މަސްވެރިންނަށް ދޭން ޖެހޭ ފައިސާ އެ ފަރާތްތަކަށް ޖަމާކޮށްދީފައިނުވާ ކަމަށް ބުނެ ސޯޝަލް މީޑިއާގައި އަނެއްކާވެސް މަސްވެރިން ނުރުހުން ފާޅުކުރަން ފަށައިފި އެވެ.
މި އަހަރުގެ ފެބްރުއަރީ މަހުގެ ތެރޭގައިވެސް މަސްވެރިން ވަނީ ފައިސާ ޖަމާނުކޮށްދީގެން ގއ.ކޫއްޑޫގައި ހުއްޓުމެއްނެތި މުޒާހަރާ ކޮށްފައެވެ.
ކުރިއެކޭ އެއްގޮތަށް ފައިސާ ލިބުން ލަސްވެގެން ދާނަމަ އަނެއްކާވެސް މުޒާހަރާއަށް ނުކުންނާނެ ކަމަށް މި ފަރާތްތަކުން ބުނަމުން ގެންދެއެވެ.
މަސްވެރިންނަކީ ނިމިދިޔަ ސަރުކާރުގައިވެސް އަދި މިހާރުގެ ސަރުކާރުގައިވެސް އެންމެ ނިކަމެތިކޮށް ކަންތައްކޮށްދެމުން އަންނަ އެއް ދާއިރާއެވެ. މަސްވެރިންނަށް ޙައްޤު ފައިސާ ހޯދުމަށް ކޮންމެ ފަހަރަކު މުޒާހަރާ ކުރުން ނޫން ގޮތެއް މި ފަރާތްތަކަށް ސަރުކާރުން ހޯދަދޭން އެބަޖެހެއެވެ.
ނިމިގެން ދިޔަ ބޮޑު އިންތިޚާބާއި ދިމާކޮށް ވޯޓަށް ނުފޫޒު ފޯރުވުމަށް ސަރުކާރުގެ ޚަރަދުގައި ބޮޑެތި ޖަރީމާތައް ހިންގަމުން ދިޔަ އިރު، ޙަލާލު މަސައްކަތް ކުރަމުން އަންނަ މިފަދަ ފަރާތްތަކަށް ލިބެންޖެހޭ ޙައްގު އުޖޫރަ ނުދެވި ދިޔުމަކީ ކުރިއަށް އޮތް 05 އަހަރުގައި މަސްވެރިންގެ މުސްތަޤުބަލާއި ދޭތެރޭ ކަންބޮޑުވާ ވަރުގެ މައްސަލައެކެވެ.
