ނޫސްވެރިންނާ ގާތް ގުޅުމެއް ބޭއްވެވުމާއި، ނޫސްވެރިން މިނިވަން ކުރުމަކީ ރައީސް ޑރ. މުހައްމަދު މުއިއްޒުގެ މުހިންމު ވައުދުފުޅެކެވެ.

ގާނޫނު އަސާސީން ކަށަވަރުކޮށްދީފައިވާ ހިޔާލުފާޅުކުރުމުގެ މިނިވަންކަމަށް ހުރަސް ނާޅުއްވާނެ ކަމަށާއި، ރައްޔިތުންނަށް އެ ހައްގު ލިބިދީފައި އޮތުމަކީ، އެމަނިކުފާނުގެ ސަރުކާރުން ޖެހިލުންވާނެ ނުވަތަ ފަސް ޖެހޭނެ ކަމެއް ނޫން ކަމަށްވެސް މީގެ ކުރިން ރައީސް މުއިއްޒު ވިދާޅުވެފައިވެއެވެ.

ނަމަވެސް، ވެރިކަމުގެ ކުރީކޮޅުގައި ނޫސްވެރިންނާ ބައްދަލު ކުރެއްވި ވަރަށްވެސް މިހާރު ނުކުރައްވައެވެ. ވައުދުވެވަޑައިގަތީ ނޫސްވެރިންނާ ނުހަނު ގާތުން މަސައްކަތްކުރެއްވުމަށެވެ. އެ ނޫސްވެރިންނަށް ހުރި ދަތިތަކާ ގޮން ޖެހުންތައް ނައްތާލާ އެންމެ ފުރިހަމަ މިނިވަންކަމެއް ލިއްބައިދޭނެ ކަމުގެ ވައުދެވެ.

ދައްކަން މިއުޅެނީ އެވާހަކައެއް ނޫނެވެ. ރައީސް މުއިއްޒު، ނޫސްވެރިންނާ ބައްދަލު ނުކުރެއްވިނަމަވެސް، ނޫސްވެރިންނަށް މިނިވަންކަން ދެވިއްޖެތޯ އުފެދޭ ސުވާލުގެ ވާހަކައެވެ.

މި ސުވާލު މިއަދު އުފައްދަން މިޖެހުނު ސަބަބެއްވެސް އެބަ އޮތެވެ. އެގޮތުން މިއަދު ނޫސްވތަކުގެ ފަލަ ސުރުހީއަށް ބަލާލުމުން މި ސުވާލު އުފެއްދުން ހަގީގަތުގައިވެސް ޖާއިޒެވެ.

އެގޮތުން، "ދިވެހި ތާރީހުގައި ފުރަތަމަ ފަހަރަށް ނޫސްވެރިންނަށް، ރައީސް އޮފީހަށް ފޯނު ވެއްދުން މަނާކޮށްފި" މި ސުރުޚީއަކީ މިއަދު ނޫސްތަކުގެ ފުރަތަމަ ސަފްހާ ފުރާލި ސުރުހީއެކެވެ.

މިހާ ހިސާބުން ހަނދާނަށް އަންނަނީ ނިމިދިޔަ އަހަރުގެ އޮކްޓޯބަރު މަހުގެ ތެރޭގައި ސޯޝަލް ސެންޓަރުގައި އޭރުގެ އިންތިހާބީ ރައީސް ބޭއްވެވި "ނޫސްވެރިންގެ ގުންޒަރު"އެވެ.

އެއްވެސް ނޫހެއް ތަފާތު ނުކުރާނެ ކަމަށާ ނޫސްވެރިންނަށްސ ހުރި ހުރިހާ ގޮން ޖެހުމެއް ނައްތާލާ އެންމެ ބޮޑަށް ނޫސްވެރިންނަށް މިނިވަން ލިއްބައިދޭނީ އެމަނިކުފާނުގެ ސަރުކާރުގައި ކަމަށް އޭރުގެ އިންތިހާބީ ރައީސް، ޑރ. މުއިއްޒު ވިދާޅުވިއެވެ،

ނަމަވެސް މިއަދު އެމަނިކުފާނު ރައީށްގެ މަގާމަށް ވަޑައިގެން އެމަނިކުފާނުގެ އޮފީހުން ނޫސްވެރިންނާ ބައްދަލުނުކުރައްވާތާ ތިން މަސް ދުވަސް ފަހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް ދެއްވި ހަދިޔާ ވަރަށް ވެސް ސަޕްރައިޒިންއެވެ.

