ސަރުކާރާއި ދެކޮޅު ހަބަރުތައް ގެނަސްދޭ ޓީވީ ސްޓޭޝަނެއްގައި ހުޅު ޖަހާނެކަމަށް ބުނެ އަނެއްކާވެސް އިންޒާރު ދޭން ފަށައިފި އެވެ.
ސޯޝަލް މީޑިއާގައި މިއަދު އިންޒާރު ދީފައިވަނީ މީގެ ކުރިންވެސް ހުޅުޖަހައި ރޯކޮށްލި ރާއްޖެ ޓީވީގެ ނޫސްވެރިޔަކަށެވެ. އެނޫސްވެރިޔާގެ އިންސްޓަގްރާމް ޕޯސްޓަކަށް ކުރި ކޮމެންޓެއްގައި މީހަކު ބުނެފައިވަނީ އޭނާ މަސައްކަތް ކުރާ ޓީވީ ސްޓޭޝަންގެ ދުވަސް ދުއްވައިލާނެ ކަމަށާއި މިފަހަރު ހޭ އަރުވައިލާނެ ކަމަށެވެ. އަދި މިއީ "އަހަރުމެންގެ ވެރިކަން" ކަމަށްވެސް އޭގައި ބުނެފައިވެ އެވެ.
މީޑިއާތަކަށް މިފަދަ އިންޒާރުތައް ދިނުމަކީ ސީރިއަސް މައްސަލައެކެވެ. އެހެންނަމަވެސް ފުލުހުން ބުނެފައިވަނީ މިފަދަ ކަމެއްގެ ރިޕޯޓު ލިބިފައި ނުވާކަމަށެވެ.
ޓީވީ ސްޓޭޝަނެއްގައި ހުޅު ޖަހާނެކަމަށް ބުނެ ސޯޝަލް މީޑިއާގައި އިންޒާރު ދިންއިރު ޗެނަލް13 އަށްވެސް ދަނީ އެކި ގޮތްގޮތުން އިންޒާރު ލިބެމުންނެވެ. އެގޮތުން ސަރުކާރާއި ދެކޮޅު ހަބަރުތައް ގެނަސްދޭނަމަ ހޭ އަރުވައިލާނެ ކަމަށާއި ސްޓޭޝަން ބަންދު ކުރަން މަޖުބޫރު ކުރާނެކަމަށް ބުނެ ސޯޝަލް މީޑިއާގައި ބައެއް މީހުން ދަނީ ކޮމެންޓު ކުރަމުންނެވެ.
މީގެ ކުރިން ފުލުހުން ބުނެފައިވަނީ ގެއްލުން ދޭނެކަމަށްބުނެ ކާކުކަން ނޭނގޭ އައިޑީތަކުން މިފަދަ ކޮމެންޓު ކުރިޔަސް މައްސަލަ ހުށަހެޅުމުން ތަހުގީގުކޮށް އެއީ ކާކުކަން ހޯދާނެކަމަށެވެ. އަދި ގާނޫނުގެ ތެރެއިން އެމީހެއްގެ މައްޗަށް ފިޔަވަޅު އަޅާނެކަމަށްވެސް ފުލުހުން މީގެ ކުރިން ބުންޏެވެ.
