މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ޑީއެމްޑީ ބައްސާމް އާދަމް،ހިންގި ޖިންސީ ފުރައްސާރައިގެ މައްސަލާގައި ފުރިހަމަ ތަހުގީގެއް ހިންގާފައި ނުވާކަމަށާއި އޭގެ ސަބަބުން ކުންފުނީގެ މުވައްޒަފުންގެ މަސައްކަތު މާހައުލުގެ ރައްކާތެރިކަމަށް އަސަރުކޮށްފައިވާ ކަމަށް ކުންފުނީގެ ޗެއާޕާސަންގެ މަގާމުން އިސްތިއުފާދެއްވި އައިޝާ ނޫރައިން ޖަނާހު ހާމަކޮށްފިއެވެ.

މިފަދައިން ނޫރައިން ވިދާޅުވެފައިވަނީ އިސްތިއުފާގެ ސިޓީއާއެކު ޗެއާޕާސަންގެ ދައުރުގައި ފާހަގަކުރެވުނު ކޯޕަރޭޓް ގަވަނެންސާ ހިލާފު ކަންކަމާއި ގުޅޭ ރިޕޯޓެއް އިނގިރޭސި ބަހުން ހުށަހެޅުމަށްފަހުގައެވެ.

އެގޮތުން ނޫރައިން ވިދާޅުވީ އޭޕްރީލް 1 ގައި، އެމްއެމްޕީއާރްްސީ އިން ބަލަން ފެށި ޖިންސީ ފުރައްސާރައިގެ ތަހުގީގު ކުރިއަށްދިޔަ އިރު، ޖިންސީ ފުރައްސާރައިގެ ތަހުގީގުތައް ހިންގުމުގައި އަމަލުކުރަން އޮންނަ ޕްރޮފެޝަނަލް މިންގަނޑުތަކަށް އެމްއެމްޕީއާރުސީގެ މެނޭޖްމަންޓުން އަމަލުކޮށްފައިނުވާކަމަށެވެ.

އަދި އެ ތަހުގީގު ހިންގާފައިވަނީ ގޯސްކޮށް ކަމަށްވެސް އޭނާ ވަނީ ފާހަގަކޮށްފައެވެ.

ޑިރެކްޓަރުންގެ ބޯޑުގެ ލަފަޔާއި ގާނޫނީ ލަފާ ވެސް މެނޭޖުމަންޓުން ބަލައިގަނެފައި ނުވާކަމަށާއި މިއަދާ ހަމައަށް ވެސް ޖިންސީ ފުރައްސާރައިގެ ތަހުގީގުގެ މަރުހަލާތަކާއި ތަހުގީގު ރިޕޯޓު ބޯޑް އޮފް ޑިރެކްޓަރުންނާ ހިއްސާކުރަން މެނޭޖުމަންޓުން ވަނީ ދެކޮޅު ހަދާފައި ކަމަށް ވެސް ނޫރައިން ވަނީ ވިދާޅުވެފައެވެ.

ނޫރައިންގެ ވާހަކަތަކުން ދޭހަވެގެންދަނީ އެ ކުންފުނީގެ އެމްޑީކަމުގައި އޭރު ހުންނެވި ފާތިމަތު ތައުފީގް ބައްސާމް ސަލާމަތް ކުރުމުގައި އެ މައްސަލަ ނުބަލައި ދޫކޮށްލިކަމެވެ.

ނޫރައިންގެ އިސްތިއުފާގެ ޚަބަރު ޕީސީބީން އާންމު ކުރުމާއެކު ދެން އިވިގެންދިޔައީ އެ ކުންފުނީގެ އެމްޑީ ކަމުގައި ހުންނެވި ފާތިމަތު ތައުފީގް ( ކުޑީ) އެ މަގާމުން ވަކި ކުރި ކަމުގެ ޚަބަރެވެ. ކުޑީ މަގާމުން ވަކި ކުރި ސަބަބު އަދި ސާފުވެފައި ނުވީ ނަމަވެސް މައުލޫމާތު ލިބުނު ގޮތުގައި ކުޑީ އެ މަގާމުން ވަކިކޮށްފައިވަނީ އޭނާގެ މައްޗައް ހިޔާނާތުގެ ބޮޑު ތުހުމަތެއް ކުރެވިގެންކަމަށެވެ.