ގިނަ ބައެއްގެ ލޯބި ހޯދި އެމްއެމްޕީއާރްސީގެ ޗެއަރޕާސަން އާއިޝާ ނޫރައިން ޖަނާހު މަޤާމުން އިސްތިއުފާ ދެއްވުމާއިއެކު، އިސްތިއުފާ ގަބޫލުކޮށް ޕީސީބީން އޭނާ ވަކިކޮށްފި އެވެ.

މިކަން ކަށަވަރުވެފައިވަނީ ޕީސީބީ އިން އެކްސްގައި ކުރެއްވި ޕޯސްޓެެއްގައެވެ.

އެގޮތުން އެ ޕޯސްޓްގައި ބުނެފައިވަނީ ނޫރައިންގެ އިސްތިއުފާގެ ސިޓީ 21 މެއި 2024 ގައި ލިބިފައިވާ ކަމަށެވެ. އެހެންކަމުން އިސްތިއުފާ ޤަބޫލުކޮށް، އެ މަޤާމުން އޭނާ ވަކިކޮށްފައިވާކަމަށް ވެސް ޕީސީބީން ވަނީ ބުނެފައެވެ.

ނޫރައިން އެ މަގާމުން އިސްތިއުފާ ދެއްވި ސަބަބެއް ޕީސީބީ އިން ހާމަކޮށްފައިނުވީ ނަމަވެސް ޗެނަލް 13 އަށް މައުލޫމާތު ލިބިފައިވާ ގޮތުގައި ނޫރައިން އެ މަގާމުން އިސްތިއުފާ ދީފައިވަނީ ޓުއަރިޒަމް މިނިސްޓާރ އިބްރާހިމް ފައިސަލް އަދި އެމްއެމްޕީއާރްސީގެ މެނޭޖިންގ ޑިރެކްޓާރ ފާތިމަތު ތައުފީގްގެ ފިއްތުންތައް ކުރިމަތިވެ، ނޫރައިން އަށް މަސައްކަތް ކުރަން ދަތިވުމާއި ގުޅިގެންނެވެ.

ނޫރައިން އެމްއެމްޕީއާރުސީގެ ޗެއާޕާސަން ކަމުން އިސްތިއުފާ ދެއްވާފައި ވަނީ ދުބާއީގައި މި މަހު ކުރީކޮޅު އޮތް އަރަބިއަން ޓްރެވެލް މާކެޓް (އޭޓީއެމް) ފެއާގައި އިނގިރޭސީ ބަހުން ދެއްވި އިންޓަވިއުއަކާ ގުޅިގެން އާންމުންގެ މެދުގައި މަގުބޫލުކަން ވެސް ހޯދާފައިވާ ދަނޑިވަޅެއްގައެވެ.

މި އިންޓަވިޔުގެ ފަހުން އެންމެންވެސް ނޫރައިންނަށް ތައުރީފްކުރަމުން ގެންދެވި އިރު ފައިސަލް އަދި ފާތިމަތު ތައުފީގަަށް ހުރިހާ ފަރާތްތަކުން ވެސް ދިޔައީ މަލާމަތާއި ފުރައްސާރަކުރަމުންނެވެ. އެ މަގާމްތަކަށް ކުފޫ ހަމަނުވާ ނާގާބިލް ފަރާތްތަކެއް ރައީސް މުއިއްޒު އައްޔަން ކުރައްވާފާތީ ގިނަ ބަޔަކު ވަނީ ރައީސް މުއިއްޒަށް ވެސް ފާޑުކިޔުން އަމާޒުކޮށްފައެވެ.