ފެނިގެން ދަނީ ގިނި ދުށް މީހާ ރަތްމަލަށް ބިރު ގަންނަ އުސޫލުން ރައީސް ޑރ. މުހައްމަދު މުއިއްޒު ނޯ ކޮންފިޑެންސަށް ބިރުން އުޅުއްވާ މަންޒަރުކަމަށް ކާނަލް ރިޓަޔާޑް އަހުމަދު ފަޔާޒް (ޕާޕާ) ވިދާޅުވެއްޖެއެވެ.
ޕާޕާ މިހެން ވިދާޅުވީ ރައީސް އަބްދުﷲ ޔާމީން އަލަށް އުފައްދަވާ ޕާޓީ، ޕީޕަލްސް ނެޝަނަލް ޕްރޮންޓް (ޕީއެންއެފް)ގެ ޖަގަހަ ޖަލްސާއެއްގައި ވާހަކަ ދައްކަވަމުންނެވެ.
ޕާޕާ ވިދާޅުވީ، ރައްޔިތުން ތިބީ ނުހަނު ނިކަމެތި ހާލަތުގައި ކަމަށާ ނަމަވެސް ރައްޔިތުންގެ މުހުތާދުތައް ފުއްދާދިނުމުގެ ބަދަލުގައި ފެންނަމުން ދަނީ ސަރުކާރުން ޑިފެންސަށް ކުޅެމުންދާ މަންޒަރު ކަމަށެވެ. އެގޮތުން ރައްޔިތުންގެ އަނގަޔާ އަތާ ދިމާނުވެ ތިއްބާ އައު އަހަހރު ފާހަގަކުރަން ނާޗަރަންގީ ކުޅެ މިއުޒިކު ޝޯތަކަށް އެތައް މިލިއަނުން ހަރަދުކުރަން ރާވާފައިވާއިރު ރައްޔިތުންގެ މަޖިލީހުގެ މެމްބަރުން ގަތުމަށްވެސް އެތައް މިލިއަން ފައިސާއެއް ރައީސް މުއިއްޒު ޚަރަދު ކުރައްވާފައިވާ ކަމަށް އަޑުތައް ގަދަވެފައިވުމުން ސަރުކާރުގެ ނިޔަތާ މެދު ސުވާލު އުފެދޭ ކަމަށެވެ.
