ބެލެނިވެރިންނަށް ގޮން ޖަހާ އަރަބިއްޔާ ސްކޫލުގައި ދެ ޖިންސު މަސްހުނިކޮށް ކިޔަވައިދޭން އަނެއްކާވެސް ފަށައިފިކަން ހާމަވެއްޖެއެވެ.

އަރަބިއްޔާ ސްކޫލަކީ މާލެގަިއ ހުރި އަރަބި އިސްލާމީ ތައުލީމުދޭ ހަަމއެކަނި ސްކޫލަށްވެފައި ދީނަށް އަހުލުވެރިކުރުވާ އަރަބި ތައުލީމު އުނގަންނައިދޭން އިސްކަންދޭ ބެެލނިވެރިން ކުދިން ފޮނުވާ ހަމައެކަނި ސްކޫލަކީ އެ ސްކޫލެވެ.

އެގޮތުން ނިމި ދިޔަ ސަރުކާރުގައި އެ ސްކޫލާ މެދު ގިނަ އިހުމާލުތަކެއްވެފައިވާއިރު އެ އިހުމާލުތައް ބަޅާ އެ ސްކޫލަކީ ވެސް ތައުލީމީ ދާއިރާގައި އުސްމިނަށް ދަތުރުކުރެވޭނެ ފަދަ ތައުލީމެއް ދެވޭނެ ސްކޫލަކަށް ހެދުމަކީ ރައީސް މުހައްމަދު މުއިއްޒުގެ ވައުދެކެވެ.

މި އަހަރުގެ ދިރާސީ އަހަރު އާދިއްތަ ދުވަހު ފެށުނުއިރު އަރަބިއްޔާގައި ވެސް ކިޔެވުން ފަށާފައިވެއެވެ. ނަމަވެސް އަރަބިއްޔާ ފެމިލީގެ ނަމުގައި ހިންގާ އެކްސް އެކައުންޓުން ކުރި ޕޯސްޓެއްގައިވަނީ އެ ސްކޫލުގައި ދެ ޖިންސު މަސްހުނިކޮށް ކިޔަވައިދޭތީ ކަންބޮޑުވުން ފާޅުކޮށްފައެވެ.

އެގޮތުން އެ ސްކޫލުގެ ޑެޕިއުޓީ ޕްރިންސިޕަލް އަޒުމާ ވަނި ބެލެނިވެރިންގެ އެދުމަށް ގޮން ޖަހާ ގްރޭޑު 12ގެ ސައިންސް ސްޓީމުގެ ކުދިންނަށް ދެ ޖިންސު މަސްހުނިކޮށް ކިޔަވައިދޭން ފަށާފައި ކަމަށް އެ ޕޯސްޓުގައިވެއެވެ.

މިކަމާ ގުޅިގެން ނަން ހާމަނުކުރުމަށް ޝަރުތުކޮށް އަރަބިއްޔާގެ ބެލެނިވެރިއަކު ތޭރަ އޮންލައިނަށް މައުލޫމާތު ދެމުން ބުނެފައިވަނީ މިއީ ނިމިދިޔަ އަހަރުތަކުގައިވެސް އެ ސްކޫލަށް ދިމާވި ކަމެއް ކަަމށާ ނަމަވެސް 2019 ވަނަ އަހަރު އޭރުގެ ތައުލީމީ ވަޒީރު ޑރ. އައިޝަތު އަލީ ވަނި އަރަބިއްޔާގައި ކިޔަވައިދޭން ޖެހޭނީ ދެ ޖިންސު ވަކިން ކަމަށް ވިދާޅުވެ އެގޮތަށް ނިންމަވާފައި ކަމަށް ވީ ނަމަވެސް އޭގެ ފަހުންވެސް މި ގޮން ޖެހުން ސްކޫލުގެ ދަރިވަރުންނަށް ކުރިމަތިވެފައިވާ ކަމަށެވެ.

މި އަހަރުވެސް ބެލެނިވެރިން ވާނީ ސްކޫލުގައި ތަކުރާރުކޮށް މި ގޮތަށް އެކަން ނުކުރުމަށް އެދިފައިކަމަށާ ނަމަވެސް ދިރާސީ އަހަރު ފެށުނީ ދެ ޖިންސު މަސްހުނިކޮށް ގްރޭޑު 12ގެ ސައިންސް ސްޓްރީމުގެ ދަރިވަރުންނަށް ކިޔަވައިދިނުމާ އެކު ކަން ހާމަކޮށް އެ ބެލެނިވެރިޔާ ވަނީ މިއީ ކަންބޮޑުވުމެއްގެ ގޮތުގައި ފާހަގަކުރައްވާފައެވެ.

މިކަމާ ގުޅިގެން އަރަބިއްޔާ ސްކޫލުގެ ބަހެއް ހޯދަން ކުރި މަސައްކަތް ސްކޫލުގެ އެއްވެސް އިސް ވެރިއަކު ފޯނަށް ޖަވާބު ނުދެއްވާތީ ވަނީ ލިބޭ ގޮތް ނުވެފައެވެ.