އެ ނޫސްވެެރިންގެ ފޯނު ހިފަހައްޓާ ޕްރެސް ރޫމަށް ނުވެއްދޭނެ ކަމަށް ބުނެ އެންގިއެވެ. ބައެއް ނޫސްވެރިން އެކަމާ ދެކޮޅަށް އަޑު އުފުލުމުން މިއަދު އެކަނި ފޯނު ވެއްދުމުގެ ހުއްދަ ދިނެވެ. ނަމަވެސް ރައީސް އޮފީހުން މިކަން ވެސް އޮޅުވާލަން މަސައްކަތްކުރިއެވެ. އެއީ މީގެ ކުރިންވެސް ކަން އޮންނަ ގޮތް ކަމަށް ބުނެއެވެ. ނަމަވެސް އެއީ ކަން އޮތް ގޮތް ނޫންކަން މި ސަރުކާރުން އެންމެ ބޮޑަށް މަޖިލިސް އިންތިހާބުގައި ޕްރޮމޯޓުކުރި ނޫސްވެރިޔާ އަހުމަދު އަޒާނަށްވެސް އެނގޭނެއެވެ.

މައުލޫމާތު ހޯދައި ލިބިގަތުމަށް ނޫސްވެރިންނަށް މިއަދުވެސް އެތައް ގޮންޖެހުމެއް އެބައޮތެވެ. އިދާރާތަކުން ސައްހަ މައުލޫމާތު ނުދިނުމާއި، މީޑިއާއަށް މައުލޫމާތު ދެއްވަން ތިއްބަވާ ބޭފުޅުން ފޯނަށް ޖަވާބު ނުދެއްވުމަކީވެސް މިނިވަންކަމާއެކު މަސައްކަތްކޮށް، ރައްޔިތުންނަށް ތެދު ޚަބަރު ގެނެސްދިނުމަށް ނޫސްވެރިންނަށް ހުރި ގޮންޖެހުންތަކެވެ.

ދެން އޮތީ ސިޔާސީ ނުފޫޒުގައި ޖެހި، ނޫސްވެރިން ހައްގު ބަސް ބުނަން ފަސްޖެހޭ މައްސަލައެވެ. މިއީ މިއަދު މިނިވަން ނޫސްވެރިކަމަށް އޮތް އެންމެ ބޮޑު ހުރަހެވެ.

ނޫސްވެރިންނަށް ސަރުކާރަށް ފާޑުކިޔައި، ޚަބަރު ގެނެސްދިނުމަކީވެސް، މިއަދުވެސް ފަސޭހަ ކަމެއް ނޫނެވެ. މާލީ އެހީތެރިކަން ލިބުން ފަދަ ސަބަބުތަކާ ހުރެ، ސަރުކާރަށް ފާޑު ކިިޔުމަކީ، ބައެއް ނޫސްތަކުން ކުރަން ބޭނުންވާ ކަމަކަށްވެސް ނުވެއެވެ.

އަދި ސަރުކާރުން ކުރާ ނުރަނގަޅު ކަންކަމުގެ ވާހަކަ ހާމަ ކުރުމަކީ ފަސޭހަ ކަމަކަށްވެސް ނުވެއެވެ.

ނަމަވެސް އަބަދުވެސް ކޮންމެ ކަމެއްގައި ބިރު ފަހަނަ އަޅާ ގޮސްފައި ތިބޭނެ ބަޔަކު ވާނެއެވެ. އޭގެތެރޭގައި ނޫސްވެރިން ވެސް ހިމެނެއެވެ. އެހެންކަމުން ތެދު މައުލޫމާތު، ވަކި ސަތުކާރެއްގެ އުނގަށް ނުވެއްޓި ގެނެސްދޭނެ ނޫސްވެރިން ތިބިއިރު މިއަދު އެ ފަދަ ނޫސްވެރިންތަކަކަށް ހުރަސް އެޅީއެވެ. ފޯނު ހިފެހެއްޓީއެވެ.

ފޯނު ހިފަހައްޓާ ހިނގަން އުޅުނީ ކޮންފަދަ ޖަރީމާއެއްކަން ނޭނގުނެވެ. ކޮންމެ އަކަސް މިއަދު އަތުލީ ފޯނެވެ. މާދަން ނޫސްވެރިންގެ ގަލަން އަތުނުލާނެބާއެވެ؟

މިނިވަން ނޫސްވެރިކަމަށް ޖާގަ ދެނީ މި ސަރުކާރުން މިހެން ކަމަށް ވެދާނެއެވެ. ނުވަތަ މި ސަރުކާރުގެ މިނިވަން ނޫސްވެރިކަމުގެ ސްޓޭންޑަކީ މިއީ ކަމަށް ވެދާނެއެވެ.