އިންޑިއާއިން ރާއްޖެއަށް ހަދިޔާކޮށްފައި އޮންނަ ދެ ހެލިކޮޕްޓަރުގެ ތެރެއިން އެއް ހެލިކޮޕްޓަރު، އެންގުމަކައި ނުލައި ތ. ތިމަރަފުއްޓަށް ޖެއްސި ކަމަށް ވިދާޅުވެ ރާއްޖޭގެ ޚާރިޖީ ވަޒީރު ހެއްދެވީ އިތުރުފުޅެއް ކަމަށް އިންޑިއާއިން ހާމަކޮށްފިއެވެ.

މިމަހުގެ 10 ވަނަ ދުވަހު، މިގައުމުގައި ތިބި އިންޑިއާ ހުރިހާ ސިފައިން އަނބުރާ ފޮނުވާ ލެއްވިއްޖެ ކަމަށްބުނެ ޑިފެންސް މިނިސްޓްރީއާ ފޮރިން މިނިސްޓްރީއިން ވަނީ ނޫސްވެރިންގެ ބައްދަލުވުމެއް ބާއްވާ ކާމިޔާބީ ފާހަގަކޮށްފައެވެ.

އެ ބައްދަލުވުމުގައި ޚާރިޖީ ވަޒީރު މުހައްމަދު ޣައްސާން މައުމޫނު ވިދާޅުވީ މިހާރު އަސްކަރީ އުޅަނދުތައް ދުއްވަން ތިބޭނީ މަދަނީ މީހުން ކަމަށާ އަދި އެ އުޅަނދުތައް ކުރިން ދުއްވިހެން، ދިވެހި ސަރުކާރުގެ ހުއްދައާ ނުލާ ދެން ނުދުއްވޭނެ ކަމަށެވެ.

ޣައްސާން ވިދާޅުވީ އެމްޑީޕީ ސަރުކާރުގައި އިންޑިއާގެ ހެލިކޮޕްޓަރު ދިވެހި ސަރުކާރުގެ ހުއްދައާ ނުލާ، ތިމަރަފުށީގައިވެސް ޖެއްސި ކަމަށާ ނަމަވެސް މީގެ ފަހުން އެފަދަ ހާދިސާތައް ނުހިނގާނެ ކަމަށެވެ.

މިކަމާ ގުޅިގެން ރާއްޖޭގައި ހުންނަ އިންޑިއާގެ ހައިކޮމިޝަނުން ވަނީ ބަޔާނެއް ނެރެފައެވެ.

އެ ބަޔާނުގައި ބުނީ ވަޒީރުގެ ވާހަކައާ ގުޅިގެން ގިނަ މީޑިއާތަކުން އެކަން ހިނގި ގޮތް ސާފުކުރަން ކޮމިޝަނުގައި އެދެމުންދާތީ އެކަން ސާފުކޮށްދިނުމަށް ނެރުނު ބަޔާނެއް ކަމަށާ އެގޮތުން ރާއްޖޭގައި ހުރި އެ ގައުމުގެ ވައިގެ ޕްލެޓްފޯމްތައް އަބަދު ވެސް ބޭނުންކުރީ އެއްބަަސްވެފައިވާ ގޮތަށް ދިވެހި ސިފައިންގެ ބެލުމުގެ ދަށުން ހުއްދަ ލިބިގެން ކަމަށް ބުނެފަ އެވެ.

ޣައްސާން އިޝާރާތް ކުރެއްވި ހާދިސާ ހިނގީ އޮކްޓޯބަރު 9، 2019 ގައި ކަމަށާއި އެ ދުވަހު ދަތުރުކުރީ ވެސް އެމްއެންޑީއެފްގެ ހުއްދައާ އެކު ކަމަށް ވެސް އިންޑިއާއިން ހާމަކޮށްފައިވެއެވެ.

ބަޔާނުގައި ބުނާގޮތުން ތިމަރަފުށީ އެއާޕޯޓުގައި ހެލިކޮޕްޓަރު ޖައްސަން ޖެހުނީ ކުއްލި ހާލަތެއް ދިމާވެގެންނެވެ. އެކަމަށް ބޭނުންވާ ހުރިހާ ހުއްދައެއް އެއާ ޓްރެފިކް ކޮންޓްރޯލުން ވެސް ހޯދި ކަމަށާއި އެ ދުވަހުގެ ހާދިސާގައި ތިމަރަފުށްޓަށް ޖެއްސީ ހެލިކޮޕްޓަރާއި ކްރޫއިންގެ ސަލާމަތައް ބަލާ ކޮންމެހެން އެމަޖަންސީކޮށް ޖައްސަން ޖެހިގެން ކަމަށް ވެސް އިންޑިއާއިން ބުނެއެވެ.

ޣައްސާން މިފަދައިން ވިދާޅުވީ ކޮން ހެއްކެއްގެ މައްޗަށް ބުރަވެވަޑައިެގން ކަމެއް އެނގެން ނެތްއިރު އިންޑިއާއިން ރާއްޖެއަށް ހަދިޔާކޮށްފައި އޮންނަ ދެ ހެލިކޮޕްޓަރުގެ ތެރެއިން އެއް ހެލިކޮޕްޓަރު، އެންގުމަކައި ނުލައި ތ. ތިމަރަފުއްޓަށް ޖެއްސި ކަމަށް ބުނާ މައްސަލައިގައި އެމްއެންޑީއެފް އިން ފޮނުވި ކަމަށް ބުނާ ސިޓީއެއް ސޯޝަލް މީޑިއާގައި ދައުރުކުރިއެވެ.

އެސިޓީއަކީ ނަމަވެސް ސައްޚަ ސިޓީއެއްކަމާ މެދު ސުވާލު އުފެދެއެވެ. އެއީ އެ ސިޓީއަކީ އެއްވެސް ބޭފުޅަކު ސޮއިކޮށް އަދި ދައުލަތުގެ އެއްވެސް އިދާރާއެއްގެ ތައްގަޑުވެސް ޖަހާފައި ނެތް ސިޓީއަކަށްވުމުންނެވެ.