ލޯންޗެއް ވަގަށް ނަގައިގެން ލޯބިވެރިޔާ ސަލާމަތްކުރަން އައި ކުޑަ ފިރިހެން ކުއްޖާ އާއިލާއާ ހަވާލުކޮށްފިއެވެ.
ބުދަ ދުވަހުގެ ފަތިހު މ. ދިއްގަރުން ލޯންޗެއްގައި އުމުރުން 14 އަހަރުގެ ފިރިހެން ކުއްޖަކު މާލެ އައީ، ހުޅުމާލޭގައި ދިރިއުޅެމުން ދިޔަ އޭނާގެ 12 އަހަރުގެ ލޯބިވެރިޔާއަށް އާއިލާ ތެރެއިން ކުރިމަތިވަމުން އައި "އެބިއުސް"ތަކަކުން ސަލާމަތްކުރުމަށް ކަމަށް ވެއެވެ.
އެ ކުއްޖާ މާލެ އައި ލޯންޗަކީ ދިއްގަރު ފަޅުގައި އަޅާފައި އޮތް ސިނަމަން ހަކުރާ ރިސޯޓުގެ ލޯންޗެއްކަމަށާ އެ ލޯންޗު ދުއްވާފައި އައިވެސް އެ ފިރިހެން ކުއްޖާ އަމިއްލައަށް ކަމަށްވެއެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ ލޯންޗުގައި މާލެ އައީ 14 އަހަރުގެ ފިރިހެން ކުއްޖެއްކަން ދެނެގަނެވިފައިވާ ކަމަށެވެ. އެ ކުއްޖާ މިހާރު ވަނީ އާއިލާއާ ހަވާލުކޮށްފައި ކަމަށް އޮފިޝަލް ވިދާޅުވިއެވެ.
ވައްކަމުގެ ބޮޑު ތުހުމަތެއް ކުރެވޭ މި މައްސަލައާ ގުޅޭ އިތުރު ތަފުސީލެއް ފުލުހުން ނުދެއެވެ.
ފުލުހުންގެ އޮފިޝަލް އިތުރަށް ވިދާޅުވީ ހުޅުމާލޭ ފޭސް ދެއަކުން 13 އަހަރުގެ އަންހެން ކުއްޖަކު ގެއްލިގެން އިއްޔެ ރިޕޯޓްކުރި ކަމަށެވެ. އެ ކުއްޖާ ފެނިފައިވާ ކަމަށާއި ކުއްޖާގެ ހާލު ރަނގަޅު ކަމަށް ވެސް އޮފިޝަލް ވިދާޅުވިއެވެ.
