އިންޑިއާއިން މިވަނީ ދިވެހި ރާއްޖެއާއި ދެކޮޅަށް އެންޓި ކެމްޕެއިން ކުރާނެ އައު ގޮތެއް ހޯދާފައިއެވެ. މިހާހިސާބުން މި ބަލާލަނީ ނިއުސްރޫމުން ތައްޔާރުކޮށްފައިވާ މިރޭގެ ބޮޑު ރިޕޯޓަށް

ދިވެހި ރާއްޖެއާއި އިންޑިއާއާއި ދެމެދުއޮތް އެކުވެރިކަމަކީ އެހެން ގައުމުތައް މިސާލެއްގެ ގޮތުގައި ބަލައިގެން އެކުވެރިކަމެކެވެ. ނަމަވެސް އަރައިގެން އައި އިރާއިއެކު ފެނިގެން ދިޔައީ ޚުދު އިންޑިއާގެ ރައްޔިތުން ދިވެހިންނާއި ދެކޮޅަށް ވާހަކަ ދައްކާ އެކި ފެންވަރުގެ އިންޒާރުތައްދެމުން ދިޔަ މަންޒަރެވެ.

ދެން ފެނިގެން ދިޔައީ ފާއިތުވި ފަސް އަހަރު ދިވެހި މާހައުލުން އިވެމުން ދިޔަ "އިންޑިއާ އައުޓު" ސްލޯގަންގެ ބޭނުންކޮށްގެން އެ ގައުމުގެ ފަތުރުވެރިކަން ކުރިއެރުވުމަށް މަސައްކަތް ފެށިތަނެވެ. ފާއިތުވި ފަސް އަހަރު އިންޑިއާގެ ރައްޔިތުންނަށް މި އަޑުތައް އިވޭނެކަން ޔަގީނެވެ. ނަމަވެސް މި ސްލޯގަން އަކީ ދިވެހިރާއްޖޭގެ ގައުމީ ސަލާމަތަށްޓަކައި ރާއްޖޭގައި ތިބި އިންޑިއާ ސިފައިން ރާއްޖޭން އަނބުރާ އެމީހުންގެ ގައުމަށް ގެންދިޔުމަށް ރައީސް އަބްދުﷲ ޔާމީން އަބްދުލްގައްޔޫމް ބޭނުންކުރަމުން ދިޔަ ސްލޯގަންއެކެެވެ.

އެެވަރުންވެސް ނުފުދުނެވެ. ދެން ފެނިގެން ދިޔައީ ދިވެހިން ބޭނުންކުރާ އެކި ސައިޓުތައް ހެކު ކޮށް އެކި ކަހަލަ މެސެޖުތަށް ފޮނުވަން ފެށި މަންޒަރެވެ. ދިވެހި ރައްޔިތުންނަށް އިންޒާރުގެ މެސެޖުތައް މިފަދައިން ފޮނުވައި ސޯޝަލް މީޑިއާގައި ބިރުދައްކަން ފެށިއެވެ. އަދި އިންޑިއާއިން ރާއްޖެއަށް ވެފައިވާ އެހީ ހަނދާންނައްތާލައިގެން ނުވާނެކަމަށް ބުނެ އެ ގައުމުގެ ރައްޔިތުން ދިޔައީ ހުއްޓުމެށް ނެތި ދިވެހިންނަށް އިންޒާރުދެމުނެވެ.

ދިވެހި ރައްޔިތުންނަށް އިންޒާރުދީ، ބުރަ މަސައްކަތުން ދިވެހިން އުފައްދާފައިވާ ވެބްސައިޓު ހެކު ކުރުމަށް ފަހު ދިޔައީ މިއީ އަދި ކުޑަވަރެއްކަމަށް ބުނަމުންނެވެ. ކުރިއަށް އޮތްތަނުގައި ދިވެހިންގެ ވެބްސައިޓުތައް އެކީ ހެކު ކުރެވޭނެ ވަރުގެ ބާރު އެމީހުންގެ އަތުގައި އޮތް ކަމަށް އިންޑިއާގެ ހެކަރުން ދައުވާކުރަމުން ދިޔައީ އަލަށް ބަހެއް ދަސްވެގެން އުޅޭ ކުޑަކުއްޖެއް އެ ބަސް ތަކުރާރުކުރާ ފަދައިންނެވެ.

ނިމިދިޔަ ހަފްތާ ރާއްޖޭގެ ޖުވެނައިލު ކޯޓުގެ ވެބްސައިޓު ހެކުކުރުމަށް ފަހު އިންޑިއާގެ ފަރާތުން އެ ސައިޓުތައް ހެކުކުރުމުގައި އެއްބައިވި މީހުންގެ ނަންތައްވެސް ވަނީ ހިމަނާފައިއެވެ. ފާއިތުވެ ދިޔަ ހޯމަ ދުވަހުގެ ރޭ ފެނިގެން ދިޔައީ އިންޑިއާގެ މިދެންނެވި ހެކަރުން ދިވެހި އެހެން ދެ ވެބަސައިޓެއް ހެކު ކުރި މަންޒަރެވެ.

