ރާއްޖެއަށް ކުރަމުންދާ ވިއްސާރަ އާއި ގުޅިގެން ބޯކޮށް ވާރޭ ވެހި އައްޑޫ ސިޓީގެ ރަށްތަކުގައި ފެންބޮޑުވެއްޖެއެވެ. މިގޮތުން އައްޑޫ ސިޓީގެ ފޭދޫގެ ބައެއް މަގުތަކުގައި ފެން ބޮޑުވުމުން، ފެން ހިންދުމުގައި އެމް.އެން.ޑީ.އެފް ސަދަން އޭރިއާ ކޮމާންޑް އަދި ސ.ހިތަދޫ ފަޔަރ ސްޓޭޝަން އިން ދަނީ ހަރަކާތްތެރިވަމުންނެވެ.
ހުއްޓުމެއް ނެތި ވާރޭ ވެހި ފެންބޮޑުވުމުގެ ސަބަބުން ހިނގާ ބިނގާވެ އުޅުމަށާއި، ގެތަކަށް ފެން ވަދެ ހިފާ ގެންގުޅޭ ތަކެއްޗަށް ގެއްލުން ވުމުގެ ހާދިސާތައް ދަނީ ކުރިމަތިވަމުންނެވެ.
ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވުމާއި ގުޅިގެން ކުރިއަށް އޮތް 3 ދުވަހު ރާއްޖޭގެ ސަރަހައްދަށް ގަދަވަޔާއެކު ވިއްސާރަކޮށް، އާންމު ވައި ގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށް މެޓް އޮފީހުން ހާމަކޮށްފައިވެއެވެ.
މީގެ އިތުރުން ގަދަ ވަޔާއެކު ބޯކޮށް ވާރޭވެހި، ވައިގަދަވެ، ކަނޑުތައް ގަދަވުމުގެ ސަބަބުން ކުރިމަތިވެދާނެ އެންމެހައި ނުރައްކާތަކުން ސަލާމަތްވުމަށާއި، ލިބިދާނެ ގެއްލުންތައް ކުޑަކުރުމަށް ރައްކާތެރި ކަމުގެ ފިޔަވަޅު އެޅުމަށް އެދި މުޅި ރާއްޖެއަށް ރީނދޫ ސަމާލު ވަނީ ނެރެފައެވެ..
