ރައީސް އޮފީހުގެ ކޮމިޔުނިކޭޝަންސް މިނިސްޓާރ އިބްރާހިމް ހަލީލް ގެންދަވަނީ ރައީސް އޮފީސް ތެރެއިން ސަން އޮންލައިން އަދި ސަން ޓީވީ ހިންގަވަމުން ކަމަށާއި ރައީސް އަބްދުﷲ ޔާމީން އަބްދުލްގައްޔޫމްގެ ނަންފުޅު ބޭނުންކުރައްވައިގެން ހެޑްލައިން ޖައްސަވަމުން ކަމަށް ވިދާޅުވެ، ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ފާޑުވިދާޅުވެއްޖެއެވެ.
މަލީހް މިފަދައިން ވިދާޅުވެފައިވަނީ ސަން އޮންލައިން އިން "ރައިސް ޔާމީން ސިޔާސީ މައިދާނުން ފިލައިފިކަމަށް" ބުނެ ޖަހާފައިވާ ޚަބަރު ހިއްސާކުރެއްވުމަށްފަހުއެވެ.
އެގޮތުން އެގޮތައް ސުރުހީ އިނުމުން ހައިރާންނުވާކަމަށްވެސް މަލީހް ވަނީ ވިދާޅުވެފައެވެ.
ސަބަބަކީ އެއީ ކަނޑައެޅިގެން ރައީސް އޮފީހުގެ ކޮމިޔުނިކޭޝަން މިނިސްޓާރ ހަލީލްގެ އެދުމުގެ މަތިން ލިޔެފައިވާ ހަބަރަކަށްވާތީކަމަށެވެ.
މަލީހް އިތުރަށް ވިދާޅުވީ ރައީސް މުއިއްޒުގެ ސަރުކާރުގެ ވައްކަންތައް ފޮރުވަން ރައީސް އޮފީސް ތެރެއިން އިރުޝާދު ލިބިގެން ހިންގާ ޑައިވާޝަން ޓެކްނިކެއް ކަމަށާއި ރައީސް ޔާމީން ގެއްލިއްޖެ ނަމަ ފުލުހުންނަށް ރިޕޯޓް ކުރުމަށް ވެސް މަލީހް ވަނީ ގޮވާލައްވާފައެވެ.
މިފަދަ ކަންކަމަކީ ދެރަވަރު ކަންކަން ކަމަށް ވެސް މަލީހް ވަނީ ސިފަކުރައްވާފައެެވެ.
