ނޫސްވެރިކަމަކީ ޑިމޮކްރަސީގައި ދައުލަތުގެ ތިން ބާރަށްފަހު ދެން އެންމެ މުހިންމު ބާރެވެ. މިއީ ރައްޔިތުން ބާރުވެރިކުރުވުމަށާއި ދައުލަތް ޖަވާބުދާރީ ކުރުވުމަށް އެންމެ މުހިންމު އެއް އަސާސެވެ. މިވޭތުވެދިޔަ ކުރު މާޒީގައި ނޫސްވެރިކަމުގެ ރޮނގުން ރާއްޖެ ވަނީ ކުރިއެރުންތަކެއް ހޯދާފަ އެވެ. އެގޮތުން ނޫސްވެރިން އަމިއްލައަށް ހޯދާ މައުލޫމާތު މަސްދަރު ސިއްރުވާނޭހެން ނޫސްތަކުގައި ޝާއިއު ކުރުމުގެ މިނިވަންކަމާއި، އަމިއްލަ ހިޔާލު ޝާއިއު ކުރުމުގެ މިނިވަންކަންވެސް މިވޭތުވެދިޔަ ތަނުގައި ވަނީ ލިބިފަ އެވެ. އެހެންނަމަވެސް އަދިވެސް ނޫސްވެރިކަމަށް އެކި ގޮތްގޮތުން ދަނީ ގޮންޖެހުންތައް ކުރިމަތިވަމުންނެވެ.

ނިމިގެން މިދާ ރައްޔިތުންގެ މަޖިލީހުގެ 19 ވަނަ ދައުރުގެ ތެރޭގައި ވަނީ ނޫސްވެރިކަމަށް ހިޔަނި އެޅޭފަދަ ގާނޫނެއް ފާސްކޮށްފަ އެވެ. އަލަށް ފާސްކުރި ހެއްކާއިބެހޭ ގާނޫނުގައިވާގޮތުން ނޫސްވެރިޔަކު ލިޔެ ޝާއިއުކުރާ ހަބަރެއްގެ މަސްދަރު ހާމަކުރަން މީހަކު ކޯޓަށް ގޮސްފިނަމަ އެ ނޫހަކަށް ނުވަތަ ނޫސްވެރިޔަކަށް މަސްދަރު ސިއްރުކޮށްފައި ނުބޭއްވޭނެ އެވެ. މިއީ ވިސްލް ބްލޯ ކުރާ ފަރާތްތަކުން ބިރު ގަންނާނެ ގޮތަށް ފާސްކޮށްފައި އޮތް ގާނޫނެކެވެ. ހާއްސަކޮށް އެއިރެއްގައި ބާރުގައި އޮންނަ ސިޔާސީ ފަރާތްތަކާއިގުޅޭ ކޮރަޕްޝަންގެ މައްސަލަތަކުގެ ވާހަކަ ދައްކައި އެމައްސަލަތަކާއި ގުޅޭ ހެއްކާއި ގަރީނާ ނޫސްވެރިންނަށް ފޯރުކޮށްދޭން ތިބޭ މީހުން ބިރުގަންނާނެ ގާނޫނެކެވެ.

މިގާނޫނު ފާސްކުރުމާއެކު އެކަން ބައިނަލްއަގުވާމީ ޖަމިއްޔާތަކުންވެސް ފާހަގަކުރި އެވެ. އެގޮތުން ދުނިޔޭގެ ނޫސްވެރިކަމުގެ މިނިވަންކަމުގައި މިއަހަރު ރާއްޖެ ވަނީ 6 ދަރަޖަ ފަހަތަށް ސޮއްސާލައިފަ އެވެ. އަދި ނޫސްވެރިކަން ކުރުމުގައި ގޮންޖެހުންތަކެއް ހުރި ރޭންކުން ނޫސްވެރިކަން ކުރުމުގައި ވަރަށް އުނދަގޫ ރޭންކިންއަށް ރާއްޖެ ދަށްކޮށްފަ އެވެ. އެ އިންޑެކްސްގައި ރޭންކު ދަށްކުރުމުގެ މައިގަނޑު ސަބަބެއްގެ ގޮތުގައިވެސް ފާހަގަކޮށްފައި އޮތީ ހެއްކާއިބެހޭ ގާނޫނެވެ.

