ކޮންމެ އަހަރެއްގެ ވެސް ޖޫން ޖުލައި އަކީ ހުޅަނގު މޫސުމުގެ ގަދަ ވިއްސާރަ ރާއްޖެއަށް ކުރާ ދުވަސްވަރެވެ.

އެ ވިއްސާރައިގައި ނުހަނު މޫސުން ގޯސްވެ ގިނަ ގެއްލުންތައް އެކި ފަހަރުމަތިންވެފައިވެއެވެ. އެގޮތުން ދެ މޫސުން ބެދޭ ހިސާބު ކުރާ ވިއްސާރައަކީ އަދި މީގައިވެސް އެންމެ ނުރައްކާ އެއް ދުވަސްވަރެވެ. އެ ދުވަސްވަރަކީ ގަދަ ވަޔާއެކު އެކި ހިސާބުތަކުން މުލުން ގަސް ގަހާ ގެހިވެސް ލުހެލާ ވިއްސާރައަކަށް އޮންނަނީ ވެފައެވެ.

ނަމަވެސް މިފަަހަރުގެ ހުޅަނގު މޫސުމުގެ ވިއްސާރައިގެ އަސަރު ފޯރީ ހަަމައެކަނި ގޭގެއަށާ ތަކެއްޗަށް އެކަންޏެއް ނޫނެވެ. މި ފަހަރުގެ ވިއްސާރައިގައި ގެއްލުން ލިބުނު ފަރާތްތަކުގެ ތެރޭގައި ސަރުކާރުގެ މަތި ފަޑި ވެސް ހިމެނެއެވެ.

ދުރު ނޫން މާޒީއަކަށް ޖެހިލާއިރު އިއްޔެގެ ހަވީރު ވެގެން ދިޔައީ މުޅި ސޯޝަލް މީޑިޔާއާ ނޫސްތަކުގެ ސުރުޚީ ވެސް މުހިއްމު އަދި ސަޕްރައިޒިން ހެޑްލައިންއަކުން ފުރާލި ވަގުތަކަށެވެ.

މި ސަރުކާރުގައި އެންމެ ފުރަތަމަ ސަސްޕެންޝަން އެއް އައި އެމްޑީ އުފް ސީއީއޯ، މިފްކޯގެ ސީއީއޯގެ މަގާމުން ވަކި ކުރީއެވެ. ޕީސީބީއިން މިކަން ކަށަވަރުކޮށްދީފައިވާއިރު އޭނާގެ ލޮބުވެތި އަނބިކަބަލުން، މިސަރުކާރުގެ އެންމެ ނާގާބިލު އެއް ޑެޕިއުޓީ އަމާނީ މުހައްމަދު އުފް އަމްސޫދާ ބުނާ ގޮތުން ސަމާހުއަށް ދިނީ ޕްރޮމޯޝަންއެކެވެ. ގަތް ލަދުގެ ބޮޑު ކަމުން ހަގީގަތް ފޮރުވަން ވެގެން އަމާނީ ބުނެފައިވާ ގޮތުގައި އޭނާގެ ފިރިމީހާއަށް ފަތްކޮޅަކާ އެކު މަގާމުގެ ކުރިއެރުން ދިނީއެވެ.

ނަމަވެސް ސަރުކާރު އެތުރި ތަރުތީބުވެފައިވާ ގޮތަށް ބަލާއިރު އެމްޑީއެއްގެ ލެވެލްއިން ސްޓޭޓު މިނިސްޓަރެއްގެ ލެވެލްއަށް ބަދަލުކުރުމަކީ މަގާމުގެ ދަށް ކުރުމެކެވެ. ނުވަތަ ޑިމޯޝަންއެކެވެ.

ކޮންމެ އަކަސް ކޮރަޕްޝަންގެ ރެކޯޑަކާ އެކު މަގާމުން ވަކިކުރި ސަމާހު މިހާރު ވަނީ ފިޝަރީޒް މިނިސްޓްރީގެ ސްޓޭޓަކަށް ބަދަލުކޮށްފައެވެ.

އެ ވާހަކަ އަދި ހޫނުކަން ނުކެނޑެނީސް ދެން އިވުނީ އެމްއެމްޕީއާރުސީގެ ޗެއަރޕާސަންގެ މަގާމުން ނޫރްއައިން އަލީ ޖަނާހު އިސްތިުފާދިން ވާހަކައެވެ. ވެގެން އުޅޭ ގޮތް ސާފުކޮށްލުމުން އެނގުނީ ނޫރްއައިންއަށް ދާދި ފަހުން ލިބުނު މަޝްހޫރުކަން، ޓުއަރިޒަމް މިނިސްޓަރު އިބްރާހިމު ފައިސަލްއަށާ އެމްއެމްޕީއާރުސީގެ އެމްޑީ ފާތިމަތު ތައުފީގަށް ހަޖަމް ނުވެގެން ނޫރުއައިނަށް ޖެއްސުންކޮށް ފުރައްސާރައާ ތުރާ ޖައްސަން ފެށުމުން ނޫރުއައިން އިސްތިއުފާ ދިނީ ކަމެވެ. ނޫރުއައިން އިސްތިއުފާ ދިންތާ މާގިނައިރު ތަކެއް ނުވެ އެ ބޯޑުގައި އިންނަވާ މަޓީ ތަމްސީލު ކުރައްވާ މެމްބަރުވެސް ވަނީ އިސްތިއުފާ ދީފައިވެއެވެ. ނުކިޔަވާ ތިބި ތަންދޮރު އޮޅުން ނުފިލާ ބަޔަކު ދަށުވެގެން އެއްވެސް ފަދައެއް ތިބި ބަޔަކު ނުތިބޭނެތާއޭ ބުނެ ގިނަ ބަޔަކު ސަރުކާރުގެ ވެރިންނަށް ނުރުހުން އަމާޒުކުރަން ފެށިއެވެ.

