ރާއްޖޭގެ ކަނޑާއި ވައިގެ ސަރަހައްދު ބަލަހައްޓަން އެމްއެންޑީއެފްއަށް ގެނަސްފައިވާ ޑްރޯންތަކުގެ ތަފްސީލު ހާމަކުރަން ބާއްވާ ރައްޔިތުންގެ މަޖިލީހުގެ 241 ކޮމިޓީ ބައްދަލުވުން ސަރުކާރުން އެދިގެން ސިއްރުކުރަން ފާސްކޮށްފި އެވެ.

ޑްރޯން ގަތް ކުންފުންޏާއި އޭގެ އަގުތައް ހޯދަން މީޑީއާއިން އެދުމުން ސަރުކާރުން ވަނީ އެމައުލޫމާތު އާންމު ކުރުމާއި ދެކޮޅު ހައްދަވައިފަ އެވެ. އެހެންކަމުން ސަރުކާރުން ޑްރޯން ގަތުމުގައި ސިއްސައިގެން ދާވަރުގެ ކޮރަޕްޝަން ހިންގާފައިވާކަމަށް ބުނެ މަޖިލީހަށް މައްސަލަ ހުށަހެޅީ އެމްޑީޕީގެ ފަރާތުންނެވެ.

މިއަދު ބޭއްވި 241 ކޮމިޓީގެ ބައްދަލުވުމުގައި ޑިފެންސް މިނިސްޓްރީން ފޮނުވި ސިއްރު ސިޓީއެއް ވަނީ ކޮމިޓީގެ މެންބަރުންނަށް ހުށަހަޅާފައިވެ އެވެ. އަދި އެ ސިޓީގައި ޑްރޯންތަކުގެ މަރުކާ އަދި އުފެއްދި ކުންފުނީގެ ނަން އޮތް ނަމަވެސް އިތުރު މައުލޫމާތު ދެވޭނީ ކޮމިޓީގެ ސިއްރު ބައްދަލުވުމެއްގައިކަމަށް ބުނެފައިވާ ކަމަށް ކޮމިޓީގެ މުގައްރިރު، ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ވިދާޅުވި އެވެ.

ޑްރޯންތަކުގެ ތަފުސީލުތައް މަޖިލީހުގެ ތަޅުމުގައި ދޭން ދެކޮޅު ހަދާ، އެ ތަފުސީލުތައް ހާމަކުރައްވާނީ 241 ކޮމިޓީގެ ސިއްރު ބައްދަލުވުމެއްގައި ކަމަށް ޑިފެންސް މިނިސްޓަރު ގައްސާން މައުމޫނު ވަނީ މާޗު 26 ގައި މަޖިލީހުގައި ހުންނަވައި ވިދާޅުވެފަ އެވެ.

މިނިސްޓަރު އަދި ވުޒާރާއިން ފޮނުވި ސިޓީގައި އެދިފައިވާ ގޮތަށް މި މައްސަލާގައި ދެން ބާއްވާ ބައްދަލުވުން ސިއްރުކުރަން ހުށަހެޅީ ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީ އެވެ. އޭނާގެ ހުށަހެޅުއްވުމަށް ހުޅުމާލެ ދާއިރާގެ މެންބަރު އަލީ ނިޔާޒު ތާއީދުކުރެއްވިއިރު، އެ ހުށަހެޅުން ފާސްވީ މިއަދުގެ ބައްދަލުވުމުގައި ބައިވެރިވި މެންބަރުންގެ އަގުލަބިއްޔަތުންނެވެ.

ޗެނަލް 13 އަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ޑްރޯންތައް ރާއްޖެ ގެނައީ ތުރުކީގެ ބައިކާރު ކުންފުނި މެދުވެރިކޮށެވެ. އަދި އެ ޑްރޯންތައް ގަތުމަށް ދައުލަތުން 37 މިލިއަން ޑޮލަރު ހަރަދު ކުރިކަމަށް ވެއެވެ.

މިދިޔަ މާޗު މަހުގެ 15 ގައި ނ. މާފަރުގައި ބޭއްވި ރަސްމިއްޔާތެއްގައި ރައީސް ޑރ. މުހައްމަދު މުއިއްޒު ވިދާޅުވީ ގިނަ ޑްރޯންތަކަކީ ތުރުކީގެ ހަދިޔާއެއް ކަމަށެވެ. އެހެންނަމެސް މި މުއާމަލާތުގެ އިތުރު އެއްވެސް ތަފްސީލެއް ހާމަކުރެވެން ނެތީ ގައުމީ ސަލާމަތަށް ނުރައްކާ ވެދާނެތީކަމަށް ސަރުކާރުން ބުނެ އެވެ.