑެޕިޔުޓީ މެނޭޖިން ޑިރެކްޓަރުގެ މަގާމަށް ޝަހީދު އިބްރާހިމް އައްޔަންކޮށްފިއެވެ.

ރައީސް މުއިއްޒު މި މަގާމަށް ޝަހީދު އައްޔަންކޮށްފައިވަނީ އަންގާރަ ދުވަހުއެވެ.

ވެމްކޯއަށް އިތުރު ޑީއެމްޑީއެއް އައްޔަންކޮށްފައިވާއިރު މީގެ ކުރިން އެ މަގާމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ ކުރީގެ މެމްބަރު މުހައްމަދު އަބްދުލް ކަރީމް (ރުކުމާ) ވަނީ އައްޔަންކޮށްފައެވެ.

އޭނާ އެމަގާމަށް އައްޔަންކޮށްފައިވަނީ މިދިޔަ ޑިސެމްބަރު މަހުގެ ތެރޭގައެވެ.

ސިޔާސީ މަގާމްތަކަށް މީހުން އައްޔަންކުރުން ނިމުނީ ކަމަށް ރައީސް މުއިއްޒު ވަނީ މީގެ އެތައް މަހެއް ކުރިން ވިދާޅުވެފައެވެ.

ނަމަވެސް މަޖިލިސް އިންތިޚާބާ ދިމާކޮށް ސަރުކާރުގެ ސިޔާސީ އެކި އެކި މަގާމްތަކަށް މީހުން ވަނީ އައްޔަންކޮށްފައެވެ.