ދިވެހިރާއްޖެ ތަމްސީލުކުރަން ބޭރު ގައުމުތަކުގައި، ޓުއަރިޒަމް މިނިސްޓަރު އިބްރާހިމު ފައިސަލް ވާހަކަ ދައްކަވަމުން ގެންދަވާއިރު އެމަނިކުފާނު މަގާމަށް ކުފޫ ހަމަ ނުވާކަމަށް ބުނެ ފާޑުކިޔުންތައް އަމާޒުކުރުމުން ދިފާއުގައި ދެއްކެވި ވާހަކަފުޅުތަކަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ރައްދު ދެއްވައިފިއެވެ.

ޑރ. ޖަމީލުގެ ރައްދު ފައިސަލަށް ރައްދު ކުރެއްވީ އެކްސްގައި ކުރެއްވި ޕޯސްޓެއްގައެވެ.

ފައިސަލްއަށް އިނގިރޭސި ބަހުން ފަރިތަކަމާ އެކު ހަމަތަކުގެ މަތިން ވާހަކަފުޅު ދައްކަވަން އެނގިވަޑައި ނުގަންނަވާއިރުވެސް ރާއްޖެ ތަމްސީލުކޮށް ބޭރު ދުނިޔޭގައި "ބްރޯކަން އިންގްޅިޝް"އިން ވާހަކަފުޅު ތަކުރާރުކޮށް އެކި ހަފްލާތަކުގައި ދައްކަވަމުން ގެންދަވާތީ ގިނަ ބައެއްގެ ފާޑުކިޔުން އަމާޒުވެގެން ގޮސްފައިވެއެވެ. އެގޮތުން އިނގިރޭސި ބަހުން ވާހަކަ ދައްކަން ނޭނގޭ ނަމަ ދިވެހި ބަހުން ވާހަކަ ދެއްކުމަކީ އެންމެ ރަގަޅު ގޮތް ކަމަށްވެސް ބައެއް މީހުން ބުނެފައިވެއެވެ.

އެ ވާހަކަތަކުގެ ދިފާއުގައި ފައިސަލް ވިދާޅުވީ، އެއީ ޒާތީވުން ކަމަށާ އެހެން އެކަން ކޮށްގެން ފަހަތަށް ނުޖެއްސޭނެ ކަމަށެވެ. އަދި މިއީ އޭނާގެ ވެސް ބުރަ މަސައްކަތުން ގެނައި ސަރުކާރެއްކަމުން އޭނާގެ ބައިވެރިވުންވެސް އޮންނާނެ ކަމަށް ފައިސަލް ވިދާޅުވެފައިވެއެވެ.

ފައިސަލްގެ މި ވާހަކަތަކަށް ރައްދު ދެއްވާ ޑރ. ޖަމީލު ވިދާޅުވީ، ހިލްމެއް ނެތި ހުންނަވާ އެކަމުގެ ދިފާއުގައި ފައިސަލް ވާހަކަ ދެއްކެވި ދެއްކެވުމުން އެމަނިކުފާނަށް ލިބިވަޑައިގެންނެވީ ނުހަނު ބޮޑު ޝޮކެއް ކަމަށެެވެ.

އެގޮތުން ނިމި ދިޔަ ފަސް އަހަރު ޕީޕީއެމްގެ އާންމު މެމްބަރުން ބުރަ މަސައްކަތްކުރި އިރު ފައިސަލް ހުންނެވީ ކޮންތާކުތޯ އައްސަވާ ޑރ. ޖަމީލު ވިދާޅުވީ، ފައިސަލް ކިތަންމެ ހިތްޕުޅާ ނުވިނަމަވެސް ފައިސަލަށް ލިބުނު މަގާމެއް ލިބިފައިވަނީ އާއިލީ ވެރިކަމެއްގެ ތެރެއިން ކަމަށެވެ.

މީގެ އިތުރުން ޑރ. ޖަމީލު ވިދާޅުވީ، ފައިސަލްގެ އަމަލުތައް ހުރީ މުޅި ކެބިނެޓަށްވެސް ހުތުރުވާ ގޮތަށް ކަމަށާ އެގޮތުން ފެއިލިޔަރ އާ ނުދަތުމުގެ ދިފާއުގައި ފޮނި ކެނޑުމަކީ ލަދުވެތިކަމެއްގެ ގޮތުގައި ޑރ. ޖަމީލު ސިފަކުރައްވާފައިވެއެވެ.