މުސާރާތައް ކުޑަވުމުގެ ސަބަބުން މަސައްކަތަށް ޤާބިލު މުވައްޒަފުން ލިބުމުގެ ދަތިކަން ކުރިމަތިވާކަމަށް ސިވިލް ސަރވިސް ކޮމިޝަންގެ ރައީސް މުހައްމަދު ނާޞިހު މިއަދު ވިދާޅުވެއްޖެއެވެ.

ސިވިލް ސަރވިސްއަކީ ދިވެހި މަސައްކަތްތެރިންގެ ބޮޑު ހިއްސާއެއް އަދާކުރާ ދާއިރާއަކަށްވެފައި ސިވިލް ސަރވިސްގައި މަސައްކަތްކުރާ މުވައްޒަފުންނަށް މުސާރަ ކުޑަވުމުގެ ސަބަބުން މާޔޫސްކަމާއި ކުރިމަތިލަމުންދާ ކަމަށް ނާޞިހް ވިދާޅުވެފައިވެއެވެ.

ސިއްޙީ، ތަޢުލީމީ އަދި ލޯ އެންފޯސްމަންޓް ދާއިރާތަކުގެ މުސާރަތައް ބޮޑުކުރަމުންދާއިރު ނާސިޙް ވަނީ ހުރިހާ ފަންތިތަކާއި ގިންތިތަކެއްގައި ވެސް މަސައްކަތްކުރާ މުވައްޒަފުންނަށް އުޖޫރައިގެ ކުރިއެރުން ލިބިދިނުމާއި އުޖޫރައިގެ ހަމަހަމަކަން ގާއިމުކުރުމުގެ މަސައްކަތް ވީ އެންމެ އަވަހަކަށް ނިންމަވައިދެއްވުމަށް ސަރުކާރަށް އިލްތިމާސްކޮށްފައެވެ.

އޭނާ ވިދާޅުވީ ސިވިލް ސާވިސްއަކީ ސަރުކާރުގެ ސިޔާސަތުތައް ތަންފީޒުކުރަން ކުރަންޖެހޭ ހުރިހާ މަސައްކަތެއްކޮށް ރައްޔިތުންނަށް ޚިދުމަތްކުރަން އޮތް މުއައްސަސާއެއް ކަމަށެވެ. އެގޮތުން ރައްޔިތުން ބަލައިގަންނާނެ ފަދަ ގޮތަކަށް ޚިދުމަތްދީ، ދެފުށް ފެންނަ ގޮތަށް މައްސަލަ ހައްލުކުރުމަކީ މުހިއްމު ކަމެއްކަން އޭނާ ވަނީ ފާހަގަކުރައްވައިފައެވެ.