ސަރުކާރު ހިއްސާވާ އެންމެ ބޮޑު އެއް ކުންފުނި، މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީގެ މިއަހަރުގެ ފުރަތަމަ ކުއާޓަރގެ ސާފު ފައިދާ ބޮޑު ތަނުން ދަށަށް ހިނގައްޖެއެވެ.

އެމްޓީސީސީއިން އާންމުކޮށްފައިވާ ހިސާބުތަކުން ހާމަވާ ގޮތުގައި މި އަހަރުގެ ފުރަތަމަ ކުއާޓަރުގައި ޖެނުއަރީއިން މާޗު މަހުގެ ނިޔަލަށް އެ ކުންފުންޏަށް ލިބުނީ 664 މިލިއަން ރުފިޔާގެ އާމްދަނީއެކެވެ. އެއީ މިދިޔަ އަހަރުގެ ފަހު ކުއާޓާރުގައި ލިބުނު 789 މިލިއަން ރުފިޔާއަށްވުރެ 125 މިލިއަން ދަށް އަދަދެކެވެ. ނުވަތަ 16 ޕަސެންޓް ދަށްވުމެކެވެ.

އެހެންކަމުން އެމްޓީސީސީއަށް ފުރަތަމަ ކުއާޓާރުގައި ޓެކުހަށް ކެނޑުމަށްފަހު ސާފު ފައިދާގެ ގޮތުގައި ލިބުނީ އެންމެ ފަސް މިލިއަން ރުފިޔާގެ އަދަދެކެވެ. އެއީ މިދިޔަ އަހަރުގެ ފަހު ކުއާޓަރުގައި އެމްޓީސީސީއަށް ލިބުނު 35.14 މިލިއަނަށްވުރެ 82 ޕަސެންޓްގެ ދަށްވުމެކެވެ.

އެމްޓީސީސީ އިން ހާމަކޮށްފައިވާ ގޮތުގައި، ފައިދާ ދަށްވީ ދުނިޔޭގެ ބާޒާރުގައި ތަކެތީގެ އަގު އަދި ހާއްސަކޮށް ތެލުގެ އަގު އުފުލުމުގެ ސަބަބުންނާއި ބާރު ފައިސާ ހޯދުމަށް ކުންފުނިން ކުރަން ޖެހުނު ހަރަދު އިތުރުވުމާ ގުޅިގެން ކުންފުނީގެ ސަޕްލައިޗޭނަށް ދިމާވި ނޭދަވޭ އަސަރުގެ ސަބަބުން ކަމަށެވެ.