ހެކު ކުރި ވެބްސައިޓުގެ ތެރޭގައި ދިވެހިރާއްޖޭގެ ފަތުރުވެރިކަމާއި ބެހޭ އޭޖެންސީއެއް ކަމަށްވާ ބްލޫ ހޮރައިޒަން މޯލްޑިވްސް ޓްރެވެލް އޭޖެންސީ ހިމެނެއެވެ. މިހިސާބުން އެ ގައުމުން ރާއްޖޭގެ ފަތުރުވެރިކަމަށް ބުރޫއަރުވާ "އެގައުމުގެ" ތަނެއް ކަމަށް ބުނެ ދައުވާ ކުރަމުން އަންނަ ލަކްޝްވަދީޕު ކުރިއެރުވުމަށް ކުރާ މަސައްކަތެއްކަން ޔަގީންވީ ނޫންތޯ؟

ދެން ފެނިގެން ދިޔަޔީ ދިވެހިން އެ ގައުމުގެ ރައްޔިތުންނަ ނަސްލީގޮތުން އެއްޗެހި ގޮވައި އެ ގައުމުގެ މީހުންނަށް ފުރައްސާކުރިކަމަށް ބުނި އިންޑިއާގެ މީހުން ދިވެހި ރައްޔިތުން ބޭނުންކުރަމުން އަންނަ ސައިޓެއްކަމަށްވާ "މަދަހަ އެމްވީ" ސައިޓު ހެކުކޮށްފައިވާ ސްކްރީންޝޮޓުތަކެއް ސޯޝަލް މީޑިއާގައި ދައުރުވާން ފެށި މަންޒަރެވެ.

މަދަހަ އަޑުއަހަން ދިވެހިން ބޭނުން ކުރަމުން އަންނަ ވެބްސައިޓަކުން އިންޑިއާ ފަދަ ބޮޑު ކަނޑަކާއި މިންނެތްވަރަށް ކާބޯތަކެތި ހެއްދޭ ބިން އޮންނަ ގައުމަކަށް ވަނީ ކޮން ގެއްލުމެއްތޯ އަޅުގަނޑުގެ ހިތުގައި ސުވާލުއުފެދެއެވެ. ދިވެހިން އަޑުއަހާ މަދަހަ އަކީ އިންޑިއާގެ ރައްޔިތުންގެ މިއުޒިކީ ލަވަތައްހާ ހިތްގައިމު އަޑަކަށް ނުވީބާއެވެ؟

ނަމަވެސް ދިވެހި މަދަހަތަކަކީ، އަޅުގަނޑުމެންގެ ދީނުގެ ކަންކަމާއި ގުޅުވައިގެން، ދީނުގެ ހަމަތަކާއި އެއްގޮތައް އަޅުގަނޑުމެންގެ މާދަރީ ބަހުގެ ބޭނުންކޮށްގެން ހެދިފައިވާ ރާގުތަކެކެވެ. މިއީ އިންޑިއާގެ އަދި އެެނޫންވެސް ގައުމެއްގެ އެެއްވެސް ބަޔަކަށް ނުފޫޒުފޯރުވޭނެ ކަމެެއް ނޫނެވެ.

މިއީ އަޅުގަނޑުމެންގެ ދީނަށް ނުސީދާކޮށްނަމަވެސް ކުރެވޭ ފުރައްސާރައެއް ނޫންތޯ؟ މިއީ ދިވެހިންެގެ މާދަރީބަހަށް ކުރި މަލާމަތެއް ނޫންތޯ؟

އަޅުގަނޑުމެންގެ މިނިސްޓަރުންނާއި ރައްޔިތުން އަމިއްލަ ގައުމާއި ދީނުގެ ދިފާއުގައި ނިކުތުމުން އެކަން ވީ އިންޑިއާއަށް ކުރެވުނު ފުރައްސާރައަކަށެވެ. ނަމަވެސް ދިވެހި ގައުމަށް އެ ދޭ ބަހުގެ ހަމަލާތަކާއި ސައިބާ ހަމަލާތައް ތަފަާތުވަނީ ކިހިނެއްކަމާމެދު ސުވާލު އުފެދެއެވެ.

މި ގައުމު ނިސްބަތުން ކުޑަވުމުން އެ ގައުމުގެ ބެކިޔާޑޭ ކިޔުންވެސް އެއީ ހަމަ މި ގައުމާއި، މި ގައުމުގެ ރައްޔިތުންނަށް ކުރެވޭ ފުރައްސާރައެއް ނޫންތޯ؟ މުޅި ދުނިޔޭގެ ކުރިމަތީ ދިވެހީންނާއި ދެކޮޅަށް އެންޓިކެމްޕޭނު ކޮށް ދިވެހިން ފައިސާހޯދާ މައިގަނޑު ނިޒާމު ބިމާ ހަމަކުރަން އެކުރާ މަސައްކަތަކީ ހަމަގައިމުވެސް މިގައުމަށް ކުރެވޭ ފުރައްސާރައެކެވެ. މި ގައުމުގެ ރައްޔިތުންނަށް އިހުތިރާމުގެ ތަންފުކެއްވެސް ނެތީއެވެ.

ދިވެހި ގައުމުގެ ދިފާއުގައި ތެދުވާނީ ދިވެހި ދަރިންނެވެ. އެކުވެރިކަމަކީ މި ގައުމުގެ ރައްޔިތުންނާއި، އެ ރައްޔިތުންގެ ބުރަ މަސައްކަތައް ނުފޫޒުފޯރަން ލިބޭ ދައުވަތެއް ނޫނެވެ.

އިންޑިއާ ނޫންގޮތެއް ދިވެހިންނަށް ފެނުމުން ހަގީގަތުގައިވެސް ހަޖަމުނުވީކަން މިހާރު ޔަގީންވެއްޖެއެވެ.