ސަރުކާރުގެ ވުޒާރާތަކަށް އައްޔަންކޮށްފައިވާ ޕޮލިޓިކަލް ޑިރެކްޓަރުންގެ މުސާރަ ކުޑަ ކުރަން ނިންމައިފިއެވެ.

ނަން ނުޖެހުމަށް ޝަރުތުކޮށް ރައީސް އޮފީހުގެ އިސް އޮފިޝަލެއް ވަނީ ޗެނަލް 13 އަށް މިކަން ކަށަވަރުކޮށްދީފައެވެ.

މުސާރަ ކުޑަކުރަން ނިންމާފަައިވަނީ މާލީ ހާލަތު ދަށްވުމުންނެވެ.

ސީނީއަރ ޕޮލިޓިކަލް ޑިރެކްޓަރުން އަދި ޕޮލިޓިކަލް ޑިރެކްޓަރުން ތިބޭ އިރު، ސީނީއަރ ޕޮލިޓިކަލް ޑިރެކްޓަރުންނަށް މިހާރު ލިބެނީ 25،500 ރުފިޔާއެވެ. އަދި ޕޮލިޓިކަލް ޑިރެކްޓަރުންނަށް 20،500 ރުފިޔާ ލިބެއެވެ.

ނަމަވެސް މުސާރައަށް ގެންނަ ބަދަލާއެކު މި ފަރާތްތަކަށް ލިބިގެންދާނީ 14000 ނުވަތަ 15000އެވެ.

މަޖިލިސް އިންތިޚާބާ ދިމާކޮށް ސަރުކާރުން ވަނީ ވުޒާރާތަކަށް ގިނަ އަދަދެއްގެ ޕޮލިޓިކަލް ޑިރެކްޓަރުން އައްޔަންކޮށްފައެވެ.

ޕޮލިޓިކަލް ޑިރެކްޓަރުގެ މަގާމުގައި ހުންނެވި ފަރާތެއް ނަން ހާމަ ނުކުރުމަށް އެދި ޗެނަލް 13 އަށް މައުލޫމާތު ދެމުން ބުނީ ވަޒީފާގައި ކުރަން ޖެހޭ މަސައްކަތެއް ނޯންނަކަމަށެވެ. އަދި ވަޒީފާ އަދާ ކުރުމަށްޓަކައި އިށީންނާނެ ގޮނޑިއެއް ވެސް ކުޑަމިނުން ނުހުންނަ ކަމަށެވެ. މިކަން މިހެންވެފައި ވަނީ ވުޒާރާއެއްގައި 20 އަށް ވުރެ ގިނަ ޕޮލިޓިކަލް ޑިރެކްޓަރުން ތިބުމުން ކަމަށް ވެސް އެ ފަރާތްތަކުން ވަނީ ބުނެފައެވެ.

މަތިބަރު ނުވާނެކަމަށް ބުނެ ވެރިކަމަށް އައި ސަރުކާރުގެ ވެރިކަމުގައި ސިޔާސީ މަގާމްތައް ވަނީ 3000 އަށް ވުރެ ގިނަ ވެފައެވެ. ނަމަވެސް ރިޔާސީ އިންތިޚާބްގެ ކެމްޕެއެއިން ދުވަސް ވަރު ރައީސް މުއިއްޒު ވިދާޅުވީ ސިޔާސީ މަގާމް 700 އަށްވުރެ ގިނަ ނުކުރާނެކަމަށެވެ.

މި ސަރުކާރުގެ ޑެޕިޔުޓީ މިނިސްޓަރުންނާ، ސްޓޭޓް މިނިސްޓަރުންނާ، ޕޮލިޓިކަލް ޑިރެކްޓަރުން ވަނީ ހުރިހާ ވުޒާރާއަކަށް ވެސް ގިނަ ވެފައެވެ.