ޑޯނިޔާ އާ ހެލިކޮޕްޓަރު ދުއްވަން ދިވެހި އަސްކަރިއްޔާގެ ގާބިލުކަން ނެތް ކަމަށް ދިފާއީ ވަޒީރު މުހައްމަދު ޣައްސާން މައުމޫނު ވިދާޅުވުމުން ފާޑުކިޔުން އަމާޒުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޣައްސާން ވިދާޅުވީ، އިންޑިއާއިން ރާއްޖެއަށް ހަދިޔާކޮށްފައި އޮންނަކަމަށް ބުނާ ހެލިކޮޕްޓަރާ އަދި މަތިންދާ ބޯޓު ދުއްވަން ކުރިން ތިބި އެ ގައުމުގެ ސިފައިން ފޮނުވާލުމަށް ފަހު މިހާރު އެ އުޅަނދުތައް ދުއްވަން ވަނީ އެ އުޅަނދުތައް އުފެއްދި ކުންފުނީގެ މުވައްޒަފުން ގެނެސްފައި ކަމަށާ އެހެން އެކަން ކުރީ އެ އުޅަނަދުތައް ބޭނުންކުރަން ޖެހޭ ފަދަ ހާލަތެއް އައިސްފި ނަމަ އެ އުޅަނދުތައް އޮޕަރޭޓުކުރަން ކަމަށެވެ.

މިކަމާ ގުޅިގެން ނޫސްވެރިއަކު ވަނީ ދިވެހި އަސްކަރިއްޔާއާ އެ އުޅަނދުތައް ހަވާލުނުކުރީ ކީއްވެތޯ ސުވާލުކޮށްފައެވެ. ސުވާލުގެ ޖަވާބުގައި ވަޒީރު ގައްސާން ވިދާޅުވީ ދިވެހި އެ އުޅަނދުތައް ދުއްވަން ދަސްކުރުމުގެ ތަމްރިނުތައް ފުރިހަމަ ކުރަނީ ކަމަށާ އަދި އެ ގާބިލުކަން ދިވެހި އަސްކަރިއްޔާގެ ކިބައިގައި ނެތް ކަމަށެވެ.

ޣައްސާންގެ މި ވާހަކަފުޅާ ގުޅިގެން މީސް މީޑިޔާގައި އެކި ފަރާތްތަކުން ވަނީ ނުރުހުންފާޅުކޮށް ފާޑުކިޔާފައެވެ.

އެގޮތުން ނިމިދިޔަ ފަސް އަހަރު ޣައްސާން އަކީ އިންޑިއާ ސިފައިން މަތިންދާ ބޯޓު ދުއްވަން ތިބުމުން އެންމެ ބޮޑަށް ފާޑުކީ އެއް ބޭފުޅެއް ކަމަށާ އޭރު އެމްޑީޕީއިން ބުނިހެން މިއަދު ޣައްސާންވެސް ވިދާޅުވުމުން އެއީ ޖޯކެއް ކަމަށެވެ.

މީގެ އިތުރުން އެހެން މީހަކު ބުނެފައިވަނީ ވެރިކަމަށް އައުމަށް އިންޑިއާ އައުޓު ބޭނުންކޮށް ވެރިކަމަށް އައުމަށް ފަހު މި ސަރުކާރުން ކުރީ އިންޑިއާ އިން ކަމަށާ ރައީސް އަބްދުﷲ ޔާމީން ވިދާޅުވި ފަދައިން ދެން ވީ މޭމަތީގައި އިންޑިއާ އިން ޖަހައިގެން އުޅެންތޯ އަހާ ސުވާލެއް އަމާޒުކޮށްފައެވެ.

ޣައްސާންއަށް ފާޑުކިޔުން އަމާޒުކޮށް އިތުރަށް މީސް މީޑިޔާގައި މީހަކު ވަނީ ޠާލިބާނުންވެސް އަސްކަރިީ އުޅަނދުތައް ދުއްވަން ދެ ހަފްތާ ތެރޭ ދަސްކުރާކަމަށް ވާ ކަމަށާ ނަމަވެސް ދިވެހި އަސްކަރިއްޔާގައި އެ ފެންވަރު ނެތޭ ބުނުމަކީ ދިވެހިން ފަޚްރުވެރިވާ އެ އަސްކަރިއްޔާގެ އަގު ވައްޓާލާ އެ އަސްކަރިއްޔާގެ ބައިވެރިން ލަދު ގަންނަވާލަން ވަޒީރު ކުރެއްވި ކަމެއްގެ ގޮތުގައިވެސް ސިފަކޮށްފައެވެ.

ދިވެހި އަސްކަރިއްޔާއަކީ ނާގާބިލު ބައެއްގެ ގޮތުގައި ސިފަކުރަން ވަޒީރު މަސައްކަތްކުރުމުން ހޫނު ފެނަށް ވެއްޓިފައިވާއިރު އެމްޑީޕީ އިން ވެސް ކުރިން ބުނީ އަސްކަރީ އުޅަނދުތައް ދުއްވަުމުގެ ގާބިލުކަން ދިވެހިންގެ ނެތް ކަމަށެވެ. ނަމަވެސް އޭރު އެމްޑީޕީގެ ވާހަކަތައް ދޮގުކޮށް ދިވެހިންނަކީ ގާބިލު ބައެއްކަމާ ދިވެހިން އަސްކަރިއްޔާ އެ ފެންވަރުގެ ޕައިލެޓުން ތިބި ކަމަށް ވިދާޅުވި އެއް ބޭފުޅަކީ ޣައްސާންކަން ފާހަގަކޮށްލެވެއެވެ.

އެހެންކަމުން ވަޒީރުކަމަށް ވަޑައިގެން ކުރިން ކީހާ ޅެން ފަރިއްސަށް ވީ ސަބަބަކީ އިންޑިއާގެ އުނގަށް މި ސަރުކާރުވެސް ވެއްޓުންތޯ ސުވާލު އުފެދެއެވެ.