ރައީސް އިބްރާހިމް މުހައްމަދު ޞާލިހު ވެގެން ދިޔައީ ނޫސްވެރިންނާއި ބީރައްޓެހި ރައީސަކަށެވެ. ދައުރުގެ ކުރީކޮޅު އެމަނިކުފާނު ނޫސްވެރިންނާއި ބައްދަލު ކުރެއްވި ނަމަވެސް 2022 ވަނަ އަހަރުން ފެށިގެން ރައީސް ޞާލިހު ނޫސްވެރިންނާއި ބައްދަލު ކުރައްވަނީ ވަރަށް މަދު ފުރުސަތެއްގަ އެވެ. އަދި މިގޮތަށް ބައްދަލު ކުރައްވާއިރުވެސް މާގިނަ ވަގުތު ނޫސްވެރިންނަށް ސުވާލު ކުރާކަށް ނުދެ އެވެ. އެއާއެކު ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވީ ނޫސްވެރިންނާއި ވަރަށް ގާތް ގުޅުމެއް ބާއްވާނެ ރައީސެއްގެ ގޮތުގައި ޕްރޮމޯޓު ވެގެންނެވެ.

ކަން ވެގެން ދިޔައީ އެހެންނެއް ނޫނެވެ. ވެރިކަމަށް ވަޑައިގެންނެވުމަށްފަހު ރައީސް މުއިއްޒު ނޫސްވެރިންނާއި ބައްދަލު ނުކުރައްވާތީ ތިން މަސް ދުވަސް ފާއިތުވެއްޖެ އެވެ. މިހާރު އެމަނިކުފާނު ގެންދަވަނީ ވަކިވަކި ނޫސްތަކަށާއި މީޑިއާތަކަށް ފުރުސަތު ދެއްވައި ކުރީ ބައިގައި ސުވާލުތައް ފޮނުވައި ތައްޔާރުވެގެން އިންޓަވިއު ދެއްވަމުންނެވެ. މިއީ ނޫސްވެރިކަމުގެ މިނިވަންކަމަށް އެޅޭ ވަރަށް ބޮޑު ހިޔަންޏެކެވެ.

ރައީސް މުއިއްޒު ވެރިކަމަށް ވަޑައިގެންނެވިތާ ހަ މަސްވެގެން ދިޔައިރު ސަރުކާރަށް ސަނާ ނުކިޔާ މީޑިއާތަކަށް މިހާރު ދަނީ ބިރުވެރި އިންޒާރުތައްވެސް ލިބެމުންނެވެ. އެގޮތުން އެންމެ ފުރަތަމަ ރޯކޮށްލާނެކަމުގެ އިންޒާރު ލިބުނީ ރާއްޖެ ޓީވީ އަށެވެ. އެޗެނަލްގައި މަސައްކަތް ކުރާ ނޫސްވެރިއެއްގެ އިންސްޓަގްރާމް ޕޯސްޓަކަށް މީހަކު ކޮމެންޓުކޮށް ބުނީ އެ ޓީވީ ސްޓޭޝަންގައި ހުޅުޖަހާނެ ކަމަށެވެ. އަދި މިއީ އެމީހުންގެ ސަރުކާރު ކަމަށްވެސް އިންޒާރު ދިން މީހާ ބުންޏެވެ. ދެން އިންޒާރު ލިބުނީ ޗެނަލް 13 އަށެވެ. އެގޮތުން މި ޗެނަލް އަންދާ އަޅިއަށް ހަދައިލާނެ ކަމަށާއި ހޭ އަރުވާލާނެކަމަށް ބުނެ އިންޒާރު ދިނީ ފޭސްބުކްގަ އެވެ. މި ދެ އިންޒާރުވެސް އައިސްފައިވަނީ ކާކުކަން ނޭނގޭނެހެން ފޭކު އައިޑީއެއްގެ ފަހަތުގައި ފޮރުވިގެން ތިބެ އެވެ.

މިނިވަންކަމާއިއެކު ނޫސްވެރިކަން ކުރުމަށް ހުޅުވިފައިވާ ދޮރުތައް މަޑުމަޑުން ލެއްޕެމުން ދާއިރު ދައުލަތުގެ އިދާރާތަކުން މީޑިއާތައް ބާރުވެރި ކުރުވަން މަސައްކަތް ނުކޮށްފިނަމަ ކުރިއަށް މިއޮތީ ބިރުވެރި 5 އަހަރަށް ވުން ވަރަށް ގާތެވެ. ހާއްސަކޮށް ވެރިކަމުގައި އޮތް ސިޔާސީ ޕާޓިގެ މެޖޯރިޓީ ރައްޔިތުންގެ މަޖިލީހުގައިވެސް އޮތަތީވެ ނޫސްވެރިންނަށް މައުލޫމާތު ހޯދައި ލިބިގަތުމަށް ކޮންމެވެސް ވަރެއްގެ ދަތިތަކެއް ކުރިމަތިވުން ވަރަށް ގާތްކަމަށް ބެލެވެ އެވެ. މީޑިއާތަކަށް ބިރު ދެއްކުމާއި އިންޒާރު ދެމުން އާންމުވުން ހަނި ކުރެވޭނީ ދައުލަތުގެ އިދާރާތަކުން ހަރުދަނާ ފިޔަވަޅުތަކެއް އަޅައިގެންނެވެ.