މި ކަންތައް ގަނޑަށް ފަހު ރޭގަނޑުގެ ނިންޖަށް އިންސާފުކޮށްލުމަށްފަހު ހޭލެވުނުއިރު އަސްތާ ކަމަކު ދާކަށް ނެތެވެ. ކުރަމުން ދާ ވިއްސާރައިގައި ނުހަނު ބާރުގަދަ ކޮޅި ގަނޑެއްގައި ޖެހި އެމްއެމްޕީއާރުސީގެ އެމްޑީގެ ގޮނޑި ކޮޅުން ކުޑީ އުފް ފާތިމަތު ތައުފީގު ވިއްސައިގެން ގޮސް އިނދަ ޖެހިއްޖެއެވެ.

ގިނަ ބަޔަކު ސިފަކުރާ ގޮތުގައި މިއީ ވަގުތީ ކަމަކެވެ. އަނެއްކާވެސް ކޮންމެ އެހެން މަގާމަކަށް އައްޔަން ކުރާނެއެވެ. އެއީ ނުވުމަށްވުރެ ވުން އެކަށީގެންވާ ކަމެކެވެ. ނަމަވެސް ކުޑީ ބޭރުކޮށްލީ ވަރަށް ހުތުރުކޮށެވެ. ވައްކަމުގެ ބޮޑު ތުހުމަތަކާ ވެސް އެކުއެވެ. ވީގޮތެއް ވީ ކިހިނެއްކަމެއް ދެކެ ދެނޮވޮޑިގެން ވާނީ މާތް ކަލާނގެއެވެ.

އަދި މިވަރުން ނިމުނީއެއް ނޫނެވެ. ސްޕޯޓްސް މިނިސްޓްރީގެ ޑެޕިއުޓީއެއްގެ މަގާމުގައި ހުންނެވި އަލީ ޝިފާޒު އުފް ޖޯރޭ އުފް ނާޅީ ވަނީ ސަސްޕެންޑްކޮށްފައެވެ. ސަބަބު ބަޔާންނުކުރި ނަމަވެސް ސްޕޯޓްސް މިނިސްޓްރީގެ އިސް އޮފިޝަލަކުވަނީ މިކަން ޔަގީން ވެސް ކޮށްދީފައެވެ.

ކުރަމުން މިދަނީ ހުޅަނގުގެ މޫސުމުގެ ވިއްސާރަކަމަށް މެޓުން ބުނެފައިވާއިރު މި ވިއްސާރަ ރާއްޖޭގެ ސިޔާސީ މަސްރަހަށް ވެސް މިދަނީ ގަދަ ކޮޅި ގަނޑުތަކުގައި ޖައްސަމުންނެވެ.

ކޮރަޕްޝަނާ ފަސާދައިގެ މޫތައް އެންމެ ހަ މަސް ދުވަހުގެ ތެރޭގައި މުޅި ސަރުކާރު ތެރެއަށް ފެތުރި މިއޮތީ ވާ ގަދަ ކޮޅި ގަނޑެއްގައި ޖެހިފައިތާއެވެ. ރައީސް މުއިއްޒުއެވެ. ދިޔަ ވަތް ރަގަޅު އޮޑި ރިޔަލަށް ކެރެންޏާ ވިޔަކަސް ރޫޅާ ބޮޑު ދީއްލާ ނުލައްވާށެވެ. މިވަރަށް ދުވާ ނަމަ ނިވަލަށް ނެދެވެނީސް ބީއްސަލާފާނެއެވެ.

ދިވެހި ރައްޔިތުން މިއަދު ތިބީ ޖޫން ޖުލައި ގަދަ ކުރިމަތިވެ ދުއްވާނު އޮޑި މަޑު ޖެހިދާނެތީ ކަންބޮޑުވެފައެވެ. ހުންގާނަކީ މޮޅު ލަކުޑިއެއް ކަމާމެދު ގިނަ ބަޔަކު ސުވާލު އެބަކުރެއެވެ. ވަތުގަ ހުރި ގޮތް ރަގަޅަށް ބަލަން އެތައް ބަޔަކު ދަނީ ގޮވަމުންނެވެ.

ހަޑިވެ އުދަރެސް ނުފެނި ގޮސް ބަނޑިލާ ނަގާ ބޯމަތިކޮށް ނިމިއްޖެއޭ ވެސް ގިނަ ބަޔަކު ގެންދަނީ ބުނަމުންނެވެ.

މިއާއެކު އަޅުގަޑު ބުނެލަން އޮތީ، ޕިކްޗަރު އަބީ ބާކީ ހެ މެރީ ދޯސްތޯ. އާގެ އާގެ ދެކޯއެވެ.