2023ގައި ދިވެހީން ވެރިކަން ބަދަލުކުރީ ޖުމްލަ ތިން ކަމެއްގެ މައްޗަށް ބަލާފައިކަން އެއީ އޮޅުވާލެވެން ނެތް ހަގީގަތެކެވެ.

އެ ތިން ކަމަކީ ރައީސް އަބްދުﷲ ޔާމީނަށް ދެމުން ދިޔަ ނުހައްގު އަނިޔާ، ރާއްޖޭގައި އިންޑިއާ ސިފައިން ގައިމުވެ ތިބި ތިބުން ނިމުމަކަށް ގެނައުމުގެ އިތުރުން ކަނޑު ވިއްކާލި މައްސަލައެވެ. މި ނޫނަސް އެކި ކަންކަން ހުރިއިރު މިއީ މައި ގަނޑު ކަންކަމެވެ.

އޭގެ ތެރެއިން އެންމެ ބޮޑު އެއް ޕްލެޖް ނުވަތަ ވައުދުކަމަށްވާ، އިންޑިއާ ސިފައިން ބޭލުމުގެ ވައުދު ފުއްދާފައިވާ ކަމަށް ސަރުކާރުން މެޑަލް ޖަހަމުން ގެންދާއިރު މި ކަމާ ގިނަ ބަޔަކު ގެންދަނީ ސުވާލު ކުރަމުންނެވެ. އެހެނީ ވައުދުވެވަޑައި ގެންނެވީ އިންޑިއާ އަސްކަރިއްޔާ ރާއްޖެއިން ފޮނުވާލުމަށެވެ.

ނަމަވެސް ވައުދު ފުއްދި ކަމަށް ބުނެ މެއި ދިހަ ވަނަ ދުވަހު މެޑަލް ޖެއްސެވިއިރު ވައުދުވީ ފަދައިން މިލިޓަރީ ބޭރު ނުކުރެވެއެވެ. ބޭރު ކުރެވުނީ އެމީހުން ބޫޓު ނުވަތަ އެންކަލްއެވެ.

އެހެން ބުނަން ޖެހޭ ސަބަބުތައް އެބަ ހުއްޓެވެ. އެއް ސަބަބަކީ ފޮނުވާލި ކަމަށް ބުނާ ސިފައިންގެ ކޮންމެ މީހަކަށް އިންޑިއާގެ ޑިފެންސް މިނިސްޓްރީއިން ހިންގާ ކުންފުނި، ހިންދުސްތާން އެރޮނޮޓިކްސް ލިމިޓެޑް (އެޗްއޭއެލް)ގެ ޓްރެއިންޑް އާރމީ އޮފިސަރުންނެވެ. ދެން މިއިން ދޭހަވަނީ ކޮން އެއްޗެއްތޯއެވެ؟

އެއިން ކޮންމެ މީހުންނަކީ ހިންދުސްތާނު ދައުލަތުގެ ވައިގެ އުޅަދު ފަހަރާއި ސަލާމަތީ އުޅަދު ފަހަރު އުފައްދާ ހިންގާ ބަލަހައްޓާ ކުންފުނީގެ މީހެކެވެ.

ހިންދުސްތާން އެރޮނޮޓިކްސް ލިމިޓެޑް (އެޗްއޭއެލް) އަކީ އިންޑިއާގެ ހަނގުރާމަ މަތީ ވައިގެ އުޅަނދު ފަހާރާއި ޖާސޫސީ ވައިގެ އުޅަދުފަހަރު އުފައްދަނީ އިންޑީއާގެ ހަލް އިންނެވެ. ހިންދުސްތާން އެރޮނޮޓިކްސް ލިމިޓެޑް (އެޗްއޭއެލް) އަކީ މައި އޮފީސް ބެންގަލޫރުގައި ހުންނަ ސައްތައިން ސައްތަ އިންޑިއާ ސަރުކާރުގެ (ދައުލަތުގެ) ކުންފުންޏެކެވެ. 23 ޑިސެމްބަރ 1940 ގައި އުފެދުނު އެޗް.އޭ.އެލް އަކީ ދުނިޔޭގެ އެންމެ ދުވަސްވީ އަދި އެންމެ ބޮޑު އެއް އެއަރޮސްޕޭސް އާއި ދިފާއު އުފައްދާ އެއް ކުންފުންޏެވެ.

މީގެ އިތުރުން އިންޑިއާގެ އަސްކަރީ ކުންފުނީގެ ގަވާއިދު އޮންނަ ގޮތުން ނަމަ އެ ކުންފުނީޣެ އެއްވެސް އަސްކަރި އުޅަނދެއް އަސްކަރި ތަމްރީނު ނެތް މީހަކަށް އޮޕަރޭޓު ނުކުރެވޭނެއެވެ. އެހެންކަމުން ދިވެހިންގެ ގާބިލުކަން ނެތޭ ކިޔާ ދިވެހީންގެ އަގު ވައްޓާލުމަށް ފަހު ފޮނުވާލި ކޮންމެ ގަންބޫޓަކަށް ފައިވާން ޖޯޑެއް ގެނެސްގެން މިކުޅެނީ ޑްރާމާ ނޫން ދެވަނަ އެއްޗެއް ނޫނެވެ.

އިންޑިއާގެ ޑިފެންސްގެ ފުރިހަމަ ބާރުގެ ދަށުން ހިންގާ ކުންފުންޏެއްގެ ބަޔަކު ރާއްޖޭގައި ތިބުމާއި އެ މީހުންގެ ފުރިހަމަ ކޮންޓްރޯލްގެ ދަށުން ހެލިކޮޕްޓަރުތައް އޮޕަރޭޓް ކުރުމާއި ކުރިއާ އޮތީ ކޮން ތަފާތެއްތޯއެވެ؟ ދެން ވެސް ހެލިކޮޕްޓަރު ދުއްވާނީ ޑިފެންސްގެ ބާރު އޮތް އިންޑިއާގެ މި މުވައްޒަފުންނެވެ. ދިވެހި ސިފައިންނަކަށް އެ އުޅަނދުތަކެއް ނުދުއްވެއެވެ.

އިންޑިއާ އައުޓު ގޮވަމުން ވެރިކަމަށް އައިސް އިންޑިއާ އުނގު ތެރެއަށް ވެއްޓި ޕްރޯ މޯލްޑިވްސް ސިޔާސަތު މިވެގެން ދިޔައީ ޖަމަލު ފޮޑިއަކަށްތާއެވެ.

އިންޑިއާ ސިފައިން ބާލާ މަދަނީން ގެންނަ ނަމުގައި ޑރ. މުއިއްޒު މިހެދީ މާބޮޑު ގޯހެކެވެ. އިންޑިއާ ސިފައިން ބޭލިކަމަށް ބުނެ އިންޑިއާ ސަރުކާރުގެ ޑިފެންސް މިނިސްޓްރީ މެދުވެރިކޮށް އިންޑިއާގެ ރައީސް އައްޔަންކުރާ ޑިރެކްޓަރުންގެ ބޯޑަކުން ހިންގާ ހަނގުރާމަ މަތީ ވައިގެ އުޅަނދު އުފައްދާ ހިންގާ ބަލަހައްޓާ ކުންފުނިން ރާއްޖޭގައި ދެ ހެލްކޮޕްޓަރާއި ޑޯނިއާ މަތިންދާ ބޯޓު ދުއްވަން ހަވާލު ކުރުމުން ގައުމީ ސަލާމަތަށް އޮތް ނުރައްކާ މާބޮޑެވެ.