ވިލިމާލޭގައި ޚިދުމަތްދެމުން ގެންދިޔަ ބަގީގެ ޚިދުމަތްތައް ހުއްޓިފައިވާ އޮންނަތާ ދެމަހަށް ވުރެ ގިނަ ދުވަސްވެފައިވާ ކަމުގެ މައުލޫމާތު ލިބިއްޖެއެވެ.

ވިލިމާލޭގައި ދުއްވުމަށް ގެނެސްފައިވާ 10 ބަގީ ހަލާކުވުމާއި ގުޅިގެން، މާލެ ސިޓީ ކައުންސިލުން ވަނީ އާ ބަގީތަކެއް ގެނައުމަށް ނިންމާފައިވާ ކަމަށް މީގެ ކުރިން ހާމަކޮށްފައެވެ. ބަގީގެ ޚިދުމަތްތައް ހުއްޓިފައި އޮންނަތާ ދެމަސް ވީ އިރުވެސް، ސިޓީ ކައުންސިލުން އަދިވެސް ބުނަނީ އާ ބަގީތަކަކާއި އެކު ޚިދުމަތްތައް ވަރަށް އަވަހަށް ފަށާނެ ކަމުގައެވެ.

ޑރ މުއިއްޒު މާލެ ސިޓީ މޭޔަރު ކަމުގައި ހުންނެވިއިރު، ގެނައި މި 10 ބަގީ އަށް 2.7 މިލިއަން ރުފިޔާ ޚަރަދުކޮށްފައިވާ ކަމަށް މައުލޫމާތު ހޯދިފައިވެއެވެ. އަދި އެއީ ކޮން ގައުމަކުން އެތެރެކުރި ބަގީތަކެއް އިގެން ނެތް ކަމަށް ކައުންސިލުން ބުނެފައިވާއިރު، މި ބަގީތަކުގެ ޚިދުމަތް ދިނުމަށް މަހެއްގެ މައްޗަށް 390،000 ( ތިންލައްކަ ނުވަދިހަ ހާސް) ދިވެހި ރުފިޔާ ޚަރަދުވާކަމަށް ވެއެވެ.

ސިޓީ ކައުންސިލުން ވިލިމާލޭގައި ބަގީގެ ހިދުމަތް ފެށީ މާޗު 16، 2023 ގަ އެވެ.