ހޯމް ލޭންޑް އެންޑް ސެކިއުރިޓީ މިނިސްޓްރީގެ ޑެޕިއުޓީ މިނިސްޓަރު އަމާނީ މުހައްމަދު އޮފީހަށް ނުނިކުމެ މުސާރަ ނަގާތާ އެތައް ދުވަހެއްވެފައިވާ ކަން ހާމަވެއްޖެއެވެ.

އަމާނީ އެ މަގާމަށް ރައީސް ޑރ. މުހައްމަދު މުއިއްޒު އައްޔަން ކުރެއްވީ ވެރިކަމާ ހަވާލުވެވަޑއިެގްނެ 48 ގަޑިއިރު ވެސް ނުވަނީސްއެވެ.

ނަން ހާމަނުކުރުމަށް އެދި ހޯމް ލޭންޑް މިނިސްޓްރީގެ އޮފިޝަލަކު ތޭރަ އޮންލައިނަށް މައުލޫމާތު ދެއްވަމުން ވިދާޅުވީ އަމާނީގެ އެއްވެސް އިލްމީ ތަޖުރިބާއެއް މަގާމާ ގުޅިގެން ވެސް ނެތް ކަމަށާ އެގޮތުން އެންމެ ކުޑަ މިނުން ކޮމްޕިއުޓަރު ސިސްޓަމްއާވެސް ކުޅެން ނޭނގޭ ކަމަށެވެ. މީގެ އިތުުރުން އޭނާ އާ މިނިސްޓްރީ ތެރެއިން ހަވާލުކުރާ އެއްވެސް މަސައްކަތެއް ފުރިހަމަ ވެސް ކޮށްފައި ނުވާކަމަށެވެ އަދި މިހަރު އޭނާ އޮފީހަށް ނުނިކުންނަތާ ވަރަށް ދުވަސްވެފައިވާ ކަމަށާ ނަމަވެސް މުސާރައިން އެންމެ ލާރި އެއްވެސް އުނިނުކޮށް ނަގަމުން ގެންދާ ކަމަށެވެ.

ރައީސް މުއިއްޒު ކުރިން ވިދާޅުވެފައިވާ ގޮތުގައި އެމަނިކުފާނުގެ ސަރުކާރުގައި ހުރިހާ މަގާމެއްގައި ވެސް ތިއްބަވާނީ އިލްމީ ގާބިލު ދާއިރާގެ ތަޖުރިބާ ހުރި ބޭފުޅުން ކަމަށެވެ. ނަމަވެސް އެމަނިކުފާނު ވެރިކަމަށް ވަޑައިގެން މަންޒަރު މުޅިން ބަދަލުވެ ވަޒީފާތަކަކީ އެކި އެކި ކަންކަމާ ގުޅުވާ ސަރުކާރުން ބަހާ އެއްޗަކަށް ހައްދަވާފައިވާ ކަމަށް ގިނަ ބަޔަކަށް ތުހުމަތުކުރެއެވެ. އަދި ގިނަ ވަޒީފާތަކުގައި ތިބި ސިޔާސީ ގޮތުންނާ އަދިވެސް އެހެން ގޮތް ގޮތުން އެމަނިކުފާނާ ގާތް ގުޅުން އޮންނަ ފަރާތްތައް ކަމަށްވެސް ގިނަ ބަޔަކު ތުހުމަތުކުރެއެވެ.

އަމާނީ ވަޒީފާއަށް ނުނިކުމެ ރައްޔިތުންގެ ޓެކްސް ފައިސާއިން މުސާރަ ނަގަމުންދާއިރު އޭނާ ގެންދަނީ އެކި އެކި ޕްލެޓުފޯމުތަކުގައި އާންމުންނާ ޒުވާބުކޮށް ހަޑި ހުތުރު ބަހުން މުއާމަލާތްވެސް ކުރަމުންކަން ފާހަގަކޮށްލެވެއެވެ. މިކަމާ ގުޅިގެން އެތައް ބަޔަކު ވަނީ އޭނާގެ އަޚާލގީ މިންގަޑާ މެދު ފާޑުކިޔާ އޭނާއާ މެދު ރައީސް މުއިއްޒު ފިޔަވަޅު ނާޅުއްވާތީ ކަންބޮޑުވުން ފާޅުކޮށްފައެވެ.

