ރައްޔިތުންގެ މަޖިލީހުގެ މެމްބަރުކަމުން ވަކިވާނެ ހާލަތްތައް ބަޔާންކޮށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ގާނޫނުއަސާސީއަށް ހުށަހެޅި އިސްލާހުތައް އަނބުރާ ގެންގޮސްފިއެވެ.

ހަސަން ލަތީފު ހުށަހަޅުއްވާފައިވާ އިސްލާހުގައި ބުނެފައި ވަނީ އެ މެންބަރަކު ހޮވޭ ޕާޓީ ބަދަލުކޮށްފިނަމަ ނުވަތަ މިނިވަން ކެންޑިޑޭޓަކު ޕާޓީއަކާއި ގުޅިއްޖެ ނަމަ އަދި ޕާޓީން މެންބަރަކު ވަކިކޮށްފިނަމަ އެ މެންބަރެއްގެ ގޮނޑި ގެއްލޭނެ ކަމަށެވެ.

އިސްލާހަކީ މާރޗް 26 ވަނަ ދުވަހު ހުށަހެޅި އިސްލާހެކެވެ.

މި ފަދަ އިސްލާހެއް ހުށަހެޅީ މި ފަހުން ތަސްދީގުކުރި އެންޓި ޑެިފެކްޝަން ގާނޫނުގައި އެކަން އިޚްތިޔާރީ ކަމެއްގެ ގޮތުގައި ހިމަނާފައިވަނިކޮށެވެ. މި ފަހުން ފާސްކުރި އެ ގާނޫނުގައިވާ ގޮތުގައި، މިފަދަ އެއްވެސް ހާލަތެއް ދިމާވެއްޖެނަމަ މެންބަރު އަމިއްލައަށް އިސްތިއުފާ ދޭން ޖެހެއެވެ. ނަމަވެސް އިސްތިއުފާ ނުދީފިނަމަ ދެން އަމަލުކުރާނެ ގޮތެއް މި ޤާނޫނުގައި ބަޔާންކޮށްފަ ނެތެވެ.

ހަސަން ލަތީފް ހުށަހެޅުއްވި އިސްލާހުތަކުގެ ބިލް މަޖިލީހަށް ތައާރަފްކޮށް ފުރަތަމަ ކިޔުން ވެސް އޭޕްރީލް 23 ވަނަ ދުވަހު އޮތް މަޖިލީހުގެ ޖަލްސާ ގައި އިއްވާފައިވަނިކޮށް، ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސަތުން ވަނީ ހަސަން ހުށަހެޅުއްވި އިސްލާހުތައް އިއްޔެގެ ވަގުތެއްގައި އޭނާ އަނބުރާ ގެންދަވާފައިވާ ކަމަށް އިއުލާން ކުރައްވާފައެވެ.

އިސްލާހު އަނބުރާ ގެންދެވި ސަބަބެއް އެހެން ނަމަވެސް ހާމަކޮށްފައިނުވެއެވެ.