ހުޅުމާލޭގައި އޮތް ވެހިކަލެއް ތެރޭގައި މަރުވެފައި އޮށްވާ ފެނުނު މީހާގެ މަރުގައި ޝައްކުކުރެވޭ ފަދަ ކަމެއް ނެތް ކަމަށް ފުލުހުން ހާމަކޮށްފިއެވެ.

ހުޅުމާލޭ ފުރަތަމަ ފިޔަވަހީގެ ސަހަރާ ކުރިމަތީ މަގުމަތީގައި ޕާކުކޮށްފައި އޮތް ވެހިކަލެއްގައި މީހަކު ހަބަރު ހުސްވެފައި އޮއްވާ ފެނިގެން އެމީހާ ހުޅުމާލޭ ހޮސްޕިޓަލަށް ގެންދިޔައީ އިއްޔެ މެންދުރު ފަހެވެ.

ފުލުހުން މިއަދު ބުނެފައިވަނީ ހުޅުމާލެ ފޭސް 1 ސަހަރާ ކުރިމަތީ މަގުގައި ޕާކު ކޮށްފައި އޮތް ވެހިކަލެއްގައި ނިޔާވެފައި އޮށްވާ ފެނުނު ބަންގްލަދޭޝް މީހާގެ މަރުގައި ތުހުމަތު ކުރެވޭފަދަ އެއްވެސް ކަމެއް މިހާތަނަށް ބެލިބެލުމުން ފާހަގަ ކުރެވިފައި ނުވާކަމަށެވެ.

އެމީހާގެ ހަށިގަނޑާމެދު އަމަލުކުރާނެ ގޮތަކާ މެދު އާއިލާއާ ވާހަކަ ދައްކަމުންދާ ކަމަށްވެސް ފުލުހުން މައުލޫމާތު ދީފައިވެއެވެ.