ރާއްޖޭގެ ބޮޑު ސަރަހައްދަކަށް ގައުމީ މޫސުމާ ބެހޭ އިދާރާ (މެޓް) އިން ނެރުނު ރީނދޫ ސަމާލާއި ދެކުނުގެ އަތޮޅުތަކަށް ނެރުނު ހުދު ސަމާލު ދަންމާލައިފިއެވެ.
އެގޮތުން ހއ. އަތޮޅުން ފެށިގެން ތ. އަތޮޅަށް ހެނދުނު 10:00 އިން މެންދުރު 1:30އާ ހަމައަށް ނެރުނު ރީނދޫ ސަމާލު މިހާރުވަނީ އިރުއޮއްސި 6:30 އާ ހަމައަށް ދަންމާލާފައެވެ. އަދި ލ. އަތޮޅުން ފެށިގެން އައްޑޫ ސިޓީއަށް ހެނދުނު 10:30 އިން މެންދުރު 1:30 އަށް ނެރުނު ހުދު ސަމާލުވެސް ވަނީ އިރުއޮއްސި 6:30 އާ ހަމައަށް ދަންމާލާފައެވެ.
ހއ އިން ތ.އަށް ނެރުނު ސަމާލުގައި ބުނެފައިވަނީ ގަޑިއަކު 20 މޭލާއި 30 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކުރެވޭ ކަމަށެވެ. އަދި ވިލާގަނޑުގައި ގަޑިއަކު 50 މޭލަށް ވައިގަދަވެ ކަނޑުތައް ވަރަށް ގަދަވާނެ ކަމަށް ލަފާކޮށްފައިވެއެވެ.
މީގެ އިތުރުން ލާމުން ފެށިގެން އައްޑޫ ސިޓީއަށް ނެރުނު ސަމާލުގައި ބުނެފައި ވަނީ ގަޑިއަކު 22 މޭލާއި 27 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވޭ ކަމަށެވެ. އަދި ކަނޑުތައް ގަދަވާނެ ކަމަށް ލަފާކޮށްފައިވެއެވެ.
މި ދުވަސްވަރަކީ ރާއްޖޭގެ ހުރިހާ ހިސާބަކަށް ވެސް މޫސުން ގޯސް ދުވަސްވަރެކެވެ. އެގޮތުން ވައިގަދަވުމުގެ ސަބަބުން ބައެއް ސަރަހައްދުތަކަށް ގެއްލުން ލިބުނު ކަމުގެ ރިޕޯޓުތައް ދަނީ ލިބެމުންނެވެ. އަދި ވިއްސާރަވެ ފެން ބޮޑުވުމުގެ ހާދިސާތައް ވެސް ދަނީ ހިނގަމުންނެވެ.
