ޕީޕަލްސް ނެޝަނަލް ފްރޮންޓް (ޕީއެންއެފް) އަށް ސޮއި ކުރަމުންދާ ފަރާތްތައް ގިނަ ކަމަށް އެ ޕާޓީއިން ބުނެފިއެވެ.

ޗެނަލް 13 އަށް މައުލޫމާތު ދެމުން ޕީއެންއެފްގެ ވަގުތީ ސެކެޓްރީ ޖެނެރަލް މުހައްމަދު މަލީހް ޖަމާލް ވިދާޅުވީ ކޮންމެ ދުވަހަކުވެސް އެކި އެކި ހިސާބުތަކުން ޕީއެންއެފްއާ ގުޅެމުންދާކަމަށެވެ.

ރައީސް ޔާމީން ދެކެ ލޯބިވެވަޑައިގެންނަވާ ފަރާތްތަކާއި އެމަނިކުފާނަށް ތާއިދު ކުރައްވާ ފަރާތްތައް އަދިވެސް މުޅި ރާއްޖޭގައި އެބަތިބި ކަމަށް މަލީހް ފާހަގަކުރެއްވިއެވެ.

ޕާޓީ އަށް ސޮއި ކުރަން ބޭނުންވާ ފަރާތްތަކުން ޕާޓީގެ އިސްކޮށް އުޅުއްވާ ފަރާތްތަކަށް ގުޅުއްވައިގެން ނުވަތަ ޕާޓީ އޮފީހަށް ގޮސްގެންވެސް ސޮއި ކުރެވޭނެކަމަށް މަލީހް ވިދާޅުވިއެވެ.

މަލީހް އިތުރަށް ވިދާޅުވީ ރާއްޖޭގެ އެކި ކަންކޮޅުތަކުގައި ހަމަޖައްސާފައި ހުންނަ ފޯކަލް ޕޮއިންޓުން މެދުވެރިކޮށްވެސް ޕާޓީއަށް ސޮއި ކުރެވޭނެކަމަށެވެ.

ޕީއެންއެފް އުފެއްދުމަށް އިލެކްޝަންސް ކޮމިޝަން އިން ހުއްދަ ދިނުމުން ޖަލްސާ ބާއްވާ ޕާޓީ އިފްތިތާހްކޮށްފައި ވަނީ މި މަހުގެ 9 ވަނަ ދުވަހުއެވެ.

ޖަލްސާ އަށް ސަރުކާރުން ވަނީ އެކި އެކިގޮތް ގޮތުން ނުފޫޒު ފޯރުވާފައެވެ.