މީގެ އިތުރުން އަމާނީ ވަނީ އޭނާގެ ފިރިމީހާގެ މަގާމާ ގުޅިގެން ޚަބަރު ލިޔެ ޝާއިއު ކުރި ނޫސްވެރިއެއްގެ ޒާތީ ދިރިއުޅުމާ ބެހި އެ ނޫސްވެރިޔާގެ 18 އަހަރު ނުފުރޭ ކުޑަ ދެ ކުދިންނާ ގުޅޭ ގޮތުންވެސް ފޭސްބުކްގައި އެކި ފަހަރު މަތިން ޕޯސްޓުކޮށްފައެވެ. މިއީ ދައުލަތުގެ މިފަދަ މަގާމެއްގައި ހުންނަ ބޭފުޅެއްގެ ފަރާތުން ފެނިގެން ވާނެ ވަރަށް ވުރެ އަޚްލާގީ ގޮތުން ދަށު ދަރަޖައިގެ އަމަލެކެވެ.

ނަމަވެސް އަމާނީ މުހައްމަދާ މެދު މިއިން ކަމަކާ ގުޅިގެން ރައީސް މުހައްމަދު މުއިއްޒު ފިޔަވަޅެއް އަޅުއްވާފައިނުވެއެވެ. މީގެ ދެތިން ދުވަސް ކުރިން އަޚްލާގީ މައްސަލަތަކެއްގައި ދެ ޑެޕިއުޓީ މިނިސްޓަރަކު ސަސްޕެންޑްކުރި ނަމަވެސް އަމާނީގެ މި ދަށު ދަރަޖައިގެ އަމަލާ ގުޅިގެން ފިޔަވަޅު ނާޅާ ސަބަބާ މެދު ގިނަ ބަޔަކު ގެންދަނީ ސުވާލު އުފައްދަމުންނެވެ.

އަމާނީ ވަނީ އެކި ޕޯސްޓުތަކުގައި އާންމު ރައްޔިތުންނަށް ޗެލެންޖުކޮށް ކިތަންމެ ވަރެއް ވިޔަސް އޭނާ އާ އޭނާގެ ފިރިމީހާ ތިބޭނީ އަބަދުވެސް މި ސަރުކާރުގެ މަގާމުތަކުގައި ކަމަށް ވިދާޅުވެފައެވެ.

ގިނަ ބަޔަކު ބުުނާ ގޮތުގައި އަމާނީ އާ މެދު ފިޔަވަޅު އަޅަން ރައީސް މުއިއްޒުއަށް ކެރިވަޑައިނުގެން އުޅުއްވަނީ އަމާނީގެ ފިރިމީހާ އާ އެކު ރައީސް މުއިއްޒު ސިޓީ ކައުންސިލް ތެރޭގައި ހިންގާފައި ހުރި އެކި ކޮރަޕްޝަންތަކުގެ މައްސަތައް ފަޅާ އަރުވާލަފާނެތީ ކަމަށެވެ.

އަމާނީ ފިރިމީހާއާ ރައީސް މުއިއްޒުއަކީ ވަރަށް ގާތް މީހުން ކަމަށް އަޑު ފެތުރިފައިވައިރު މި ސަރުކާރުގެ އެންމެ ބާރު ގަދަ ވަޒީރު އަދި ފޮނަދޫ ދާއިރާގެ އިންތިހާބީ މެމްބަރު އަބްދުއްރަހީމު އާ އަމާނީ ޚާއްސަ ގުޅުމެއް އޮންނަކަމަށްވެސް އަޑުތައް ފެތުރިފައިވެއެވެ.