ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން މުދާ އެތެރެކޮށް މަންފާ ހޯދި ކަމަށް ތުހުމަތު ކުރެވޭ މއ. ހަނީސަކްލް-1/ ހުސައިން ޝިފާއުއަށް ސިޔާސީ މަގާމެއް ދެވުނީ އޮޅުމަކުން ކަމަށް ރައީސް އޮފީހުން ހާމަކޮށްފިއެވެ.

ޝިފާއު މި ސަރުކާރުން އެނިމަލް ވެލްފެއާ މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމަށް އައްޔަންކުރީ މީގެ ހަތަރު ވަރަކަށް ދުވަސް ކުރިންނެވެ.

ނަމަވެސް ޝިފާއުއަށް ސިޔާސީ މަގާމެއް ދީފައިވާކަން މީޑިއާތަކުން ރިޕޯޓް ކުރުމުން ސަރުކާރުން ވަނީ އެރި އޮޅުމަކުން ދެވުނު މަގާމެއްކަމަށް ބުނެ މަގާމުން އޭނާ ވަކިކޮށްފައެވެ.

މިކަމާ ގުޅިގެން ސަރުކާރުގެ އިސް ތަރުޖަމާނު ހީނާ ވަލީދު ވިދާޅުވީ، ޝިފާއު އެ މަގާމަށް ހަމަޖެއްސިއިރު، އޭނާއަށް ތުހުމަތުކުރާ ކަންކަމުގެ މައުލޫމާތުތައް ހުރީ ނުލިބި ކަމަށެވެ. އެ ދައުވާތަކުގެ ތަފްސީލް ލިބުމާ އެކު އޭނާ މިއަދު މަގާމުން ވަކިކޮށްފައިވާ ކަމަށް ހީނާ ވިދާޅުވިއެވެ.

ސިޔާސީ މަގާމްތަކަށް އައްޔަންކުރާ މީހުންގެ ބެކްގްރައުންޑް ރައީސް އޮފީހުން ބަލަ އެވެ. މި ކޭސް މިގޮތަށް ދިމާވުމުން އިތުރަށް އެކަން ހަރުދަނާކޮށް ތަކުރާރު ނުވާނެ ގޮތަށް ސަރުކާރުން ފިޔަވަޅު އަޅާނެ ކަމުގެ ޔަގީންކަން ހީނާ ދެއްވިއެވެ.

ޝިފާއުގެ މައުލޫމާތު ނުލިބި އޭނާއަށް ސިޔާސީ މަގާމެއް ދިންކަން ސަރުކާރުން ބުނި އިރު، އޭނާއަށް ތުހުމަތު ކުރެވޭ މައްސަލައިގައި ދައުވާ ކޮށްފައި ވަނިކޮށް ރާއްޖެއިން ބޭރަށް ގޮސް ފިލައިގެން އުޅޭތީ އޭނާ ހޯދަން އިންޓަޕޯލް ރެޑް ނޯޓިސް ވެސް ނެރުނެވެ. އެކަން މީޑިއާތަކުންނާއި ފުލުހުން އަދި ޕްރޮސިކިއުޓާ ޖެނެރަލްގެ އޮފީހުގެ ރެކޯޑްތަކުންވެސް ފެންނާނެއެވެ.

ތޭރަ އޮންލައިނަށް މައުލޫމާތު ލިބިފައިވާ ގޮތުގައި މިއީ މަޖިލިސް އިންތިހާބާ ދިމާކޮށް ރިޝްވަތުގެ ގޮތުގައި ބަހަން ފެށި މަގާމުތަކަށް ފޮނުވި ސީވީއެއް ކަމަށެވެ. އަދި މިއީ ރައީސް މުހައްމަދު މުއިއްޒުގެ ވަރަށް އަރިސް ބޭފުޅެއްގެ ރިކަމެންޑޭޝަނެއް ކަމަށް ވެސް މައުލޫމާތު ލިބިފައިވެއެވެ.

މި ފަދަ ބޮޑު އޮޅުމެއް ސަރުކާރަށް އަރާފައިވާއިރު އެގްރިކަލްޗަރ މިނިސްޓަރަކަށް ހުންނަވަނީ ރައީސް މުއިއްޒުގެ އަނބިކަނބަލުން މެޑަމް ސާޖިދާ މުހައްމަދުގެ ވަރަށް އަރިސް ބޭފުޅެއް ކަމަށްވާ ޑރ. އައިޝަތު ރަމީލާ ކަން ވެސް ފާހަގަކޮށްލެވެއެވެ.

އިތުރު މީހަކާ ބައިވެރިވެގެން “ކިންގްޑަމް އޮފް ފްރުޓްސް” މެދުވެރިކޮށް ރާއްޖެ އިން ބޭރުގެ ކުންފުނިތަކުން މުދާ ރާއްޖެ އެތެރެކޮށް އެ މުދަލަށް އެ ކުންފުނިތަކަށް ދައްކަންޖެހޭ ފައިސާގެ ސައްހަ ނޫން ލިޔުން އުފައްދައި ހުށަހެޅި މައްސަލައިގައި ފުލުހުން ޝިފާއު ހައްޔަރުކުރީ 28 މާޗް 2023ގަ އެވެ.

އޭނާގެ މައްޗަށް ދައުލަތުން 23 ދައުވާއެއް އުފުލާފައިވެ އެވެ. އޭގެ ތެރޭގައި ހިމެނެނީ ދިވެހިރާއްޖޭގެ ގާނޫނުލްއުގޫބާތުގެ ދަށުން އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ ނުވަ ދައުވާއަކާއި ގާނޫނުލްއުގޫބާތުގެ ދަށުން މަކަރާއި ހިލާތް ހެދުމުގެ ހަތް ދައުވާއެއްގެ އިތުރުން މަނީ ލޯންޑަރިންގެ ހަތް ދައުވާއެކެވެ.