ސަރުކާރުގެ މަތި ފަޑީގެ ގިނަ މަގާމުތަކަކުން ބޭފުޅުން ވަކިކުރދަމުންދާ ދަނޑިވަޅެއްގައި އަނެއްކާވެސް އިސް މަގާމަކުން ބޭފުޅަކު ވަކިކޮށްފިއެވެ.

މި ފަހަރު މަގާމުން ވަކިކޮށްފައިވަނީ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ ޗެއަރމަންގެ މަގާމުގައި ހުންނެވި އަހުމަދު ޒުހޫރުއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑޫން އެ ބޯޑުގެ އެކްސް ހެންޑްލްގައި ކުރި ޕޯސްޓެއްގައި ހާމަކޮށްފައިވަ ގޮތުގައި އެ ބޯޑުން ވަނި ޒުހޫރު އެޗްޑީސީގެ ޗެއަރމަންގެ މަގާމުންނާ އަދި އެޗްޑީސީގެ ބޯޑުގެ ޑިރެކްޓަރު ކަމުން ވެސް ޒުހޫރު ވަނީ ވަކިކޮށްފައެވެ. ނަމަވެސް އޭނާ ވަކި ކުރި ސަބަބެއް ޕީސީބީއިން ހާމަކޮށްފައިނުވެއެވެ.

ޒުހޫރު އެ މަގާމަށް ޕީސީބީން އައްޔަން ކުރީ މިދިޔަ ފެބްރުއަރީ މަހުގެ ތެރޭގައެވެ.

ޒުހޫރުގެ ވަކިކުރުމާ އެކު،ފާއިތުވި 24 ގަޑިއިރުގެ ތެރޭގައި ސަރުކާރުގެ މަތި ފަޑިން މަގާމުން ވަކިކުރި މީހުންގެ އަދަދު ވަނީ ތިނަކަށް އަރާފައެވެ. ތޭރަ އޮންލައިނަށް މައުލޫމާތު ލިބިފައިވާ ގޮތުގައި އަދިވެސް ސަރުކާރުގެ މަގާމުތަކަށް ބޮޑެތި ލޮޅުންތައް އެރުން ވަނި ގާތުގައެވެ.

ޒުހޫރު މަގާމުން ވަކިކޮށްފައިވާއިރު، މިފްކޯގެ ސީއީއޯގެ މަގާމުގައި ހުރި އަހުމަދު ޝަމާހުވެސް ވަނީ އެ މަގާމުން ވަކިކޮށްފައެވެ. އަދި އެމްއެމްޕީއާރުސީގެ އެމްޑީގެ މަގާމުގައި ހުރި ފާތިމަތު ތައުފީގު (ކުޑީ) ވެސް ވަނީ މަގާމުން ވަކިކޮށްފައެވެ.