އިޒްރޭލް ޕާސްޕޯޓް ރާއްޖޭގައި ބޭން ނުކުރާ ސަބަބު ނޫސްވެރިން ހާމަކުރުމަށް ގޮވާލާތީ 20 ވަނަ ރައްޔިތުންގެ މަޖިލީހުގެ މައްޗަންގޯޅި މެދު ދާއިރާގެ ޕީއެންސީ މެމްބަރު އަހުމަދު ޒަމީރު ރުޅިގަދަވެއްޖެއެވެ.

ސޯޝަލް މީޑިޔާގައި ދައުރުވަމުންދާ "މައްޗަންގޯޅި" ނަމަކަށް ކިޔާ ވަޓްސްއެޕް ގްރޫޕެއްގެ ސްކްރީންޝޮޓްގައި މެމްބަރު ޒަމީރު ވަނީ ނޫސްވެރިން އިޒްރޭލް ޕާސްޕޯޓް ބޭން ނުކުރާ ވާހަކަ ނޫސްވެރިންގެ ބައްދަލުވުންތަކުގައި ދައްކާތީ އެއީ ސިޔާސީ ގޮތުން ދައްކާ ވާހަކަތަކެއްގެ ގޮތުގައި ސިފަކޮށްފައެވެ.

އިޒްރޭލް - ފަލަސްތީނުގެ މައްސަލަ އަކީ ސިޔާސީ ވާހަކަތަކެއްގެ ގޮތުގައި ޕީއެންސީގެ މެމްބަރުން ސިފަ ކުރަމުންދާއިރު ނޫސްވެރިން އަންނަނީ އާންމު ފަރުދުންވެސް ސުވާލު އުފައްދާ ފަދައިން ޕާސްޕޯޓް ބޭން ނުކުރާތީ އެ ސުވާލު އުފައްދަމުންނެވެ.

އިތުރަށް އެ ގްރޫޕްގައި މެމްބަރު ޒަމީރު ބުނެފައިވަނީ މަޖިލިސް މެމްބަރުން ހުވާ ކުރެއްވުމަށްފަހު ޕީޖީ ލީޑާރ އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހް ޕްރެސް ދެއްވި އިރު ކުރީ ސަފުގައި ޒަމީރުވެސް ހުންނެވިކަމަށެވެ.

އެގޮތުން ޕީޖީ ލީޑަރ ފަލާހް ވިދާޅުވި "ދެ ގައުމުގެ ދޭތެރޭގެ މައްސަލަ" އެއް ކަމަށް މެމްބަރު ޒަމީރަށް ވެސް ގަބޫލު ކުރެވޭކަމަށާއި ޕީޖީ ލީޑަރ އެ ދެއްކެވީ އެންމެ ރަނގަޅު ވާހަކަ ކަމަށް ޒަމީރު ވަނީ މެސެޖްގައި ބުނެފައެވެ.

20 ވަނަ ރައްޔިތުންގެ މަޖިލީހުގެ ހުވާ ކުރެއްވުމަށް ފަހު ސަރުކާރުގެ ސުޕަރ މެޖޯރިޓީ އޮތް ޕީއެންސީ އިން ވަނީ ޕީޖީ ގްރޫޕުގެ ފަރާތުން ނޫސްވެރިންގެ ބައްދަލުވުމެއް ބާއްވާފައެވެ.

އެ ބައްދަލުވުމުގައި ނޫސްވެރިއަކު ވަނީ ނިމިދިޔަ ދައުރުގައި މަޖިލީހުގެ ފަރާތުން ވަނީ އިޒްރޭލު ޕާސްޕޯޓު ބޭން ކުރަން ގަރާރެއް ފާސްކުރަން ރައީސުލްޖުމްހޫރިއްޔާއަށް ފޮނުވާފައި ކަމުގައިވީ ނަމަވެސް އަދިވެސް އެ ގަރާރު ފާސްނުކުރާކަން ފާހަގަކޮށްފައެވެ.

އެހެންކަމުން އެ ގަރާރުގެ ބަދަލުގައި އިޒްރޭލު ޕާސްޕޯޓު މަނާކުރަން މި މަޖިލީހުން އައު ގަރާރެއް ނުވަތަ ބިލެއް ހުށަހަޅާނެ ތޯ ނުވަތަ ނޫންތޯ ނޫސްވެރިޔާ އެހީ ސުވާލަށް ޖަވާބު ދެއްވަމުން ފަލާހު ވިދާޅުވީ، އިޒްރޭލު ޕާސްޕޯޓުގެ މައްސަލައިގެ އެއްވެސް މައުލޫމާތެއް އޭނާއަށް އެނގިފައިނުވާ ކަމަށާ އެހެންކަމުން އެ ސުވާލަށް ޖަވާބު ދެވެން ނެތް ކަމަށެވެ.