މޯލްޑިވްސް ޙައްޖު ކޯޕަރޭޝަންގެ ހަވާލުގައި މިއަހަރު ފުރަތަމަ ފުލައިޓުގައި ޙައްޖަށް ފުރާ ވަޑައިގަންނަވާ ޙަޖީންނަށް ބޭއްވި ޖަލްސާގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ބައްދަލުކުރައްވައިިފިއެވެ.

ޙަޖީންނަށް ބޭއްވި ޖަލްސާގައި ވަޒީރު ވިދާޅުވީ، ހައްޖުގެ އަޅުކަމުގެ ތެރެއިން އެއްވެސް ދެއްކުންތެރިކަމެއް ގެންގުޅެގެން ނުވާނެކަމަށެވެ.

މި އަޅުކަން އަދާކުރުމުގައި އިޚްލާސްތެރިކަމާއި އެކު ރަސޫލާގެ އިރުޝާދާއި އެއްގޮތައް އަޅުކަން ކުރުމަށްވެސް އެމަނިކުފާނު ވަނީ އިލްތިމާސްކުރައްވާފައިއެވެ. އަދި އެހެން މީހުންގެ އަމަލުތަކަށް ބައްލަވައިގެން އަޅުކަން ނުކުރުމާއި ދީނުގައި އަންގަވާފައި އޮންނަގޮތަށް އަޅުކަން ކުރުމަށް ވެސް އެމަނިކުފާނު ވަނީ ވިދާޅުވެފައިއެވެ.

ހައްޖުގެ އަޅުކަން އަދާކުރުމުގެ މަތިވެރިކަން ހަނދުމަ ބަހައްޓައިގެން އަޅުކަން އަދާކުރުމަށް އިލްތިމާސްކުރައްވާ ވަޒީރު ވިދާޅުވީ މި ދަތުރުގެ ބޭނުން ފުރިހަމަގޮތުގައި ހިތްޕެވުމަށް ހައްޖާޖީންނަށް އިލްތިމާސްކުރައްވާފައިއެވެ.

ދަތުރުގައި އުޅޭ އިރު އެކަކު އަނެކަކަށް އެހީތެރިވެ އަޅާލުމަކީ ވަރަށް މުހިއްމުކަމެއްކަމަށްވެސް މިނިސްޓަރު ވަނީ ފާހަގަކުރައްވާފައިއެވެ.

މީގެ އިތުރުން ވަޒީރު ވަނީ އެންމެހާ ހައްޖާޖީންނަށް ކާމިޔާބު ހައްޖުގެ އަޅުކަމުގެ ދަތުރަކަށް އެދިވަޑައިގެންފައިއެވެ.