ނޫސްވެރިންނަށް މައުލޫމާތު ދިނުމަށް ރައީސް އޮފީހުގައި ބޭއްވުނު ބައްދަލުވުމުގައި ރައީސް އޮފީހުގައި އިސް ތަރުޖަމާނު އިތުރުފުޅު ހެއްދެވުމުން، ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ފާޑުވިދާޅުވެއްޖެއެވެ.

މަލީހް މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

އެގޮތުން އެ ޕޯސްޓްގައި މަލީހް ވަނީ ހީނާ އަށް ނޭނގޭ ވާހަކަތައް ނުދެއްކުމަށް ގޮވާލާފައެވެ.

މަލީހް ވިދާޅުވީ ރައީސް އޮފީހު ތަރުޖަމާނު ކަމަކީ ދެ ބިލް ދޭތެރެއިން ބޭރަށް ނިކުމެލާފަ ތަޅާ އަނގަޔަކަށް ވުރެ ޒިންމާދާރު މަޤާމެއް ކަމަށެވެ.

ސަރުކާރު ތެރޭގައި ހިނގާ ކަންކަން ހީނާ އަށް ނޭނގޭ ކަމަށް ވިދާުވެ މަލީހް ވަނީ ހީނާ އޭނާގެ މަގާމްގެ ޒިންމާތައް ފުރިހަމައަށް އަދާކުރަން ދަސްކުރަން ޖެހޭކަމަށް ވިދާޅުވެ ވަރަށް ބޮޑަށް ފާޑުވިދާޅުވެފައެވެ.

ކަންކަން ހިނގާގޮތް ސާފުވެ ސަރުކާރުގެ ކަންކަން ތަރުތީބުވެފައި އޮންނަ ގޮތްވެސް އޮޅުން ފިލާފައި ހުންނަން ޖެހޭނެ ކަމަށް މަލީހް ވަނީ ހީނާ އަށް އަމާޒުކޮށް ޕޯސްޓްގައި ފާހަގަކުރައްވާފައެވެ.

އޭގެއިތުރުން މަލީހް ވަނީ ހީނާ ކޮންމެވެސް އެއް މަގާމެއް ހިޔާރުކުރެއްްވުމަށް އެދިފައެވެ.

ހީނާ ރައީސް އޮފީހުގެ އިސް ތަރުޖަމާނަކަށް ރައީސް މުއިއްޒު އައްޔަންކުރައްވާފައިވަނީ އެ މަގާމުގެ މުސާރަ ހީނާ އަށް ނުހިނގާ ގޮތަށެވެ. އެއީ އޭނާ އަކީ އެންސްޕާގެ ސީއީއޯކަން ވެސް އަދާކުރައްވާ ފަރާތަކަށް ވާތީވެއެވެ.

ހީނާ ތަރުޖަމާނަކަށް އައްޔަން ކުރެއްވި ފަހުން ބޭއްވިގެން ދިޔަ އެންމެ ފުރަތަމަ ނޫސްވެރިންގެ ބައްދަލުވުމުގައި ވެސް އެކި އެކި ކަންކަމުގައި ހީނާ ވަނީ އިތުރުފުޅުހައްދަވާފައެވެ.

މިކަމާ ގިނަ ފަރާތްތަކުުން އަންނަނީ ހީނާ އަށް ފާޑުކިޔަމުންނެވެ.