6 އަހަރުވަންދެން ބަންދުކޮށްފައި އޮތް ސަބުދެލި މަގު އަންގާރަދުވަހުގެ ރޭ އަނެއްކާވެސް ހުޅުވައިފިއެވެ.

މި މަހުގެ ހަ ވަނަ ދުވަހުން ފެށިގެން، ހިރިޔާ ސްކޫލްގެ އުތުރުގައި އޮންނަ ސަބުދެލި މަގު ހުޅުވުމުގެ މަސައްކަަތް ޕަބްލިކް ވޯކްސް މިނިސްޓްރީން ވަނީ ފަށާފައިއެވެ.

އެ މިނިސްޓްރީއިން ބުނި ގޮތުގައި އެ މަގު ހުޅުވީ ޒަމާނީ ފެންވަަރަށް އަމީނީ މަގު ތަރައްގީކުރުމުގެ މަސައްކަތް ކުރިއަށް ދިޔުމާ ގުޅުގެން އެ މަގު ބަންދުކޮށްފައި އޮތުމުން ރައްޔިތުންނަށް ދަތުރުފަތުރު ކުރަން ދިމާވާނެ ދަތިތަކާއި ގުޅިގެން ކަމަށެވެ.

ރޯޑް ޑިވެލޮޕްމެންޓު ކޯޕަރޭޝަންއިން އެކްގައި ކުރި ޕޯސްޓެއްގައި ބުނެފައިވަނީ ސަބުދެލިމަގު އަލުން ހުޅުވާލުމަށް ކުރަންޖެހޭ މަސައްކަތްތައް ނިންމާލުމަށްފަހު އެމަގު މިހާރުވަނީ އާންމުންނަށް ހުޅުވާލެވިފައި ކަމަށެވެ.

ސަބުދެލި މަގު ބަންދުކޮށްފައި ވަނީ މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލޭ ޗިޓީގެ މޭޔަރުކަމުގައި ހުންނެވި އިރު އެ ސަރަހައްދުގައި ފެއްޓެވި ލަގްޒަރީ ހައުސިން ޕްރޮޖެކްޓެއް ހިންގުމަށެވެ.

ނަމަވެސް މިހާތަނަށް އެ ސަރަހައްދުގައި އެއްވެސް މަސައްކަތެއްކޮށްފައި ނުވާކަން ފާހަގަކޮށްލެވެއެވެ.

ރައީސް އަބްދުﷲ ޔާމީން އަބްދުލް ގައްޔޫމުގެ ޒައާމަތުގައި އެމަނިކުފާނު ވަނީ ސިންގަޕޫރުގެ ކުންފުންޏެއް ކަމަށްވާ ޗަންހުއާ ކޮންސްޓްރަކްޝަނަށް 2020 ވަނަ އަހަރުގެ ނިޔަލަށް އެތަނުގެ މަސައްކަތްް ނިންމުމަށް ހަވާލުކޮށްފައިއެވެ.

އަދި ސަރުކާރަށް އެ ހަތަރު ޓަވަރުގެ ތެރެއިން 120 އެޕާޓުމަންޓު ދޭންޖެހޭނެކަމަށް ނިންމުމަށް ފަހު އޭރު ވަނީ އެތަނުގައި ބިންގާ އަޅާފައިއެވެ.